鬧人「岩巉」唔開胃 《求愛》Sharon灑淚 鞠躬道歉
噚日日頭白白嗰陣，《求愛》Sharon喺facebook公開向Rocky道歉，希望對方原諒佢曾經話過Rocky個樣岩巉、對住食唔落飯云云。結果反被阿佳鬧爆，質疑Sharon係真心道歉定係想挽回自己嘅港女形象。係嘅，話自己係part time模特兒，仲開post「尋求」贊助。形象，係好緊要。
噚晚成班《求愛大作戰》盛男同盛女去食至尊雞煲，順道嚟咗個至尊無敵和頭酒，講緊嘅係Sharon同真人靚仔過上鏡嘅Rocky呀。
佢哋兩個雖然食緊嗰時分開枱坐，不過到食完喇喎，喂，係時候攤牌啦！記者同Rocky影完相之後，Sharon就行過嚟，話要同Rocky道歉喎，咁Rocky又話要同Sharon耍冧，兩個人90度互相鞠躬不特止，Rocky仲差啲要五體投地…兩個攬埋一嚿嗰陣，Sharon仲眼泛淚光，喊咗!
好喇，禮成喇，有乜嘢要發表吓咁呢？Sharon你仲係咪見住Rocky就食唔落飯呀？佢就話：「其實本身無乜嘢，一開始點解會出咗嗰一句，其實都係一啲剪接…」吓，又係關剪接事？嘩，剪片嘅哥哥姐姐真係承受好大壓力喎！
Sharon繼續講：「…亦都係可能第一次問，其實都係問番第一次可能見到Rocky係點樣，其實(兩人)除咗公開場面見過面，我哋私底下都有食過飯，係食得落飯0架！」噢，原來《求愛》真係令佢哋加深到認識！Sharon仲話喺個節目當中講咗嘅嘢，真係無意中傷害到大家：「除咗對唔住Rocky，真係覺得好唔好意思。」
Rocky只係講咗一句啫：「呢件事從來冇喺我個腦(海)出現過。」梗係啦，喺晒觀眾嘅腦海入面吖嘛！之後Sharon仲要喺facebook寫道，話曾經同Rocky二人世界去食嘢，完全唔存在「食唔落」呢個問題。
車，乜都係Sharon你自己講晒嘅!!!!
Sharon又鞠躬又攬攬，Rocky受唔受呀？
Rocky先係獨照…
Sharon來了…
一鞠躬…
再鞠躬…
Sharon哭了…(DV截圖)
(DV截圖)
Rocky呵番Rocky呵番Rocky呵番~~~~
笑晒！
Sharon今日更新status，咁話喎…
《求愛》阿佳囂樣認冧《盛女》Mandy： 合眼緣，有好感
噚晚成班《求愛大作戰》盛男同盛女去咗食雞煲，監製岑應同女導師Queenie(陳莉敏)都有去，《盛女愛作戰》嘅Mandy，亦應邀出席。唔知係咪因為為咗見想追佢嘅阿佳一面呢？不過呢，現場所見，Mandy喺鏡頭下，Mandy就好似尷尷尬尬、怕怕醜醜咁，唔似得Sharon同佢口中「岩岩巉巉」嘅Rocky咁，親親熱熱面貼面。
阿佳話:「我哋唔係一齊咗，冇冇冇，(準備一齊？)亦都唔係，不過保留一啲可能性啦。(追緊？)亦都唔係咁講。(有好感？)有好感，係喇，我覺得我哋係互相欣賞。」阿佳又話未試過同Mandy二人約會。至於會否「dated」對方？佢就話﹕「咁要睇吓你個dated字咩意思啦。食飯，有可能嘅。特別係等個騷完晒之後，你哋唔再追訪我之後…我先…可能會…。」你真係當自己明星喎。
問阿佳如果將Mandy同《求愛》一眾女參賽者會點俾分，佢就話唔可以用分數衡量，仲反問﹕「正如我問你，覺得Sharon好啲定Vivien好啲？我唔會答。」但就補充一句﹕「總之合眼緣，感覺好好。」
唔記得講，Mandy同阿佳合照嗰陣，仲嗌佢一聲…BB。
等同《求愛》監製岑應嗌Rocky做BB一樣，令人毛管豎起晒。
睇吓阿佳個囂樣!
影合照前，Mandy似是萬般不願。
幾經辛苦…
行埋咗，仲搭住咗。
受訪時，講起Mandy，阿佳個樣……(DV截圖)
「總之合眼緣，感覺好好。」(DV截圖)
「有好感，係喇，我覺得我哋係互相欣賞。」(DV截圖)
Mandy facebook放咗二人噚晚合照，有冇情侶相？
《求愛》又係阿佳 敢做唔敢認 節目爆粗又否認
其貌不揚嘅阿佳，噚晚喺雞煲宴上，好似變咗大紅人咁，一來大家都係咁問佢係咪真係想追同場嘅《盛女》Mandy，加上前晚一集阿佳喺節目中爆粗，吹波波嗰陣爆咗句:「咁嘟痛嘅喂!」大家上番myTV聽番，0329至0331，真係非常搶耳。
噚日阿佳喺facebook上，都承認自己有講粗口，仲留言:「ok，唔怕講埋，集集有，不過應該會mute咗。」Rocky就覆佢話:「蛇仔哥Brian Shea一定邊剪邊笑到gapgap聲，XD」更有唔少「支持者」留言話阿佳喺節目上爆粗，呢啲叫男人的浪漫，先叫man喎。
但24小時唔夠，即係噚晚食雞煲嗰陣，阿佳呢個好man的男人，忽然淆底，又唔認喇:「嗰個好似唔係嗰個字嚟0架，我聽番，係個『乸』字。」明明係「lan」音，竟然話係「la」，仲拉埋大學一眾教授落水，話:「班教授仲爛口過我。外籍人嚟0架，當然上堂嗰陣唔會講。」
阿佳仲話:「粗口個個都會講，咁如果粗口出咗街，唔係我嘅問題，係剪接嘅問題。咁但係嗰句都唔係粗口，嗰個係俗語。」
咁都得？佢真係得0架!
