黃金視窗:陳敏之森美駁出火

陳敏之和商台DJ森美本來大纜都扯唔埋,但卻有緣在無綫劇集《法網狙擊》中扮歡喜冤家,演執法人員開槍捉賊,這次也是敏之入行以來第一次演CID,兩人合作後即成老友。敏之對巨響有童年陰影,森美指她拍完槍戰戲驚到喊唔停。

撰文:比華利


■陳敏之和森美在劇中經常拍檔查案,二人擺甫士都零舍有默契。攝影:陳志嵐

森美和陳敏之在無綫劇集《法網狙擊》中扮演探員,兩人博到盡,危險鏡頭捨棄用替身,森美大爆拍檔瘀事說:「敏之未埋位時好鍾意揸槍影相,貪佢夠型放上微博,佢成日要我一齊合照,佢話我哋要扮《史密夫決戰史密妻》,佢係安琪蓮娜祖莉,我就係畢彼特,不過佢成日好鍾意將支槍舉高拎起,其實呢個甫士係投降,我成日笑佢。」最愛玩野戰的森美樂於指導敏之正確揸槍姿勢。


■森美和敏之拍槍戰戲,敏之終克服童年陰影。《法網狙擊》劇照


■陳敏之在鯉景灣碼頭附近拍照,茶餐廳員工爭相出來邀合照。

陀槍師姐爆喊

敏之童年時曾被表哥在耳邊篤爆氣球,被隆然巨響嚇破膽,一直留下陰影,接拍此劇前未知會有開槍戲,當敏之獲悉要拍攝時,心情忐忑,森美說:「嗰日佢頂硬上,我哋拍完連場駁火鏡頭,叫咗停機,佢就即刻喊咗出嚟,敏之有童年陰影,我哋先知佢咁驚係有原因。佢真係好叻女,終於成功克服咗。」

敏之表示全憑該劇監製文偉鴻的鼓勵,她說:「監製話佢花好多人力物力營造呢場戲,如果搵替身好嘥,於是我就用游水耳塞塞住耳仔,腦海幻想自己要去救媽咪,自自然然就入咗戲,監製叫cut,我竟然仲係咁開火,直至冷靜落嚟先識喊出嚟。」敏之戲中扮陀槍師姐令她圓兒時夢想,她續說:「我細個志願有諗過當差,可惜自己近視,體能又唔掂,今次呢套劇就過足癮。」

敏之去年憑劇集《怒火街頭》在台慶頒獎禮中摘下最佳女配角獎,今年雖沒提名,但她仍默默耕耘寄望明年再捧獎,她說:「呢幾年我覺得自己演技成熟咗,演戲掌握到有層次,我好抗拒做花瓶。」敏之大讚《法》劇班底,她說:「呢套係我入行以嚟最開心一部劇,第一次同森美合作,大家好夾。」


■身為索腿天后的敏之,以泳裝拍劇,大晒弗爆身形。

人肉速遞零食

森美戲裏跟敏之是歡喜冤家,戲外則補番數,她說:「森美知我好鍾意一種粟米片零食,有次佢車咗成箱返嚟畀我,仲話我食晒可隨時搵佢人肉速遞。」

古董座駕似軍車


■森美的平治四驅座駕型格十足。

森美首次接拍無綫劇集《法網狙擊》,變身重案組見習督察,他說:「考督察真係我細細個嘅志願,其實我生長喺紀律部隊世家,爸爸係消防員,兩個舅父分別係警察同華籍英兵,自幼家訓就要有正義感,讀完大學有諗過考督察,不過後嚟機緣巧合入咗娛樂圈,仲多姿多采。」碰巧《法》劇就圓森美夢想。

森美出入駕駛的平治四驅座駕,款式特別,驟眼望去有點軍車feel,他直認不諱:「係呀,呢部車成廿年,都算古董,我喺第二度買返嚟,仲揀咗深藍色,好似以前嘅警車。」森美臨上車前,有識貨途人上前攔截要求影車相,森美都有求必應。