同吳雨霏（Kary）分手嘅余文樂，今日帶領籃球隊橫洲工業到灣仔作賽，剛甩拖嘅樂仔賽前熱身時同隊友有講有笑，但正式上陣時表現失準，稍後更被換走。

休息時嘅樂仔靜坐一旁觀賽，神情認真，之後再落場已回復水準，多次投射得分，最終橫州工業以83比72分勝對手Love Peace。

賽後樂仔接受訪問，被問到分手心情係咪已平復，佢話OK：「冇影響打波，比賽唔諗其他嘢。」對於多份報道都話分手原因係Kary太黐身，樂仔對前度女友依然處處維護：「同Kary仲有聯絡，我今日想講係雜誌所講嘅嘢對女仔好唔公平，我哋冇嗌交，和平共識分開。」

樂仔亦坦白承認同Kary合唔嚟：「但我唔想外間覺得佢有問題，我最清楚佢，要保護女仔，呢段時間唔好畀太大壓力佢。」有指Kary努力箍煲，樂仔說：「我哋共識做一件事，係因性格不合，我亦冇兩次提分手，冇呢樣嘢，唔好誤會佢。」

余文樂雖然同Kary分手，但仍處處維護前度。