無綫一台獨大，不過小生花旦現在可以北上揾食，講價籌碼大咗，唔一定聽大台話喇。
視后佘詩曼去年重返無綫，但講到明一年一劇，無綫找她拍《呂后傳奇》，以為阿佘一個足夠，所以去年節目巡禮隨便找了黃浩然、張致恆拍，但進軍大銀幕的阿佘又怎麼肯屈就，還要說推就推不用講理由，而呂后一角已暫定由楊怡接手。
39歲佘詩曼去年重簽無綫，不過曾北上拍劇，賺過40萬一集的她，當然不會甘願只做無綫視后，所以講到明一年一部，更要自己說ok才拍，去年的《使徒行者》就是最好例子，唔係阿佘like個劇本，得鬼閒睬你。
《呂后》3月開拍
去年節目巡禮阿佘同黃浩然、張致恆為《呂后傳奇》宣傳，諗縮數揾阿佘一個夠照，一心諗住其他主角平得就盡平，據知當時阿佘已對呢個卡士陣容不滿，不過覺得係節目巡禮卡士未落實，所以當時冇出聲。
進軍緊電影圈嘅阿佘，喺《衝上雲霄》電影版拍住古天樂同鄭秀文升晒呢。至上月阿佘收到公司通知，希望佢3月埋位拍《呂后傳奇》，但最慘係卡士冇變，雖然黃浩然呢幾年當旺，不過佢視帝都冇攞過邊夠班呀？無綫已即刻將陣容升呢，由張致恆改為吳卓羲頂上，但阿佘實行睬你都傻，而《呂》劇監製李添勝本想用胡杏兒頂上，但胡杏兒約滿在即，結果由楊怡執三灘谷住拍。
去年無綫節目巡禮阿佘為《女后傳奇》宣傳，當日好評如潮，個個讚阿佘夠霸氣做呂后，家陣由阿佘變演過《宮心計》嘅楊怡，其實都未必衰得晒嘅！
胡杏兒約滿
阿佘唔拍，監製李添勝諗住搵曾在《幗III》合作過的胡杏兒頂上，但胡杏兒約滿走人，當然唔會接。
楊怡焗接
之後添哥再向拍過《宮心計》類似劇種的楊怡埋手，添哥貪佢夠霸氣。
吳卓羲替補
據知阿佘嫌黃浩然、張致恆未夠班，勝哥已經揾嚟吳卓羲頂咗張致恆個位，不過阿佘都覺陣容未夠星級。
添哥製作唔多掂
阿佘除咗因為卡士唔夠勁之外，據知又擔心監製李添勝作品唔多受歡迎，因為添哥近年多套作品好運滯，除咗《神探哥倫布》仆直，有祥仔、胡杏兒孭飛嘅《巾幗梟雄之諜血長天》又推出冇期。加埋最近套《宦海奇官》收視一般，阿佘擔心好正常。