忽然一周 773期
我梗係揀呢張激凸啦！（真實對白）
講到揀靚仔，胡杏兒本來有心水，未睇相已經話：「有冇卡卡（巴西中場）呀！」點知睇到 C朗張相即時變心，仲唔激凸嗰張唔揀，最後揀咗 C朗賣內褲廣告張相，仲自動波跟埋 C朗擺甫士㖭！
世界盃熱
世界盃殺埋身 胡杏兒熱捧激凸 C朗
2010年05月21日
等咗四年，足球迷等到頸都長埋嘅足球盛事世界盃又開鑼喇。今屆賽事將會喺 6月 11日於南非揭幕，相信有唔少球迷通宵捱眼瞓都要捧場。其實唔止球迷，娛樂圈唔少藝人都一樣熱切期待世界盃來臨。
今次趁世界盃殺到嚟，本刊搵咗一堆有關世界盃嘅冷知識考吓一班藝人。雖然佢哋對知識測試都係半桶水，但一講到今年會捧邊個靚仔球星，女星反應尤其熱烈。
今年碧咸因腳傷無緣踢世界盃，出名靚仔身形 fit爆嘅葡萄牙國腳 C朗（基斯坦奴朗拿度）即時成為風頭躉，就連對黃宗澤好專一嘅胡杏兒，見到 C朗張激凸底褲相亦即時嗒糖。
胡杏兒求助無門
趕住入廠嘅胡杏兒，諗住搵人請槍，點知搵着兩個得把口唔幫手嘅男同事，先有路過嘅林子善，睇完問題就話：「我知！（搞到杏兒以為有希望）咪係 ABCD其中一個囉！」之後再遇知道晒答案嘅謝天華，天華睇完杏兒寫嘅答案淨係識笑，最後仲話：「咦！你答啱兩題咋喎！」
搵錯幫手
啱 2題
羅敏莊唔識波靠撞彩
聽到記者話答世界盃嘅問題，羅敏莊即時打退堂鼓話：「我唔玩啦！我唔掂 o架！我淨係識碧咸咋！」最後佢都肯放膽試玩，仲有工作人員專登搵人嚟幫佢手，證明佢人緣都唔錯。話自己唔掂嘅羅敏莊，果然真係幾渣，竟然連阿根廷球王馬勒當拿都話唔識。
麥當娜我就識！（真實對白）
棄萬人迷揀 C朗
話自己淨係識碧咸嘅羅敏莊，見到 C朗張相之後即時改變主意，睇嚟 C朗嘅魅力，真係已經超越咗萬人迷碧咸，成為港女至愛！
啱 5題
陳敏之出貓全中
陳敏之喺化妝間搵髮型師幫手，雖然髮型師只係識 9成，但加埋敏之嘅推斷，結果成為唯一全中嘅一個。至於揀靚仔球星時敏之就比較保守，見到 C朗同碧咸嘅激凸廣告相，即刻話：「嘩！乜咁變態嘅！」以為佢對花花公子 C朗打晒折扣啦，點知佢都係揀 C朗，不過就搵番張有着波褲嘅相。
嘩！乜啲相咁變態嘅！（真實對白）
啱 8題
楊怡靠吳卓羲過關
叫楊怡做世界盃測試，佢即時掹實吳卓羲求救，雖然吳卓羲都係知啲唔知啲，但都幫佢答中 5題，成績真係唔錯。楊怡知道成績咁好邊捽吳卓羲面珠邊話：「你好叻仔呀！」之後仲互攬，使唔使咁興奮呀？
吳卓羲話佢睇球星主要係睇佢球技，佢最後揀咗 C朗，仲話：「佢都好好波。」記者話咗俾楊怡知碧咸今年冇份踢世界盃，但佢依然要揀碧咸做佢嘅最愛球星。
佢好好波。（真實對白）
都係碧咸身形靚。（真實對白）
興奮互攬
啱 5題
男子組捧美斯
吳家樂老貓燒鬚
充滿自信嘅吳家樂一睇到啲問題就以為好簡單，仲話自己一定識晒，點知愈答就愈唔對路，仲反問記者：「泰利搞邊個老婆？之前新聞好似有講過，不過點記得呀？ C朗開咩舖？應該係百佳超市。」身為明星足球隊成員嘅家樂，認真失威。
美斯同我一樣最掂！（真實對白）
阿根廷前鋒美斯
多謝！多謝！（設計對白）美聯社圖片
啱 3題
謝天華批阿根廷有機
「我睇波係留意腳法，所以我比較鍾意睇出名腳法秀麗嘅南美波，好似巴西、阿根廷呢啲球隊我都會追睇。雖然我冇話捧邊隊，不過留意到阿根廷嘅美斯呢期踢得好順，相信阿根廷今年捧盃機會好大。」雖然 Laughing哥口講就話鍾意美斯，不過連偶像細個患有侏儒症都唔知，真係認真抵打。
南美波最好睇。（真實對白）
啱 6題
梁漢文有料到
講到明話有關足球嘢難佢唔到嘅梁漢文，竟然答錯攞得最多次世界盃冠軍嘅球隊。「今年我極度睇好西班牙，人腳好之餘中場真係太強，尤其係恩尼斯達同沙維已經咁好波，仲要一齊打國家隊，默契當然好。球星就梗係美斯啦，最欣賞佢嘅變速力，相信佢嘅成就會超越馬勒當拿，阿根廷如果贏到波一定全靠佢。」
我梗係鍾意踢得好嘅球隊啦！（真實對白）
啱 6題
敖嘉年專揀型男
平時冇睇開波嘅敖嘉年，全程好認真咁答，又冇搵人幫手，咁都俾佢撞中 3題。之後佢仲好好學，即場問記者正確答案，估唔到佢連玩都同工作一樣咁認真。唔識波嘅嘉年，揀球星自然唔會揀腳法，純粹揀有型靚仔，佢就同大部份女星一樣，揀咗 C朗，估唔到 C朗連男人都 buy喎！
我係男人都覺得佢有型呀！（真實對白）
啱 3題
蘇永康完全唔係波
Big Four四子中唯一一個唔踢波嘅蘇永康，以為佢會受其他三個兄弟耳濡目染都睇波，點知佢話想世界盃快啲完。「我真係好討厭睇波，淨係鍾意買衫，所以對世界盃完全冇興趣，淨係想知道碧咸着咩衫，亦唔想知道佢同邊隊踢波。」不過今年碧咸冇份踢英格蘭國家隊，所以蘇永康連睇碧咸嘅時間都可以慳番。
我淨係想知碧咸着咩衫！（真實對白）
正確答案
1. A：烏拉圭
2. C：巴西
3. A：布列治
4. B：高治（英格蘭）
5. D：費蘭度托利斯
6. C：激素缺乏症（侏儒症）
7. C：首飾時裝店
8. C：外父女婿