向來是愛犬之人的楊思琦，與李泳豪一起養了多隻「八哥」狗仔，思琦狠飛泳豪後，更被指懶理愛犬。忍口多日的她昨日忍不住開腔，指稍後會與泳豪商討狗仔撫養權：「我只想講我唔會唔理啲狗！」但李家鼎則發火說：「多X餘！咪睇吓第日啲狗點囉！」罵戰一觸即發。
楊思琦和李泳豪共同撫養的六隻「八哥」狗仔，自二人分手後，便一直由豪仔照顧，日前李家鼎指思琦於清水灣半島的娘家不准養狗，就算接回去，最終狗仔都只會被送到愛護動物協會，若一星期沒人領養，便會被拿去人道毀滅。
否認唔理狗仔
雖然思琦早前對負面新聞一直不作回應，但今次被指放棄愛犬，向來疼錫牠們的思琦終忍不住開腔，她昨日於電話中說：「我唔想回應！唔係事實嘅嘢唔回應，唔想一人一句，我只想講我唔係唔理啲狗，大家千祈唔好誤會囉！其實我之前同佢哋一齊有研究呢個問題，呢件事一定會有解決方法，視乎大家點樣去傾，不過好多嘢，我覺得唔使公開向傳媒交代。」
而李家鼎接受訪問時則說：「多X餘！黐線！咪睇吓第日啲狗點囉！啲狗仔不嬲由施明同泳豪照顧住，施明好錫啲狗，直頭命根一樣。（施明唔肯畀番啲狗思琦？）冇呢件事。（思琦有冇要求要番狗仔？）冇聽過喎！」
老闆疼錫泳豪
問早前思琦曾否帶過狗仔返娘家，鼎爺坦言：「冇！（佢媽咪唔鍾意狗？）我唔敢講！」而泳豪前晚到惠州為飄移賽車試車及表演，鼎爺指老闆很疼錫泳豪，為免他偶一不留神受傷，所以叫他今次不要比賽，只是作表演。
思琦和泳豪同是愛狗之人，當愛犬有如子女。
楊李口水戰
楊思琦單方面跟拍拖九年的李泳豪分手，引起李家上下極之不滿，楊李兩大陣營愈鬧愈激，粗口夾雜，罵戰連連。
楊門陣營：楊思琦、俞越
李家陣營：李家鼎、李泳漢、李泳豪、施明
6月28日 思琦宣布分手，疑似「有喜」的她說：「我唔會講（分手）原因，大家有共識。」對於被思琦狠撇，豪仔說：「我仲未接受到，我嘅心情仲未平復。」鼎爺即激動爆粗：「佢黐線㗎？仲Plan緊結婚！」
6月29日 泳漢不甘弟弟被撇，爆出思琦言行不一內幕：「佢凌晨仲傳『仍好愛你、好掛住你』嘅短訊畀我細佬！」施明首度開腔：「我個仔一直好委屈，我想佢明白，可以留就留，唔可以就放低！」
7月3日 泳豪被飛，惟有寄情賽車自我麻醉，還唏噓說：「啲人只係睇成果，我唔紅就衍生好多事。」
7月5日 俞越被指是思琦新歡，即澄清：「梗係唔係！我同豪仔都有食過飯，大家都知咩一回事！」
7月6日 思琦接受《東張西望》訪問，哭訴暗指豪仔放料：「好想搵個啱自己，照顧到自己嘅對象。」鼎爺知道思琦爆大鑊，即躁爆說：「佢最叻就係標眼淚，最醒就係一哭二鬧三上吊，講×埋啲廢話！」
7月7日 泳漢接受訪問時指思琦是有了新歡及「有喜」而與泳豪分手，他重申手頭上有很多重要證據！7月9日 泳漢接受本報獨家訪問，直斥思琦，更怒吼說：「我要佢還李家一個清白。」鼎爺說：「佢最叻，我打滾幾十年都畀佢呃？不過唔好辣我，唔係佢就富貴。」提到思琦表示與李家唔夾，鼎爺說：「咁又唔搬出去？依家又講咁多嘢，當我低B！」
7月12日 思琦被踢爆新歡是前跳水隊成員吳帥，其好友俞越指泳漢出言博上鏡，鼎爺說：「叫佢夠膽出嚟同我講呀！」
陳子才：明年好大機會結婚
堪輿學家陳子才表示，楊思琦明年有機會結婚，而真命天子早已出現，指她的感情出現重疊情況，暗示早已有「第三者」，他說︰「思琦今年因為有文昌星化忌，即係關於簽字嘅嘢係做唔到，結唔到婚就分開，不過下年好大機會結婚，最快喺下年立秋之前。」他表示有吉星入夫妻宮，故明年結不成婚而分開的機會比今年低。
另外，思琦前晚上載一張與堪輿學家蘇民峰的合照，當日思琦主持節目《寵愛有加》，與蘇師傅大談寵物經，思琦更大讚蘇師傅的愛犬Scoopy十分純良。
施明：佢哋係我命根
李泳豪的母親施明也是愛犬之人，她亦有養狗，而早前泳豪病逝的西施狗，據知是有一年泳豪、泳漢生日，父親李家鼎給了每人一千元，兩人買來送給施明的禮物，現時若泳豪要開工或離開香港，都是由施明親力親為照顧六隻「八哥」。
昨日記者致電給施明，她坦言向來幾隻「八哥」都是由她一手一腳照顧，她更肉緊地說：「無論幾辛苦，我都會照顧佢哋，佢哋係我啲仔仔女女，係我啲命根。」
談到思琦指會與他們商討狗仔撫養事宜，對此施明說：「呢個問題我依家唔答，唔處理住，等大家嚟決定。（思琦有冇講過想攞番啲狗仔？）冇咁嘅事。（攞番你都唔捨得？）佢哋不嬲係我嘅命根嘛！」
泳豪願坐低「解決」
李泳豪與楊思琦相愛時，已將他們共同撫養的六頭「八哥」視如子女，如今緣盡分手，亦得解決「撫養權」問題。正身在惠州為賽車飄移表演賽試車的泳豪，對思琦將相約傾狗仔問題時，他在長途電話中的聲線亦顯得很平靜，似乎已接受分手的事實，並強調「『仔、女』我一定照顧嘅！」
身處氣溫高達三十多度的惠州，泳豪要穿着厚厚的賽車戰衣落場為飄移表演試車，他坦言因太熱而變得很累，晚上睡得不太好，不過還可應付演出：「其他嘢我唔諗住，我想專心表演，返到香港我會處理啲狗仔，六隻『八哥』之前係我同思琦一齊養，依家我哋雖然分開咗，但我一定照顧佢哋，我已經當啲狗仔係我哋嘅仔、女。（思琦話搵你出嚟傾解決狗仔問題？）佢肯傾嘅我當然會傾啦！我會同思琦了解清楚咩事！」