楊思琦拒回應齋送祝福
楊思琦前日單方面宣布與李泳豪分手，隨即有消息指思琦「有喜」，對於傳聞，思琦既沒否認也沒承認，只強調「不願回應」，至於豪仔，則坦言思琦以「有喜」為分手理由：「思琦有講佢『有喜』，但係我唔信。」單看表面證供，思琦似是去意已決，但豪仔哥哥李泳漢昨卻爆出思琦言行不一的驚人內幕：「佢凌晨仲傳『仍好愛你、好掛住你』嘅短訊畀我細佬！」
自相戀九年的楊思琦單方面宣布「分」訊後，李泳豪除了要承受失去最愛的痛苦外，還要背負一個男人不能接受的理由，低落心情可想而知。據知，這次除了豪仔家人對其情緒大表擔心外，他身邊的朋友亦替其不值，其中一名知情人士爆料指，思琦分手當日哭着說的話，正是表示自己「有喜」，她將經手人告訴豪仔後，即堅持要分手；而當時已極度沉痛的豪仔，仍企圖挽救這段接近十載的情緣，可惜女方態度堅決，令豪仔大受打擊。
楊思琦被求證是否「有喜」時，第一個反應是「邊度聽番嚟」。
由於思琦「有喜」消息驚人，本報昨日致電豪仔求證事件，豪仔亦坦言思琦以「有喜」為分手理由：「思琦有講佢『有喜』，但係我唔信。」至於思琦，本報前晚已率先嘗試求證「有喜」一事，她第一個反應是：「你喺邊度聽番嚟？點解會有咁嘅傳聞？不過都係冇任何回應。」直至昨日，思琦對是否「有喜」仍是既沒承認也沒否認，只主動提出要對豪仔寄予祝福：「同豪仔相處咁耐，佢係一個好好嘅男仔，分咗手之後都係好朋友，祝佢永遠幸福。」
李泳豪仍未接受情變之事實，自言仍愛思琦。
泳漢爆對方仍發情訊
除了「有喜」傳聞孰真孰假成懸案外，思琦是否決意分手亦是另一大問號。據豪仔哥哥泳漢引述，他昨日凌晨陪豪仔通宵傾心事時，豪仔突然收到思琦發出的短訊，內容竟是：「我仍很愛你、很掛念你」，足見女方言行矛盾。對此，泳漢憤然表示：「都唔知佢咩心態，希望佢唔好再傳咁嘅短訊畀我細佬，佢每收一個短訊，情緒就更唔穩定。」
現階段唯一肯定的，是豪仔心情十分低落，他昨接受電話訪問時，直認心情尚未平復，並指仍未成功聯絡思琦，再追問思琦「有喜」一事，他說：「唔回應喇，依家好唔開心，唔想再聽啲唔想聽嘅嘢。」由於豪仔情緒反覆，家人為免他胡思亂想，昨日凌晨四時許專誠前往電視城陪他放工；即使只是拍劇同事，也對他施以慰問，令豪仔大為感動：「我好多謝黃浩然、陳志健同徐榮，佢哋同我傾咗好耐，好多謝佢哋咁關心。（思琦話分咗手幾個月，點解上月仲同你慶祝生日？）我尋晚開工，個個都好驚訝，因為思琦前幾日都仲有嚟搵我食飯。」
情緒反覆 拒提情敵
縱然面對九年情生變，但路還是要繼續走，昨日五時許，豪仔在爸爸李家鼎陪同下到電視城開工，勇敢面對傳媒訪問的他，當被問到是否認識Andy、及Andy是否思琦中學同學時，即顯得十分哀傷，一度嗚咽，只強調：「唔想回應。」經記者再三追問，他才說：「想了解咗件事先再交代，依家個劇煞緊科，無時間搵思琦。」再問他是否相信思琦「有喜」，他即以極微弱的聲線表示：「唔信唔信。」
豪仔又指思琦表示為方便上班，於四月尾搬往清水灣半島，問他當時有否感到感情有問題？豪仔說：「feel唔到，佢仲好關心我夠唔夠瞓，有無飯食。（男人最痛咩事？）唔回應，總之我哋無嗌過交，都唔知發生咩事，依家好擔心佢嘅狀況。」強調情緒混亂的豪仔，直指若感情無法挽救最終還是要接受現實，但他指自己仍深愛思琦：「無論將來發生甚麼事，思琦有事我一定會出嚟幫。」對於被指沉迷賽車，豪仔勞氣謂：「都唔係第一次講，其實喺○八年已經有車隊贊助我，訓練比賽食宿全部由車隊贊助，唔係報道所講咁荒謬，話我用佢（思琦）啲錢賽車，所以車隊都想有啲法律行動。」
至於無綫高層樂易玲則表示未有聽思琦提及「有喜」：「佢無大肚，但分手有同我講過，佢哋嘅決定係經過深思熟慮，希望唔好影響佢哋工作啦。
Andy刪走微博留言
楊思琦的「新歡」中學同學Andy，日前在微博宣布：「十一年的感情終於有了結果。」不過Andy被傳介入楊思琦及李泳豪的消息曝光後，他即刪走該留言。網友對他的身份甚有興趣，在其微博中留言詢問他是否Andy，李泳豪則未有取消關注Andy。
楊思琦及李泳豪的「分」訊引起粉絲關注，粉絲留言表示難以接受二人分手，指維繫九年情不易，勸楊思琦原諒李泳豪，另有粉絲表示支持楊思琦的決定，祝她幸福。至於粉絲亦在李泳豪的微博留言以示支持。
鼎爺為仔失眠：佢喊咗成個禮拜
楊思琦前日突然宣布與李泳豪分手，有報道指因女方情投舊友，並珠胎暗結；另一分手原因是不滿李泳豪迷上玩飄移賽車，令思琦棄愛說分手，事件令李家眾人感難過。李泳豪兄長李泳漢昨日五時許，在大雨下站在寓所外見傳媒，他說前晚等泳豪收工等到天光，兄弟見面相擁，他感覺到弟弟好傷痛，李泳漢不回應傳媒問思琦是否「有喜」，只說指弟因玩飄移賽車而冷落女友是藉口。
李家鼎則表示：「阿仔尋日至肯同我講呢件事（女方『有喜』），佢已經喊咗成個禮拜，佢怕我哋擔心唔同我哋講，依家個仔成日傷心問點解，我都成晚冇瞓。」問到他思琦是否不滿泳豪玩飄移賽車時，鼎爺有點勞氣說：「多餘！藉口！鍾意嗰陣玩屎都話好o架啦。」
施明亦戥兒子難過：「我個仔一直好委屈，我想佢明白，可以留就留，唔可以就放低，昨晚多謝佢啲朋友送佢返屋企，我怕佢唔好意思返嚟，我會全力支持佢。」