【馬賽風雲之撕破面具】現年26歲的馬賽被爆硬撬富婆Laura牆腳，跟內地有米女製片汪子琦玩斷背，為挽救破產形象的她扮喊博同情。據知汪子琦早前看清馬賽貪錢真面目，已主動跟她分手，昨更在微博狠插馬賽謊話連篇。Laura則踢爆馬賽在雪藏期間拖媽咪跟汪子琦遊世界，馬母更拍下二人啜爆相，母女檔呃汪子琦。Laura怒插馬賽冇人格：「佢係一隻狐狸，我要撕破佢呢層面具！」
馬賽被指做小三，令汪子琦與Laura的7年情分手收場，惟馬賽攣情曝光後一度死撐，指時間可證明一切，形象跌落谷底，早前更被無綫雪藏。還以為馬賽閉關靜思己過，據知，她卻懶理被雪，上月拖媽咪跟汪子琦蜜遊新加坡、越南及柬埔寨，馬母則親自拍下馬賽與汪子琦的啜爆相，證明母女都是大話精！
■馬賽（前）被雪藏期間，原來跟汪子琦拍拖遊世界，看她當時還身穿水着勁風騷。
消息指馬母要求汪子琦將名下2千萬半山豪宅轉名送馬賽，而馬賽又要汪子琦除掉跟Laura的定情戒指交她保管，汪子琦才醒覺馬賽有計謀，知道自己睇錯人。二人不時鬧交，馬賽就發爛渣，兩母女一哭二鬧，汪子琦終提分手。初時馬賽不肯放手施軟功，至雜誌爆汪每月給20萬家用、汪家人阻其將豪宅轉名，馬賽擔心汪子琦表姐毛玉萍出手，即向無綫求救，聲稱知錯已放低汪子琦，馬母更謂女兒抑鬱想死。
■馬賽（左）帶埋媽咪跟汪子琦遊埠，心情靚爆。
■汪子琦（右）與馬賽攬啜任影，拍照的竟然是馬賽媽咪。
■Laura
■汪子琦在馬賽身上花了不少錢，圖中的Chanel手錶是禮物之一。微博圖片
汪花200萬o氹馬賽
汪子琦看清馬賽真面目，昨在微博插爆舊愛：「曾以為最是真心載不動，可是奔赴千里之後，才發現不過是一場設計，這三個月我付出的真心、無微不至地照顧，換回來的不過是你的謊話連篇！這幾年我已經慢慢學會接受，接受意外，接受現實的殘忍和人性的殘缺。心痛絕望……但我真的很對不起Laura！因為懂得，所以慈悲，不是每個人都有資格說的！」
馬賽喊爆出「櫃」之騙中傳奇
■（左起）馬賽、汪子琦及Laura曾結伴歐遊，但此情不再。資料圖片
昨身在日本的Laura不屑馬賽所為，提供馬賽母女與汪子琦遊世界的相片，還有汪子琦花在馬賽身上的銀行支出，包括家用（約13萬人民幣，下同）、卡地亞戒指（約2萬）、Chanel手錶（約8萬）、珠寶首飾（約16萬）及機票等證據，力證兩母女都是大話精。對於馬賽施喊功挽形象，Laura接受電話訪問時說：「佢好耐冇拍劇，扮嘢騷吓演技博同情，佢就係一隻狐狸，我唔會俾佢再呃，一定要撕爛佢呢層面具，聽講佢有最佳女配角提名，佢啲戲真係幾好，佢係好恐怖女人。」她估計汪子琦共花約200萬在馬賽身上。
問到是否覺得母女檔呃人？Laura說：「直情係啦！佢哋同汪子琦一齊出埠，啲相證明到媽咪幫佢哋影，佢媽咪都笑得好開心，默認個女搶人男友，兩母女根本喺度做戲，使乜接受訪問同媽咪道歉，喺屋企道歉咪得囉！佢唔認係第三者，硬搶人男友扮真愛，真係好cheap，以為自己真係女神，地球圍住佢轉。」
毛玉萍勸帶眼識人
問到覺得馬賽人格如何？Laura冷笑說：「人格？佢冇人格，佢以勝利者姿態飛上海箝住汪子琦去遊山玩水，o依家又出嚟講乜承受壓力、抑鬱，抑鬱都可以咁風騷，我諗全世界死，佢都唔會死住。」對於馬賽稱被出賣，她激動地說：「好想知邊個出賣邊個，佢為私慾金錢工作機會出賣我，爭我條仔，真係好搞笑！」對於汪子琦在微博跟她道歉，兩人會否復合？她嘆氣說：「可以釋懷，但唔會再一齊，因為有傷害，希望再見係朋友。」
對於表妹汪子琦人財兩空，毛玉萍受訪時說：「表妹啲嘢唔想理咁多，不過早排見佢真係好唔開心，我只係希望佢帶眼識人。」而馬賽的過氣緋聞男友吳卓羲昨日現身時說：「呢啲新聞好快過去，香港人好健忘。」
馬賽又借屋企博同情
■馬賽在節目訪問時，淚流披面。電視圖片
被狠批是大話精的馬賽，昨晚現身將軍澳時死撐：「之前處理新聞做得唔好，第一次出嚟見傳媒好驚好緊張，其實我唔係好擅長言詞嘅人，亦驚講錯啲嘢令屋企人唔開心。」是否跟汪子琦分手？她說：「我哋曾經係好好朋友，o依家所有嘢結束咗。」她否認為工作放棄感情，對於汪子琦在微博鬧她謊話連篇，馬賽眼泛淚光，但依然喊唔出：「唔想講啲傷害人嘅說話，今日有好朋友同我講，真正放低係睇唔到聽唔到，呢句說話希望我做到，我祝福佢一切都好，自己都好似發咗一個夢，夢醒了所有都結束咗。」
冇膽認出櫃
馬賽用好好朋友形容與汪子琦的關係，是否不想承認同性戀？她支吾說：「感情好私人，希望大家畀空間我。」馬賽指現跟汪子琦沒聯絡。至於馬母爆她有富二代男友？她說：「o依家係單身，想重新過自己簡單生活，呢件事傷害我屋企人。」記者指拍拖很正常，為甚麼會傷害人？馬賽說：「我嘅行為任性令家人擔心。」記者追問她的性取向，馬賽依然冇膽認出櫃：「我覺得真愛唔分性別年齡階級。」至於被雜誌影到在新加坡豪賭，馬賽強辯：「我冇賭博，係陪朋友去。」問對方是否汪子琦？她拒答：「所有嘢都過去咗，請大家畀空間我。」
■馬賽昨晚現身受訪，全程哭不出來。
此外，馬賽在昨晚播出的電視節目訪問中邊喊邊說：「見到屋企人為你好擔心，為你嘈交，媽咪食唔落飯，佢真係蒼老咗好多，會好心痛，覺得自己好唔孝順！」
馬賽喊爆出「櫃」之 時間證明攣情
馬賽由被揭發攣情以來，態度180度大變，引證她那句「時間可以證明一切」。
8月中
馬賽、汪子琦及Laura歐遊一個月，有指費用由Laura包起。
11月5日
馬賽在活動上以「時間可以證明一切」及「斷章取義」作擋箭牌，只認與汪歐遊。但她與馬尾妹態度親暱，更買外賣到女方香閨。
11月6日
馬賽上海啜爆汪子琦斷正，無綫即勒令她停工兩個月。
11月8日
Laura與汪子琦斬纜，馬尾妹只屬過客，最終馬賽獨贏汪子琦。
11月13日
Laura以「披住兔皮嘅狐狸」形容馬賽，指她攻心計及愛名牌。
11月29日
馬賽在微博發表寬恕論，Laura直斥荒謬，歪理當真理。
12月7日
馬賽閉關一個月，終獲無綫安排在演出《歡樂滿東華》。