13年因為一單三角關係緋聞，令 08年港姐季軍馬賽被無綫雪藏，雖然有指無綫已解凍，並安排拍新劇《東坡家事》，但角色發揮有限，更貶做大配角。
已經 27歲的馬賽近日得高人指點搬屋換車轉運，並打算用回原名司馬賽兒重新在娛樂圈發展。週一（ 6日）馬賽在新居外接受訪問時直說：「暫時無其他工作喺身……幾難聽嘅說話都聽過，我覺得我o依家係好需要做嘢。」用盡各種辦法都係想繼續做演員啫，司馬賽兒呢次係咪可以重生呢？
13年底，馬賽因為與內地女製片人汪子琦，和內地女富商 Laura的三角關係曝光而令純純兔形象幻滅，無綫更即時雪藏馬賽，事件擾攘大半年，去年 8月馬賽決定赴英進修，離開傷心地。
壓力禿現時冇工開嘅馬賽，不時進修增值自己，雖然冇晒當日風采，右額更有輕微壓力禿！
近期已經冇乜公開活動見到馬賽蹤影，呢個活動係今年 1月，即係馬賽已經 3個月冇工開。
冇乜機會上鏡，馬賽連妝都唔化就孖住將軍澳街坊朱璇行街，平平淡淡又一日喎！
進修完返香港，馬賽用 18萬幾買咗部二手甲蟲車代步，仲慳埋停車場泊街邊！車主登記顯示，馬賽亦用回原名司馬賽兒！
馬賽老豆之前用近 50萬買咗部寶馬畀愛女代步，不過去年底俾馬賽賣咗套現去英國進修。
屋企有錢，馬賽同爸爸馬靈感情要好，o依家起居飲食都係靠屋企接濟。
08年當選港姐後，馬賽就搬入清水灣半島住。不過去年底選擇去英國進修時已退租。進修完返港，馬賽就搬咗入再近啲公司嘅峻瀅。
變番純純兔
去年底馬賽低調返港，接拍許鞍華的新戲《 8步半》，而大台亦安排馬賽參與新劇《東坡家事》，雖然女二不再，但馬賽仍然落力演出。
自馬賽由英國返港，個性已變得有所不同，在溫室長大的她，以往都愛發小姐脾氣，但近月心情難得保持平靜，冇再怨天尤人。週一（ 6日）馬賽接受訪問時說：「《東坡家事》啱啱拍完，所以呢幾個月就返大學進修緊一啲幕後嘅課程，讀電影系。同埋學緊佛，o依家有返開固定一個佛堂。佛教上面嘅嘢幫到我好多。人開心好多，個人平靜啲。」
上月 27日，馬賽帶埋工人姐姐去中環，行去坐港鐵期間，二人竟然拖住手行！
江若琳執馬賽二攤
馬賽跟製作人汪子琦各行各路後，汪子琦重返正印內地富婆 Laura身邊，去年籌備開處女執導新戲《愛在星空下》，當時想搵馬賽做女一，可惜二人斷交收場，汪子琦最新目標睇中新寵江若琳！
據知新戲仲搵咗惠英紅、內地女星黃奕等人，唔知汪子琦會唔會搵馬賽客串番一、兩幕，收吓宣傳之效呢？
改口叫司馬賽兒
其實換車換樓前，馬賽之前架車都已經放咗塊玉保平安。風水嘅嘢，信則有不信則冇囉！
08年得獎後即簽約無綫，還有合約在身的馬賽未有打算解約，反而是平靜地等公司安排。「我暫時都係 TVB嘅員工，合約仲有一段時間。工作嘅嘢我都係等公司安排，總之o依家暫時都好好。」
5歲已立志要做演員的馬賽，雖然心情已平伏不少，但對於近月無工開，仍是耿耿於懷。據知馬賽去年返港後，即搵高人指點迷津，期間高人提到不同的顏色和方位，促令馬賽立即搵屋兼換車，高人更指，馬賽若用回本名會對事業更有利。
15年重新出發的馬賽，得高人指點後馬上由清水灣半島搬到同區的峻瀅，以及將馬爸爸 10年送贈、約 50萬的全新寶馬房車換成約 18萬的藍色二手甲蟲車，而據知她在浸大進修電影課程時，向學校介紹時，已經改口稱自己為司馬賽兒。
「幾難聽嘅說話都聽過！」
近月零收入的馬賽，雖然背後有屋企人支持，但學佛後的她變得節儉，峻瀅的月租車位約 4千蚊一個月，馬賽寧願冒住被抄牌的危險都要泊街為慳錢，以往去到邊都揸車的馬賽，最近亦較多坐港鐵。
在訪問最後，馬賽很看得開：「各式各樣嘅傳聞、各式各樣嘅言論我都試過喇，我仲可以擔心咁多咩？幾難聽嘅說話都聽過，你睇我o依家幾平和！」一副看破紅塵格，希望司馬賽兒翻身成功啦！
6/4 傾足 6分鐘
馬賽外出返歸，面對記者，馬賽都話：「見到你哋雖然好驚，但我唔會嬲！」然後就坐定定答問題，十足做專訪。
黐公關 CEO
食名人飯重新出擊，馬賽四出搵朋友幫手。週日（ 5日）晚就同公關 CEO鄭紹康、前亞視執行董事盛品儒，仲有盛老婆蔡一鳳一齊食晚飯。網上圖片
《東坡家事》暫時係馬賽喺無綫嘅最後一部作品。
去年底接咗許鞍華套電影《8半步》嘅其中一個單元，不過許導慢功出細貨，部戲未知幾時上得！
改名轉運
圈中唔少藝人、明星都好信風水呢家嘢，所以出道前改名，或者出道後見星途平平又改名，甚至改來改去都大有人在！
歌手吳雨霏，其實佢叫吳家穎你又知唔知？早排因為嫲嫲而由李詩韻改番做李施嬅；仲有天后級嘅王菲，都曾經改過名做王靖雯。你又記得幾多個呢？
吳雨霏/吳家穎
唱得之人吳雨霏原名吳家穎， 02年加入 Cookies出道， 05年作獨立發展後即改名吳雨霏，果然事業從此一帆風順，開過兩次紅館個唱，年初更成功嫁做人妻。
李詩韻/李施嬅
大台藝人李詩韻，年初於微博寫到：「 2015決定改名回『李施嬅』，這個名字是我最愛的嫲嫲幫我改的。但家人幫我改為李詩韻。希望大家以後可以叫我李施嬅。」
王菲/王靖雯
樂壇天后王菲早於 89年出道時，唱片公司替她改了名字王靖雯，英文名 Shirley， 95年大紅才用回原名王菲。
舒淇/林立慧
原名林立慧， 18歲時用藝名舒琪於台灣拍攝首本寫真集，被文雋於雜誌上發掘，即約見並邀請她來香港發展，再改名為舒淇。果然， 95年出道至今，舒淇已成為影壇一姐。
俾條生路行吓啦
5歲已經立志要做演員嘅司馬賽兒， 06年已經喺香港浸會大學傳理學院電視電影系畢業，用一年時間準備參選港姐，結果成功攞到季軍入大台，雖然至今唔算拍得多劇，不過出道短短 6年，司馬賽兒曾經都被無綫力捧過，更係添哥李添勝愛將！
不過一次意外足以致命， 13年鬧出三角緋聞，司馬賽兒即時摺埋！事到如今，仲有咩路可以令司馬賽兒條金光大道起死回生呢？
孖玲玲唱歌
還記得農夫數年前孖過玲玲姐 rap歌嗎？當時 rap一 rap，三位都當堂彈起晒，加上玲玲姐識風水擺陣，過番兩度散手俾司馬賽兒都好吖！
做打女
市場上其實打得又睇得嘅女星真係唔多，司馬賽兒細細粒，其實都幾啱 feel做打女，佢之前喺《神探哥倫布》就試過起飛腳踢賊，呢吓真係睇到觀眾嘩嘩聲！
跟晶哥搵食
不如試吓搵晶哥傾傾！佢之前都捧紅過袁嘉敏，只要司馬賽兒肯搏肯露，晶哥梗有辦法幫到手嘅！
同法拉爭食
李澤楷揸旗嘅香港電視娛樂啱啱攞到 12年免費電視牌照，咁司馬賽兒大可以同無綫傾解約，再埋楷楷嘅港娛堆，話唔定可以搶埋盛傳會幫港娛拍開台劇的法拉個花旦位喎！
馬賽聲稱信佛想重新做人，但是舊愛汪子琦卻咬着馬賽不肯放，有關馬賽解凍搬屋換車改名轉運的報道刊登後，疑觸動了汪子琦的神經，她隨即在微博留言：「狗，是改不了吃屎的！既然總把佛祖掛在嘴邊，就不要總是把你那窮鬼父母拿出扮有錢人褻瀆神靈，不說謊會死嗎？一直編故事博版面不累嗎？害人精！」但該條微博隨後已被刪除。
汪子琦微博曾這樣留言，但最後此微博已被刪除。（微博圖片）