木人巷向左走向右走？馬賽伺機

流得三色血，要麼飛黃騰達，要麼就做到「嘔拔甩」！若事事錙銖必較，倒不如一不做二不休，放眼神州搵人仔。無綫木人巷如今只得兩類人，要不如陳鍵鋒般破繭離巢，要不學馬賽般馴如綿羊，向左走向右走？任君選擇！

港姐出身的馬賽，去年憑《女王辦公室》嶄露頭角，其後劇接劇，是無綫力捧「上位ing」花旦之一。適逢當紅小生花旦爆離巢潮，她坦言沒有影響力爭上游的信心：「佢哋有自己嘅選擇，如果真係走咗好可惜，間接令我少咗向前輩學嘢機會，特別係阿佘，好多導演都讚佢演技好，我視佢為目標！」

「得着唔等於錢」

問到有否感到備受力捧，她感謝公司栽培：「唔好話力唔力捧，公司好錫我，畀機會我做司儀、主持同拍劇！（滿意表現？）做得唔好都唔會再搵我啦！」自信卻謙厚，正是新人應有的態度。

對於無綫遭陳鍵鋒炮轟刻薄，馬賽直言拍劇一定辛苦：「唔止無綫係咁，出面拍電影都好辛苦啦！雖然呢度人工的確唔係好高，但最緊要鍾意！」她透露最高紀錄試過兩日瞓40分鐘，但卻異常享受這種「學堂」生活：「出面唔會畀咁多機會你磨練，呢度係好好嘅學堂，有時得着唔一定要用錢衡量嘅！」早出晚歸，甚至不歸，雖然馬賽為理想冇計，但家人卻心疼寶貝女捱鹹苦：「媽咪問點解一定要夜晚拍戲，正常作息時間嘅人唔會明。」

現正播出的《洪武三十二》是馬賽首套古裝劇，亦是她首次挑戰悲情角色，飾演被賣落青樓的千金小姐，更有遭強暴戲份：「睇劇本嗰陣已經睇到喊！試過媽咪嚟探班，我Down到唔想講嘢，惟有Send短訊叫佢體諒。」她直言拍攝強暴戲時豁出去，僅以Tube及打底褲上陣：「我信任大家，難得編審肯畀我演呢個性格同自己差咁遠嘅角色！」

直筆甩拒性感

外表乖乖女的馬賽認為「正氣」一詞更適合自己，閒時愛鑽研星座的她笑說：「某方面我係典型嘅獅子座，好有原則！」家庭背景造就其性格，公公是前軍人、爺爺嫲嫲是大學教師、媽咪愛傳授書中大道理，闔家「正氣」的馬賽在中學時已兼任班長及風紀兩職。自言性格「直筆甩」的她，問到如何處理與公司的分歧？她說：「真係冇咩唔鍾意嘅工作！So Far都幾舒服，但我唔會行性感路線同泳衣騷！」她大呻最難過是去年無辜捲入富豪飯局風波：「總之清者自清！」

後記：愛情，當係奢侈品！

目前單身的馬賽追求工作多於愛情：「拍拖其實好嘥時間，當然好開心，好似嗰晚見到栢芝同霆鋒喺金像獎度真係好Sweet，不過感情要付出好多時間同承諾，對我嚟講係奢侈品！（唔Dry？）拍劇都有感情線，OK滿足嘅！」

正在浸大讀Part-time課程的馬賽，認為進修是Life-long目標。

《女王辦公室》

乖女上位好Easy

陳茵媺
2006年港姐冠軍陳茵媺為拍劇剪短多年長髮，並於09年台慶勇奪「飛躍進步女藝員」獎。

苟芸慧
2009年國際中華小姐冠軍苟芸慧對性感冇Say No，難怪獲無綫安排一連接拍數套新劇！

鍾嘉欣
2004年國際華裔小姐冠軍鍾嘉欣，乖女形象深入民心，拍劇唱歌雙管齊下。

陳鍵鋒出走

現實總是諷刺，當媽咪在電視機前追看無綫劇集《洪武三十二》中的陳鍵鋒（Sammul），爸爸則在報章中看見他宣傳亞視節目，與此同時，細佬妹在網上重溫他接受有線訪問狂數娘家不是。三種不同媒體，出現同一個有血有肉的人，Sammul先贏一仗！流了三色血多年，在木人巷中練就一身好演技，縱然已跟娘家說ByeBye，Sammul依然無憾：「我喺TVB好乖o架！聽教聽話，幾乎乖到冇朋友！唔係，呢度我有好多朋友，陳總（陳志雲）都對我好好吖！」

「真係做到嘔拔甩」

可惜Sammul口中的「乖孩子」終究選擇離開，並娓娓道出「我在娘家做到嘔拔甩之謎」：「我未走之前已經返內地拍劇，但大家都係拍兩組戲，點解一邊只得攰，另一邊就有得休息？雖然唔係叫你拍藝術片，要有百分之百精神拍啲高度極致嘅作品，但我哋都要向觀眾交代，點解冇時間休息先？冇精神狀態點會拍得出好嘢先？唔明點解返內地拍戲會畀到時間你休息，既然係咁，我身心冇必要承受呢啲身心壓力？」他續說：「有時真係做到『嘔拔甩』，唔係真係嘔，但真係好攰，攰到無時無刻都想瞓覺，第二日又驚自己一睡不起！記得嗰陣做《學警》，體力勞動好大，一有時間就喺長枱度瞓，我同Ron（吳卓羲）、阿Fi（薛凱琪）出去跑完一輪，唔使埋位又瞓過，收工第二朝返嚟，又做番同一樣動作，Oh My God！」

拒淪為井底之蛙

Sammul是一個實際的人，認為勞力與薪酬成正比，偏偏事與願違：「內地拍劇人工好夠我使，唔使再驚供唔到車同樓，又唔使再驚畀完家用阿媽，自己冇錢用！諗番當日TVB某某喺房畀張約我簽，我話咁多頁紙仲要係英文，應該畀我返屋企研究吓，點知第二日佢哋要我即刻決定，我話人生大事喎！畀我再考慮吓！之後佢哋就冇再搵我喇！其實都唔係唔好，我依家過得好開心！」

談到外面世界的自由，Sammul不期然嘴角上翹，但說不出「出走」這顆靈丹妙藥如何舒適受用：「其實以前都好舒服，但離開好好多，起碼唔使見到啲自己唔鍾意嘅同事，可以見到井外嘅製作係點，唔同嘅！夏蟲不可語冰！」

後記：視帝，幾時輪到我？

錢與視帝如何抉擇？儘管有人說兩者掛鈎，但Sammul再顯實際本色：「食飯仲緊要！做視帝有名然後搵得多，但視帝每年只得一個，幾時輪到我？依家唔搵多啲，唔通捱到做視帝先搵咩？不過我出去闖都有風險，好似買股票咁有可能失敗！」

陳鍵鋒毅然離巢尋找「更好」的選擇，孰好孰壞，他日自有定論。

親生仔女Come Out

周潤發
曾拍攝不少膾炙人口電視劇的發哥，毅然加入影壇，最終成為神級影帝。

佘詩曼
有傳阿佘獲內地片商以逾千萬人仔斟跳槽，改以部頭形式跟無綫合作。

陶大宇
曾是「師奶殺手」的大宇，因不滿娘家制度，終出走到內地發展。