純純兔喊晒出櫃博翻身 汪子琦寸馬賽設計佈局：你謊話連篇
到底是純純小白兔，還是披著兔毛的狐狸？
這邊廂純純兔被汪子琦舊愛、富婆Laura大踢爆，指純純兔如何不擇手段，部署埋身趁歐遊之旅搶佢嘅另一半(仲要係成個旅程成40萬都係Laura俾錢)；當純純兔知道Laura已得悉佢汪子琦關係後，馬上微臉，更好得戚咁同Laura講：「汪子琦同我一齊好開心，你退出啦。」Laura反問佢:「我點解要放手？」純純兔就話：「佢都唔愛你，仲同佢一齊做咩呀！」嗰刻汪子琦好尷尬。以上一番話都係Laura爆料，更直指對住純純兔感心寒。
Laura爆完料，純純兔汪子琦一度於微博互撐，及後純純兔更發表「寬恕論」，嬲到Laura話:「佢有咩資格講寬恕？係都係我講啦。」更發表啜核言論反擊：「食turkey（火雞）都唔使咁貴！」早前更有報道話，獨霸水喉後，有指純純兔馬賽每月獲發家用20萬；新加坡遊山玩水期間，更被發現喺在當地賭場豪賭外，更還處心積慮，圖謀千萬半山豪宅。
據報道話，純純兔同身邊朋友透露，謂覺得自己出到嚟、只要肯低聲下氣同大家講番幾句類似「認錯」嘅說話，觀眾又會接納番佢。果然，噚日純純兔同媽媽及樂小姐一齊做訪問，動之以情流埋黑色的眼淚博取同情，係咁話「所有啲嘢都已經過去咗」，又強調自己已經放低咗，只係希望復工。又話反思過後覺得係自己任性同處理不當。至於再追問到同汪子琦關係，純純兔馬賽死都係嗰句:「所有嘢已經過咗去。」講到咁盡咁絕，無非為咗聽日出席慈善活動騷復活「出櫃」而已。
汪子琦當然亦知道純純兔發表呢番「認錯」宣言，今早汪子琦於微博寫道:「曾以為最是真心載不動，可是奔赴千里之後，才發現不過是一場設計，這三個月我付出的真心、無微不至地照顧換回來的不過是你的謊話連篇！這幾年我已經慢慢學會接受，接受意外，接受現實的殘忍和人性的殘缺。心痛絕望…但我真的很對不起Laura！因為懂得，所以慈悲，不是每個人都有資格說的！」
最最最寸都係最尾一句，事關呢句「因為懂得，所以慈悲。」係兩人戀情被爆、純純兔馬賽潛水一周後、於微博引用張愛玲金句咁寫，仲貼咗兩隻熊熊公仔，象徵「一男一女」；而今汪子琦寸爆有人講大話之餘，仲大巴大巴「車」埋去話：「因為懂得，所以慈悲，不是每個人都有資格說的！」好狠呀。有網民就回應謂:「因為懂得，所以慈悲，不是每個人都可以說，難道你就認為自己可以說出來嗎？」汪子琦回應道:「我也沒資格，因為我傷害了我前女友。」
網民(即使唔太多)紛紛留言謂:「不如找個單純的人好好的對！」、「即使傷害過，但現在還是真心的話，努力把她追回來，相信她會感受到的。」、「你跟Laura才是天生一對，快追回她！以後永不分離 。」
擺到明純純兔同汪子琦就係各取所需，一個想出(雪)櫃搵真銀；一個想同Laura復合囉。
汪子琦今早開腔狂寸馬賽。花生已備。
談及多角戀 馬賽欲哭無淚
今日馬賽為歡樂滿東華做採排，採排之後由曾醒明陪同之下出嚟接受傳媒訪問，問到佢最近嘅同性戀、多角戀、小三小四嘅事嗰陣，馬賽嘅仲情緒非常激動，欲哭無淚咁，即場好似喊唔出咁喎。
馬賽接受傳媒嘅訪問，激動落淚。
之前仲去採排東華嘅表演。
之後就開始要喊喇。
無淚馬賽為「斷章取義」道歉
晚上純純兔現身電視城出席東華綵排，曾醒明都有現身陪佢。馬賽一出嚟，就已經蘊釀要喊——第一件事，就係前一日仲話傳媒「斷章取義」，翌日就成個封面出晒嚟，同汪子琦激吻斷正，故馬賽即被網民狠批講大話唔眨眼。
馬賽一出嚟就話:「我之前喺處理呢單新聞嘅時候，好多做得唔夠好嘅地方，譬如第一次見傳媒，好驚好緊張，em……em……(開始哽咽)其實我一直都係一個……唔係好……唔係好…善長言辭嘅人，我第一次出嚟嗰陣，唔係有心講一啲令大家唔舒服嘅嘢，而係我好驚……我當時唔知點應付，亦好驚講錯一啲嘢令屋企人唔開心，令屋企人擔心。所以用咗一種唔適當嘅態度同言辭去………去應對傳媒，係我做得唔好，非常之唔好意思。」
馬賽又哽咽謂:「我都知道自己任性嘅行為傷害咗好多人，我……em……所以我依家係諗得好清楚，我自己……到底係想點樣。我依家只係想重新投入工作，喺公眾場合會注意自己言行。」
自責太任性 馬賽認同TB汪分手：我唔想再講嘢傷害人哋
之前馬賽流黑淚話同汪子琦已經成為過去，但今晚馬賽被問到是否同汪子琦已分手？佢話:「其實我哋……em……曾經係好好嘅朋友，咁依家所有嘅嘢都結束咗，過去咗，em……(點解會結束？因為關係曝光？)em……其實所有嘅嘢……我自己……都好任性，處理得好不當，對好多人，朋友又好，家人又好，我自己，公司，都做成好多傷害。所以…依家所有嘢都過去咗結束咗，希望自己可以重新pick up番自己嘅生活同工作。」
問馬賽是否因為工作而放棄呢段感情？佢就話:「唔係好似你哋所講咁樣，而係……我嘅行為已經傷害咗好多人，所以……我覺得自己係要………（停頓)………我唔想去講一啲說話，傷害人哋，但件事過咗就係過咗，我亦唔想評論呢件事，任何人，希望大家可以俾機會同時間，可以重新過番我嘅生活。」
封嘴拒認同性戀：真愛無分性別
問馬賽是否不願承認自己係同志？馬賽話:「em…………感情嘅嘢係好私人嘅事，希望大家俾啲空間我。」歎了一口氣再謂:「過去嘅嘢唔想再評論。」問道是否剛取消關注汪子琦？佢話:「希望大家仲係朋友，希望佢好。」那如今性取向為何？馬賽表示:「我覺得其實真愛係唔分性別年齡同階級，只要係真心相愛，都值得俾世人尊重同祝福。」
之後馬賽又想喊咁話:「傷害到我屋企人，好對唔住，我會俾心機工作。」但即使同汪子琦拍拖，亦屬人之常情，何「傷害」之有？馬賽再度第N次回帶:「係我嘅行為，我嘅任性，我嘅處理手法唔恰當，令我屋企人非常擔心同緊張，佢哋都承受好大壓力。」馬賽係咁「呻鼻」好想喊想喊，但都唔係好見到眼淚，又話未知公司有咩工作安排俾佢。
汪子琦微博喪鬧 馬賽慘慘豬哭不出聲：我祝福佢
問馬賽可知道佢嗰篇流黑淚講分手報道一出，汪子琦即於微博鬧爆佢？馬賽又支吾以對謂:「唔……唉……我唔想去講一啲傷害人嘅說話。(你有冇睇？佢話成件事都係你設計)em……其實我…我…我(又開始哽咽)噚日嘅報道都話我已經放低咗，咁今日都有好朋友同我講(汪子琦微博)。真正嘅放低係睇唔到聽唔到同埋詞唔痛，咁呢句說話我希望自己可以做到，我祝福佢，我希望佢一切都好。」
是否分手過程不愉快？馬賽再話:「一切已經過去咗喇，我希望佢，一切都好。」汪子琦話自己傷痛欲絕，馬賽再話:「一切嘅事已經過咗去……夢醒了，所有嘢都結束咗。都係我自己唔好，希望佢好啦。」至於是否公司施壓？佢就話唔係。