陳倩揚頂替張舒雅：我覺得賺咗！

新一屆港姐又來臨，貴為2008年港姐亞軍的陳倩揚，以師姐身份勉勵準佳麗要裝備自己，切忌作狀及扮嘢，她表示獎項只得幾個，最緊要享受參選過程。

陳倩揚自言是拍劇「超級初哥」，故她要加倍努力鑽研劇本。

陳倩揚（Skye）是2008年香港小姐亞軍，亦是近年「最忙碌的港姐」，除了要履行本身的職責外，Skye還幫手「頂替」該屆「Hea爆港姐」冠軍張舒雅的工作。難得做了雙份工作的Skye性格樂觀兼表現大方，她說：「唔係計較，我本身EQ都高，係我做空姐時訓練出嚟，我唔覺得辛苦或者好委屈，反而多咗好多經驗，加上爹哋教落，做人唔好怕蝕底，要抵得諗，所以我覺得自己賺咗。」

陳倩揚勉勵新一屆港姐要享受參選過程。

初嘗感情戲

新一屆港姐選舉又殺到，身為師姐的Skye送贈錦囊妙計給眾師妹，她說：「要裝備自己，但唔好太作狀或扮嘢，做番自己最緊要，我成日袋住『將心比己』同『相由心生』呢兩個金句，獎項都係得幾個，最緊要享受參選過程。」

Skye近年主持《東張西望》，表現不俗，最近她有新突破，便是處女下海參演古裝劇集《洪武三十二》，與馬德鐘及徐子珊等好戲之人合作，戲中她與馬德鐘有不少對手戲及感情戲，令她倍添壓力，她說：「都驚到瞓唔着，依家喪刨劇本同煲其他古裝劇，我平時講嘢都幾快，但今次套劇講對白嘅節奏要慢啲。」

五年內結婚

另外，自言是工作狂的Skye，與男友感情穩定，入行至今與緋聞絕緣，她笑稱：「我冇緋聞磁場。（工作忙到令男友詐型？）咁又冇，大家各有各忙。（結婚？）五年內啦。」

採訪：German

攝影：沈健程

髮型：Match@Hair（又一城）

服裝：Luvlicious

袁偉豪首拍古裝呻苦

07年《香港先生》冠軍袁偉豪最近忙於拍攝無綫新劇《洪武三十二》，與謝天華、馬德鐘、徐子珊、江若琳等合作，首次參演古裝劇的他坦言很辛苦：「劇中飾演一名將軍，每日都要着住一件超過十磅重嘅盔甲，加上天氣熱，經常大汗疊細汗。」

袁偉豪入行兩年多，今年終於有機會參與古裝劇集，令他大感興奮。

偉豪透露為保持最佳狀態，即使不用開工仍會努力做運動，現在已練到六舊腹肌：「新一屆《香港先生》就快招募，早前先同高鈞賢、黃長興等拍宣傳片，希望吸引多啲型男參加。」

對於黃長興傳緋聞，偉豪表示不擔心影響《香港先生》形象，他說：「希望大家多啲留意我哋工作，呢啲花邊新聞只係當宣傳。」

服裝及場地：Miss Sixty

陳倩揚粉紅家居滿書香

香港小姐陳倩揚最愛粉紅色，故此家居也以粉紅色為主，由床單、地氈、書架、甚至連廁所也是粉紅色，十分鮮艷。

陳倩揚將港姐后冠放在家中。

由細到大都愛看書的陳倩揚，在客廳特別闢出一角用作「刨書」，她說：「媽咪話我細個時成日拎住本書，睇書已成為我生活習慣，所以將廳嘅一角裝修成小型圖書館，可以隨時閱讀。」

陳倩揚最愛在家中的小型圖書館「刨書」。

陳倩揚近期除了忙於主持《東張西望》外，亦投入演出古裝劇《洪武三十二》，為了準備首次拍劇，近日在家狂煲一套類似故事背景的內地劇集，實行做足功課。

陳倩揚平日雖然工作繁忙，但都盡量抽空自己煮食，她說：「通常夜晚先開工，所以朝早都會自己煮嘢食，咁樣可以食得健康啲，平時亦鍾意研究新菜式整畀父母食。」