陳倩揚早前試戴鑽飾，務求在無綫台慶頒獎禮當晚令人眼前一亮。

今年娛樂圈可謂喜事重重， 08年港姐亞軍陳倩揚宣佈與拍拖 8年的科學家男友陳浩然下月 4日結婚，她在結婚翌日舉行的台慶頒獎禮又獲提名飛躍進步女藝員，可謂雙喜臨門。日前她更大讚準夫婿懂包容別人，讓她明白愛一個人是可以無條件的。

陳倩揚日前在中環為下月 5日舉行的台慶頒獎禮試鑽飾，當晚她會佩戴一套近千萬元的首飾。談到角逐飛躍進步女藝員，她笑說：「其實我都係去到記者會先知入咗圍，嗰一刻真係好開心，對我嚟講覺得係一個肯定，即係公司認同呢個人嘅努力，有冇獎都唔諗咁多，可以扮靚靚出席，喺現場感受吓緊張氣氛已經好好，我入行日子尚短，但有好多唔同機會，好似大騷嘅司儀同埋平時嘅司儀工作，我有提名當自己贏咗，其他嘢冇特別去諗，咁啱我係 4號結婚， 5號去頒獎禮當係 afterparty。不過爹哋媽咪知道都好開心，我老公話直頭係雙喜臨門，仲開心過我。」

陳倩揚與男友下月 4日拉埋天窗，晚上會筵開 15席宴請親朋。資料圖片

獲提名飛躍進步女藝員的倩揚，坦言有提名已經心滿意足。

曾為參選港姐冷戰

倩揚細心挑選首飾出戰台慶頒獎禮。

講到準夫婿陳浩然，陳倩揚不時流露出甜到漏笑容，問到待嫁心情，她甜甜地說：「我唔係太緊張，我哋習慣對方喺身邊嘅感覺，其實我好耐之前已經諗結婚，我哋不停有溝通，佢全部細節都記得，所以我係零煩惱，從呢件事我更加肯定佢係好好嘅人。」倩揚透露婚禮分兩部份進行，下午邀請親戚朋友觀禮，晚上會擺 15圍宴請親朋長輩，希望多點時間與親友相處。
早已認定男友為終身伴侶的倩揚，原本計劃待男友在美國畢業回來便結婚，但因為參選港姐關係，令婚禮延期進行，她說：「佢唔明白我點解要參加港姐，知道呢件事後都有一段冷戰期，但我個心只係好簡單想去試，我試吓啲新嘢去擴闊自己眼光。」

「冇人似佢咁包容我」

倩揚續說：「基本上我平時做乜都會同佢講，慢慢佢都覺得我冇變到，仲為咗我覺得自豪。我都知真係好肉麻，但我真係真心，我覺得除咗爹哋媽咪外，真係冇人好似佢咁包容、識得欣賞我。喺佢身邊你會覺得真正愛一個人係無條件。」
採訪：何慧斯
攝影：陳順禎
髮型： Tonnis of HAiR
珠寶提供：帝皇翡翠