林峯、吳千語、徐子珊及盛君等，噚晚到銅鑼灣出席《詭嬰》首映禮，大會刻意分開一對情侶，令佢哋冇機會同場，只喺祝酒環節時，兩人先齊齊現身，不過佢哋表現唔算親密，仲煞有介事避忌分到好開。

影相時被安排輪流影相，即使二人表示唔介意合照，等大會安排，但助手就刻意拉走吳千語入後台，好彩林峯最後都大方拖住吳千語出嚟影合照。

當吳千語獨自影相時，現場有個戲中出現嘅Jimmy公仔，突然跌落嚟撞到吳千語個頭，佢即笑言：「隻Jimmy又嚇我，拍戲時都成日嚇我。」

林峯和盛君一起接受訪問，問到佢同吳千語係咪因為拍呢部戲撻着？林峯話：「唔係呢套，唔講呢啲。之前為部戲去咗幾個地方宣傳。」提到同吳千語喺現場欠交流，佢就否認，更指好正常，記者指佢同女友穿上以情侶裝亮相，佢話：「冇夾過，我自己有贊助，佢都有，咁拍鬼片，黑白色就冇錯。」

有指林峯日前到順德宣傳，順便帶女友返鄉下見家長，佢就話：「我鄉下係廈門，不過我噚日有去廈門，但親戚喺晒香港，嗰日只係帶工作人員食餐飯。」

之後吳千語同徐子珊一齊受訪，問吳千語係咪拍呢部戲同林峯撻着？佢話：「唔係呢套，我識佢係《男人如衣服》，呢套係成年前拍，呢啲唔講，我今日係演員身份宣傳部戲。」佢亦否認日前同男友返鄉下見家長。係咪因為喺香港見得太多？佢就話：「呢樣嘢唔答，今日係演員，唔覺避忌，我係演員身份宣傳部戲，唔關事，咁0依家好多人，平時點會有咁多人，唔好講呢啲，講首映啦。」

剛於本月27日生日嘅吳千語，因為忙為電影宣傳，所以生日冇特別慶祝，仲大呻話：「呢個星期好攰好忙，做完嘢先慶祝生日。」千語亦唔肯回應男友當日有乜表示，只強調個個都有同佢講生日快樂。

而子珊就話拍攝時唔知道林峯同吳千語是否已拍拖，因為佢大部份戲都係同林峯做對手戲。