少女時代Jessica 機場被撞暈倒受傷

韓國爆紅組合少女時代(少時)噚晚喺亞博館開完第二場演唱會後,即刻漏夜趕搭飛機返首爾,有500粉絲去送機,包括接機當日已經現身嘅鬆弛熊、軍曹都有去送機。少時見到班粉絲咁有秩序坐喺地,都行慢兩步同大家say bye,Jessica仲好開心咁笑晒。

不過一入禁區就出事喇,據知有熱情粉絲買埋機票跟埋入閘。佢哋想行埋去少時度,喺混亂之間,有保安竟然將Jessica認錯做粉絲,一手將Jessica用力一推,有說係推咗落地;亦有傳正確版本係推咗Jessica埋欄杆,仲有在場fans話聽到好清脆嘅撞欄聲。

噚晚傳出呢個消息嗰陣,震動互聯網,不少少時歌迷都好擔心,而且各路傳聞亦傳之不絕,有人話Jessica係搭扶手電梯時,下面擁著一堆fans,少時一落嚟,大夥兒即一擁而上,混亂間Jessica就跌咗落地。亦有fans表示,於網上睇到一條現場片段,謂事發時聽到一聲女聲慘叫,未幾就見到Jessica瞓咗喺地,身形蜷曲,動彈不得,要人扶起,再坐咗一陣先至勉力起到身。有指當時由經理人扶上機,亦有傳Jessica需要人孭住上機,情況令人擔心。

今朝凌晨近5點,少時返到首爾,經理人話Jessica冇乜事,不過就自己搭車走先,而隊友允兒、秀英、泰妍等等出閘時,唔知攰定擔心Jessica,面色都唔係咁好。

【少時又出事】Jessica傳遭保安用力推 撞向欄杆倒地一分鐘
少時來港此行真箇多災多難,先是泰妍夜蒲仆落垃圾堆,跟住輪到Jessica被推跌,倒地一分鐘起唔到身。

Jessica入閘前仲好好地。(攝影:梁婉霞)

鬆弛熊都有去送機。(攝影:陳慧安)

事發時,有指Jessica被保安誤當成係fans,一手推落地,亦有指佢搭扶手電梯、抵達樓下時被fans圍堵,結果出事被跌跌。

倒在地上的Jessica,動彈不得成分鐘。

工作人員扶起Jessica


返抵韓國嘅允兒同秀英, 面色麻麻。

Sunny同泰妍今朝返抵首爾。