無綫福將馬浚偉（馬仔）去年寸爆無綫，最後更離巢北上搵銀，不過今日有報道就話馬仔今年五月會返娘家拍劇，報道指無綫現正鬧小生荒，加上馬仔本身北上掘金成績未有如期般咁理想，呢年來只係拍過兩部劇，對比起劉愷威同陳鍵鋒仲差一大截；雖然有傳佢會過檔王維基，但o依家個電視牌照又未搞掂，令馬仔大失預算。

不過報道話無綫高層曾勵珍力邀馬仔回巢，除咗有人工加，即係劇酬由以前一萬元一集，增加到三萬元一集外，馬仔可以任揀女主角同佢拍劇，仲話佢已選定視后楊怡做拍檔添，而最最最緊要係，今次回巢馬仔有望力爭視帝一獎，條件咁好又有誠意，馬仔爽快答應。

另外，馬仔早排投資六位數俾妹妹Fiona開補習社，日前舉行開張儀式，馬仔都有出席，仲搖身一變成為如假包換嘅馬校長。

報道話馬仔（右）五月回巢TVB，同楊怡拍劇。（資料圖片）

「馬仔套新劇係材叔（梁材遠）監製，係30集嘅時裝劇，講家族恩怨。珍姐知馬仔恨做視帝好耐，於是俾佢揀新劇拍檔。咁馬仔一揀就揀楊怡做女主角，一來兩人friend底，二來楊怡係出爐視后，馬仔覺得拍住佢，爭視帝有着數。至於『男二』，馬仔就揀咗同樣有收視保證嘅歐陽震華同當紮嘅黃浩然。」知情者說。

對於馬仔重返娘家，珍姐大開綠燈：「一直有同馬仔傾，佢係福將，收視有保證！我一向都好想馬仔返嚟o架！」監製梁材遠亦露口風：「我喺五月開新劇，都想馬仔拍到o架！」而將返無綫的馬浚偉則大賣關子：「未落實o架，要睇劇本，都唔係冇機會嘅！」