馬浚偉憑《老友狗狗》「躝坦」一角爆紅後，劇接劇不特止，又主持飲食節目，工作無間斷，休息時間已經唔多，趕拍新劇《隔離七日情》期間堅拒用替身，大部份危險動作均親身上陣，搵命博，結果扭傷右腳踝及右手腕舊患，驚請假會阻礙拍攝進度而硬撐開工的他，至上周五才忍痛求醫，被跌打醫師捽手腳時，馬仔面容扭曲，食得鹹魚抵得渴，你好嘢！

捱足個多星期，上星期趁《隔離七日情》煞科，馬仔即上《勁歌金曲》獻唱《蒲松齡》主題曲，翌日又為《無間音樂》節目錄影，做唔停，其間已面露難色的他，明顯腫痛難忍，錄影後，急搭的士到旺角山東街「梁華勝跌打醫館」求醫，見他行路一拐一拐，狀甚痛楚。

需休息三星期

醫館內，馬仔笑着跟醫師講述手腳痛楚情況，又聽從醫師吩咐在館內來回行走兩圈，擺動手腕，然後靜坐醫館一角接受治療。

記者以顧客身份入內，見馬仔強忍痛楚，捽完腳再捽手，痛到唔想郁，為放鬆自己，馬仔主動跟醫師說笑，但當聽到要戒口及休息三星期時，馬仔反應甚大地說：「三個禮拜？點得呀！」治療後，休息約半個多小時才包紮離開，為免病情惡化，馬仔動作緩慢，打的返家。

「唔想老來先後悔！」

事後，馬仔被追問求醫一事顯得十分愕然，但仍大方接受訪問說：「早幾日拍追逐對打戲，個武指踢腳我用手擋，就係咁傷及右手腕舊患，之後緊接拍樓梯追逐戲，跳樓梯，扭傷埋隻腳，腫起晒，自己真係唔想阻礙拍攝進度，只要唔掂嗰個位就唔痛，咪忍幾日先囉。」

拍劇受傷有先例，曾於06年拍攝《天機算》期間撞爆右眼的馬仔完全唔錫身，劇中飾演神偷飛簷走壁仍拒用替身，「唔想老來先後悔，觀眾有眼睇，替身上陣係睇得到。」

講真，之前有場戲喺天台個工字鐵上做一個旋轉動作再飛落對面樓玻璃，有成8層樓高，都幾危險，撞玻璃嗰下就用替身，其他動作就自己做，屋企人無詐型，工作嘛，自己小心啲。」馬仔笑言已為自己買重保險，加上自己小心注意，問題不會太大。

※馬仔拍《隔離七日情》，完全唔錫身，危險動作唔用替身，早前左腕受傷的他仍未知驚，堅持親身上陣賣命拍劇。

※工作無間斷的馬仔，在跌打醫館休息半個多小時才打的返家，右手腕、右腳踝均紮上紗帶。

※馬仔（右）面露難色，明顯腫痛難忍。

※馬仔拍劇親身上陣，結果扭傷右腳踝。

※包紮後，馬仔忍痛獨自離開。

※馬仔向醫師講述痛楚情況。

※火場戲不用替身，馬仔左手差點燒傷。

※劇中有一場戲在樓高8層的天台工字鐵上做一個旋轉動作，再飛落對面樓玻璃。