《守業者》連環出事 馬浚偉中槍破相

無綫套新劇《守業者》好似幾多災多難咁,前晚男主角馬浚偉拍一場動作戲時,同對手對打,點知俾支槍掟中左眼角同個鼻,即時爆缸見血,嗱嗱聲入醫院照X光,證實有兩處骨裂。除咗馬仔外,之前女主角楊怡早前都自爆瞓咗兩日醫院,原來係因為頸椎有事,痛到郁唔到。

受咗傷嘅馬仔要停工休息幾日,等個鼻冇咁腫至可以開番工,噚日佢喺電話度話:「真係意外,唔會怪任何人,原本我係要踢開對手把槍,點知佢手指尾勾住把槍,連槍揮拳打落我塊面,即刻流晒血。」痛到入心嘅馬仔慶幸今次只係傷咗左眼,如果打中右眼就大鑊,佢話:「拍《勇往直前》時撞甩過右眼視網膜,如果今次再傷右眼,我諗我要同隻眼講拜拜,要退出娛樂圈。」

《守業者》連環出事 馬浚偉中槍破相
■馬浚偉眼同鼻都受傷,佢話已經好感恩唔係撞到右眼,否則隨時變盲。


■馬仔同楊怡都要入廠修理,唔通真係守業更難?
微博圖片


■《守業者》開拍以嚟,多位演員出事,真邪!
資料圖片

嚴禁打乞嚏

呢幾日馬仔要小心養傷,甚至連乞嚏都唔打得,因為眼角嘅小小疤痕容易搞掂,但鼻骨處理得唔好就會歪,馬仔最自豪有個靚鼻,所以要好好保住。其實除咗佢同楊怡有事,同劇嘅曹永廉又經常話只得三幾個鐘瞓,問到馬仔覺唔覺呢個劇阻滯多多要再拜神?佢笑住話:「我信教已經祈咗禱,但如果其他同事覺得有需要咪做囉!都係咁啱咁橋啫,可能個劇叫《守業者》,正所謂創業難,守業更難嘛!」

另外,同劇嘅麥長青(麥包)前排屋企又燒fuse,搞到屋企冇電,佢就話小事:「唔覺個劇多阻滯,不過如果同事覺得有需要咪再拜神囉,總之大家開工都小心啲。」