靚太回春 48歲溫碧霞狠打百支美容針

打美容針回春風靡社交圈,唔少名媛靚太趨之若鶩,不過好多都係夠膽打冇膽認。
48歲的溫碧霞屬美魔女一族,以往靠做瑜伽、跑步保青春。不過歲月催人,她眼見皮膚日漸暗啞兼出細紋,最近索性豁出去,接受多個醫學療程,狂打百支美容針保靚樣。
她大方認打針︰「其實大家都追求靚,依家打針好普通,主要針對皮膚保濕、增生骨膠原,只要令皮膚更靚,我唔介意。」不過,打成一百支,係咪誇張咗呢?唔通㗎?女人為咗靚,真係乜都肯制。


額頭
透明質酸飽滿額頭、填充太陽穴
微針射緊膚去額紋


Botox去魚尾紋
微針射緊膚去眼紋
透明質酸撫平淚溝


聚焦超聲波全面提升
激光去斑嫩膚
透明質酸保濕針

下巴
Botox醫學 V面

每個人對靚都有唔同標準,一班貪靚名太,當然不容許面上有小瑕疵。出名保養好的溫碧霞,多年來身材、靚樣變化不大。步入 48歲的她,最近更接受多個醫學療程。「女人都係貪靚,就算好少細紋都想整走佢。依家到咗呢個年紀,加上工作咁忙,皮膚質素已經無以前咁好,暗啞之餘又容易乾,輪廓都開始鬆弛,冇以前咁 firm。」


12年鬆弛
面額飽滿的溫碧霞,面珠肌肉鬆弛,形成多嚿肉。

08年現眼袋、虎紋
溫碧霞原先皮膚緊緻,不過經常捱夜,眼袋及虎紋較明顯。

打針前驚青

人人尋找凍齡秘方,溫碧霞指湯水、運動最有效,不過最近做埋美容集團 Dr Reborn代言人的她,大條道理變靚。「其實講整容實在太誇張,依家叫『微整形』,係用高科技幫自己搵番後生時嘅輪廓,令皮膚回復彈性緊緻。」 3年前曾經表示不敢打針扮靚的她,今次接觸 7種美容療程,豁出去打百支美容針,令皮膚保濕、塑造突出輪廓。「做呢啲療程我自己覺得有需要,亦係專業醫生嘅建議。不過我打保濕針之前都有掙扎,真係好驚,因為以前會覺得打針好痛,點知原來好簡單。」


出名貪靚的溫碧霞,拍廣告期間,不時加意見,每個造型都親自影低。

溫碧霞對變靚效果非常滿意,更自誇話︰「做完感覺好好,好似去番以前細個。」

抗拒變樣

醫學美容漸趨普遍,溫碧霞由激光去斑、超聲波緊膚,到打保濕針、透明質酸、 Botox等,愈試愈多,不過她抗拒整容。「我個樣咁多年大家見都係咁,唔會諗去整,反而保養皮膚要 keep住做。咁多人整容可能對自己個樣唔夠信心,如果整完覺得靚咗、自己又開心嘅,何樂而不為啫!最緊要唔好過量,整到完全唔係自己個樣,咁就死!」她指變靚要適可而止,但貪靚卻要永無休止。「女人要錫自己,幾多歲都要靚,唔可以話結咗婚就咩都唔理,永遠都要係最好狀態。我老公都覺得我愈嚟愈靚。」一句講晒女人要自強。


22吋纖腰
溫碧霞多年來以多菜少肉方式 keep fit,加上每周定期做瑜伽,她穿起晚裝裙拍廣告時,條腰幼到條裙要加夾。

跌膊騷腿
溫碧霞有不少惹火造型,當中着短褲仔的她,出埋招牌跌膊,相當誘惑。

敢打敢認

打針美容愈見普及,除了溫碧霞「微整形」變靚,亦有不少名太認有打針美容,齊齊防腐保靚樣。

羅霖蛋白線 V面
「我想塊面尖啲上鏡啲,揀 Ultra V,醫生打咗 70幾條線喺我塊面同頸。蛋白溶線好幼好短、會被身體吸收,又會刺激膠原蛋白增生,可以 keep兩年。」

周美鳳 botox去紋
「只係打少少 Botox,眉心 4針、眼尾 3針。我只係見啲紋深咗先去整,等個人精神啲。打 Botox唔可以貪心,愈打愈多只會令塊面硬,連表情都冇埋。」

陳君宜乳酸美肌
「女人一過 30歲皮膚就向下垂,初初都怕痛驚打針,不過要靚梗要犧牲少少。打 Sculptra(膠原漸生)令皮膚滑啲,最明顯係眼,黑眼圈都冇埋。」

視頻:靚太博回春 溫碧霞狠打百支美容針