淘金7年覓真愛 葉翠翠帶半億嫁熟男

出名眼角高、男友非富則貴的葉翠翠,因 08年內地富豪男友黃有龍的關係, 7年內已袋半億。「麵包」填飽肚後,葉翠翠煞停釣金龜步伐,轉向去尋求真愛。

近期,葉翠翠跟年約 40歲的熟男打得火熱,據知男友名叫 Raymond(周曉東),是一間建築師公司副董事。雖然對方只屬中產,但勝在夠真心,對女友如公主看待。上周一連兩晚,記者發現二人拍拖撐枱腳,其間又咬耳仔又拖手,關係呼之欲出。現時戀愛大過天的葉翠翠,回應時更首度確認男友身份,並坦承:「佢改變咗我好多,會考慮同佢結婚。」 33歲,終於有嫁期。

淘金7年覓真愛 葉翠翠帶半億嫁熟男
摸黑拖手
一直堅稱自己是單身的葉翠翠,當晚趁着夜闌人靜,終放下防線,與 Raymond十指緊扣漫步街頭。

淘金7年覓真愛 葉翠翠帶半億嫁熟男
現年 33歲的葉翠翠,經歷多段感情,終搵到下半生依靠。日前她更向本刊坦言有意和拍拖一年的 Raymond結婚。

日前葉翠翠在訪問中坦言在愛情路上曾受重大創傷,「去到呢個年紀唔可以亂選擇。以前會心急結婚,但依家想要一個真心同自己發展嘅人,所以要了解耐啲。呢行好容易吸引花心男,我以前都遇過,玩唔起。」葉似乎是暗示當年與大陸富商黃有龍的一段情。當年葉翠翠與黃拍拖期間,男方暗溝趙薇,更珠胎暗結,翌年在新加坡秘婚,哄動一時,翠翠慘成大輸家。

有樓揸手唔憂揀

自黃有龍後,葉翠翠與「金龜」可謂結下不解緣,身邊男伴全部非富則貴,就算不是富豪級數,也是大律師、地產界高層等專業人士,個個揸名車、住靚樓。一位葉翠翠閨中密友透露:「黃有龍當時現兜兜俾咗兩層加埋 3千萬樓俾翠翠,基本上翠翠已經唔使做,前年翠翠見價啱,就賣咗一層,加埋佢之後買嘅日出康城大單位,同投資基金股票都有斬獲,磚頭加現金已經過半億,咁疊水都唔使再靠男人幫啦。佢同我哋講,依家最想搵到個錫佢嘅人,下半生有個依靠就得啦!個男人有冇錢反而係其次。」

淘金7年覓真愛 葉翠翠帶半億嫁熟男
13/12拍拖整盆栽
葉翠翠和男友 Raymond當日拍拖到中環 PMQ一間售賣小擺設的店舖學盆栽設計。有共同嗜好,認真夾。
淘金7年覓真愛 葉翠翠帶半億嫁熟男
含情對望
二人飯後揸車到金鐘超市掃家品,其間繼續旁若無人打情駡俏。

主動錫面
超市臨近收舖,店內客人寥寥可數,葉更忍唔住錫男友面珠,冧到暈!

買餐具煮飯仔
平時喜愛下廚的葉翠翠,當晚便跟男友主攻貴價鑊和湯煲,為做人妻做好準備。

甘願做司機


喪母後撻着
年初葉翠翠母親因器官移植手術出現併發症而逝世,葉在極度憂傷下患上抑鬱症, Raymond此時對她百般呵護,戀情亦由此撻着。

真愛無價,葉翠翠真命天子終於出現。近日她身邊不時出現一個身高六呎、年約 40歲的熟男。據知他是「李景勳、雷煥庭建築師公司」副董事周曉東 Raymond。從資料顯示,周雖為公司副董事,但沒有任何股份,只是受薪打工仔一名。領有建築師牌照的他,由於工作表現出色,因此在現職的公司由普通「散仔」,逐步躍升至副董事一職。

上周五( 12日)晚,記者發現翠翠偕 Raymond同以黑色情侶裝打扮到金鐘太古廣場北京樓撐枱腳。為免被發現, Raymond事前已訂了酒樓較隱蔽的位置。二人本來是打對面坐,飽餐後卻愈坐愈埋,葉翠翠更主動坐近並挨在男友肩膀,不時咬唇向男友放電, Raymond被女友逗得發出卡卡笑聲。用膳近兩小時, Raymond負責埋單,之後齊齊到停車場取車。葉翠翠充當司機駕駛其黑色 Audi座駕,返回男方北角威景台寓所,繼續下半場。三小時之後,葉翠翠才獨自駕車返回賽西湖寓所。

男友助走出陰霾

近日冇工開的翠翠,拍拖是常識吧!翌日( 13日)傍晚,本刊又發現葉翠翠揸車到 Raymond北角半山寓所,接他往中環 PMQ一小擺設店舖學整盆栽。一直被標籤為拜金的葉翠翠,竟然拍拖玩種花,看來她對這段戀情投入了真愛。數小時後,二人徒步到附近吃意大利菜,行至隱蔽處二人終忍唔住十指緊扣,非常 sweet。

據知葉翠翠今次擇偶條件 180度大改變,無非希望在 35歲前出嫁,加上年初其母因病過世,對她打擊甚大,葉一度患上抑鬱症,令她更珍惜眼前,跟 Raymond拍拖未夠一年,已視對方為結婚對象。葉閨中密友續說:「翠翠一直以嚟咁努力搵錢,其實都想俾父母生活好啲。直至翠翠媽咪有事,本身同翠翠識咗幾年嘅 Raymond專登請咗幾個月假,每日陪翠翠東奔西跑去醫院、搞白事, claim保險等等,總之出錢出力。好多嘢翠翠唔識處理, Raymond都拍膊頭一力承擔。嗰時翠翠真係好傷心,醫生確診佢有輕微抑鬱,要定期睇心理醫生同食藥控制情緒。 Raymond一直做阿四,對翠翠又o氹又呵,翠翠情緒先好番啲,亦正式接受咗 Raymond嘅追求。其實翠翠爸爸本身,對翠翠嘅要求好高。但經過呢件事後, uncle就好 buy Raymond,覺得佢個人踏實、同有擔帶,做老公一流。所以最近個女成日喺 Raymond度瞓,佢都冇出聲,唔會好似以前咁問長問短。」據知現時葉翠翠和 Raymond已達談婚論嫁階段,預計佳期在明年中秋節前後。


12/12食飯黐頭芒
記者上周一連兩日追訪葉翠翠,發現她的私人時間俾晒 Raymond,與男友拍拖僅一年的她,仍處於熱戀期,經常主動埋身和男友甜蜜咬耳仔。

照單全收
對於女友的熱情舉動, Raymond照單全收,更不時咧嘴大笑。

承認等嫁

就結婚一事,記者日前致電葉翠翠求證,她對 Raymond十個讚,更坦承會認真考慮與對方姞婚。

記:我哋影到你同 Rayomond連續兩晚拍拖,係咪打算公開戀情?
翠:希望你哋高抬貴手啦,可以俾啲空間我哋好好相處吓,希望可以好似一棵幼苗咁慢慢成長囉!
記:以前你嘅男友非富則貴,呢個相對比較平凡,你唔介意咩?
翠:其實由始至終我覺得男友錫我就夠。佢對我好,又對我爸爸好,同錢冇關係。我覺得錢同愛情唔係掛鈎,我從來冇諗對方幾有錢,只想搵個錫我嘅人。
記: Raymond有咩打動到你?
翠:嗰時嗰件事(媽咪因病去世)對我打擊好大,係佢陪住我度過,依家先冇事。
記:咁係咪下年同佢結婚?
翠:講真,係有考慮同佢結婚嘅,佢改變咗我好多,覺得佢好好,但希望同佢可以再相處多啲先。

雖然準夫婿並非大富大貴,與葉以往男友身家相距甚遠。但七年淘金之路,令葉翠翠早已榮升圈中小富婆行列,麵包已穩袋喺手,決定追尋真愛的葉翠翠,絕對係明智抉擇。


微博晒戀情
翠翠近日不時在微博發表愛的宣言,暗示自己正在蜜運中。

12/12扮唔識
一到人多地方,葉翠翠更一支箭飆上前,與男友扮作唔識,十分避忌。

人前避忌
經歷多次感情失敗,葉翠翠今次拍拖極度低調,和男友離開餐廳時,便會自動「解體」,並排而行時亦刻意有距離。

甘做柴可夫
記者發現葉翠翠連續兩日都駕駛自己的 Audi座駕到北角 Raymond寓所接男友外出,管接管送。

揸屯門細價樓

現年約 40的周曉東 Raymond外形高大。據知他在「李景勳、雷煥庭建築師有限公司」擔任副董事一職,負責樓宇項目,公司其中一個大客是四叔李兆基的恒基地產。 Raymond出入以七十多萬的白色寶馬 428iA Cabio-M Sport代步,而他手上只得去年 3月以 430萬購入的屯門海慧花園低層千呎單位(圖),用作投資。另以 3萬 5租住北角半山天后廟道威景台,方便與葉翠翠拍拖。

煲冇米粥

葉翠翠入行以來情史一籮,除了早年識於微時的李逸朗及高鈞賢外,其他埋身的都屬有錢階層,難怪拜金之說在圈中傳得咁行。

05年
李逸朗
前英皇奀星李逸朗是翠翠入行後首位男友,但有傳女方不滿男友經常約會合和太子爺胡文新,故揮刀斬情絲。

07年
高鈞賢
葉翠翠被拍到在高鈞賢位於將軍澳君傲灣寓所逗留至深夜才離開,繼而傳出緋聞。

11年
會計師樓高層
葉翠翠被拍得與任職德勤會計師樓的唐業銓於金鐘香格里拉酒店撐枱腳,事後有傳葉不斷於對方 facebook留言,主動出擊。

13年
波子男
葉被發現收工時,由一名年約 30的男子駕百二萬保時捷跑車接放工,被撞破後男子當場發難,並以車門撞記者。

13年
地產公司董事
同年 8月,葉又被拍得偕中原地產副區域聯席董事 Eric在香格里拉撐枱腳,之後更轉另一酒店短敍兩個鐘。

舊愛帶挈變富婆

在大台只得月薪$15,000的葉翠翠,七年前有本事現兜兜豪擲 3千萬購入賽西湖兩個豪宅。有傳她o氹掂當時強國富豪男友黃有龍泵水,但二人拍拖僅一年,有指趙薇介入,成功撬走黃有龍,更為他誕下女兒小四月。

雖然冇咗大水喉照住,但葉翠翠身家卻由此十級跳。前年見樓市興旺,決定賣了其中一層,套現逾 2,000萬,加上現時所住的單位,已漲價至 2,500萬,同時她手上所持有價值七百萬日出康城單位,以帳面睇,其身家已過半億。

洗盡鉛華

其實圈中很多女星年輕時也經常與富商扯上關係,但風雨過後有更美好的天空,發現凡人生活才適合自己。

蔡少芬
91年 17歲的蔡少芬當選港姐後,即有傳與大劉拍拖。對方為她搞百萬生日會,並送上跑馬地比華利山 2000呎豪宅,至 97年分手。 Ada現跟內地武打星張晉育有兩女,幸福滿溢。

郭羨妮
05年被指搭上「殼王」陳國強的郭羨妮,隨即以一炮過五百多萬購入太子道西柏德豪庭及 Benz CLK 200代步。 11年她拍內地劇搭上年輕六年的武指朱少杰,極速閃婚,前年 5月誕下女兒。

洪欣
92年大劉涉足娛樂事業,開拍電影,並點名要簽洪欣及力捧她,繼而傳出緋聞。 09年 6月洪欣與內地演員張丹峰結婚,今年 2月更誕下女兒晞彤,樂也融融。