世盃打到嚟《蒲松齡》頂住

2010.06.04 11

劇集台

忽然一周 775期

電視有正嘢

世盃打到嚟　《蒲松齡》頂住

2010年06月04日

世界盃 6月 11日就開鑼，但今次俾有線擸晒獨食，無綫要拗餐死只係分到四場咁大把。據知有線每日播三場賽事，分別喺七點半、十點及凌晨二點半。向來絕唔會俾人㩒住打嘅無綫，就部署好以劇集嚟對撼有線。除咗率先上場嘅《談情說案》外，跟住就係接《掌上明珠》，由馬浚偉、鍾嘉欣同陳法拉主演嘅《蒲松齡》。

《蒲》係神怪聊齋劇，無綫刻意安排《蒲》打頭陣嚟對撼有線，就係貪佢夠邪囉。

馬浚偉飾演嘅蒲松齡，位列九品小官，討厭官場，惟對怪力亂神最有興趣。
蒲松齡：捉妖捉鬼我最拿手。（設計對白）
墨西哥國家隊前鋒白蘭高、南非國家隊中場比安拿：唔係嘛，一開波就唔掂？（設計對白）

鍾嘉欣飾演嘅柳心如，性格執着，最後為陳錦鴻飾演嘅高喆所害，變成妖魔。

無綫分三段黃金時段搞「對抗」，八點接《女王辦公室》棒嘅，係由李司棋、毛舜筠同黎耀祥嘅《天天天晴》、八點半係《蒲松齡》、九點半就係已播緊嘅《談情說案》。此外，連深夜都唔放過，依家播映緊嘅《天地豪情》，會喺 6月 11日開始，即係世盃揭幕當日，由播一個鐘加長到播兩個鐘。無綫今次以劇集嚟對撼，目標明顯，就係要鎖住一班師奶 fans。
閒話講完，切入正題啦。無綫今次用馬浚偉嚟做對撼世盃嘅武器，雖然有部分人信心不大，但無綫亦唔會打冇把握嘅仗。其實馬浚偉對撼世盃早有前科， 2002年時，無綫就攞佢有份做嘅《洛神》打當年嘅世盃，平均收視都有 30%，相當唔錯。難怪馬浚偉亦大言不慚話自己係福將。雖然《蒲》古仔好多都耳熟能詳，但喺電視上仍屬近年少見嘅題材。

《蒲松齡》起錨

今次呢套《蒲松齡》係講狐仙報恩。馬浚偉飾演嘅蒲松齡，同陳錦鴻演嘅捕快高喆係好兄弟，兩人都對貪官污吏痛恨不已。一次，兩人為咗追查狐仙作怪傳言，蒲差啲遭到毒手，好彩及時得陳法拉飾演嘅令狐小翠出手救番。原來小翠就係嚟報恩嘅狐仙。另方面，蒲家為趕製年畫，請咗大批女工，其中鍾嘉欣飾演嘅柳心如嚟應徵，目的係想搵到當年拋棄佢家姐嘅無賴，因而結識到高喆及蒲松齡。究竟今次馬浚偉掂唔掂？就真係要睇劇集吸唔吸引咯。

劇中蒲松齡、令狐小翠、柳心如及高喆四人，陷入一場複雜混亂嘅四角關係。