忽然一周 775期
今年 6億富婆
去年黃長興冧掂富婆徐美琪，做長期伴舞男，今年更爆出兩人關係密切，長興有貴人帶挈，有 50萬資金開法國餐廳。
封面故事
老嫩通殺愈黐愈富貴 黃長興發惡：咪當我係鴨
2010年06月04日
05年落選港男黃長興，在無綫只屬三、四線演員，平均月薪唔夠一萬，事業未見起色，但緋聞卻鑊鑊新鮮。近日更被周刊爆冧掂 63歲金象苑老闆娘徐美琪，在女方寓所「名門」出入。
黃氏兄弟都是冧女高手，多年來溝女無數。細佬長發早前搭上鞋王三奶 Karen，又有契媽 Christine帶挈做餐廳經理。哥哥長興揀女更勝一籌，愈黐愈富貴。近日黃長興獲大水喉射住，斥資 50萬開法國餐廳，兼帶挈老竇在徐的家族墓園生意「善緣」中任高職，錢途無限。
對於近日與徐美琪傳緋聞，黃長興呻爆話︰「咪當我鴨仔！」
31歲的黃長興，與年紀足足大他一倍、身家 6億的金象苑老闆娘徐美琪，於去年尾保良局慈善騷上合跳拉丁舞認識，一見如故，迅速發展成密友關係。 5月尾，有周刊指黃長興獲徐美琪打本 50萬開法國餐廳，而女方位於屯門的墓園生意「善緣」，亦已交黃長興老竇打骰，父憑子貴。
尷尬合照
5月 29日，黃長興與徐美琪為公益騷表演。當日下午拜神時，兩人被邀合照，十分尷尬，不敢有眼神接觸。
硬晒呔
傳出緋聞後，黃長興明顯十分避忌，跳舞時硬晒呔，盡量不觸碰女方的敏感部位。
富婆扁嘴
表演完影大合照，黃長興沒有主動邀請徐美琪，令站在一旁等候的徐美琪無癮兼扁嘴。
十萬登廣告反擊
緋聞爆出後數天（ 5月 29日），適逢兩人要為公益金慈善騷再度拍住演出，徐美琪即時做嘢，於表演翌日豪花十多萬於各大報章及周刊刊登全版廣告，大字標題寫上︰「舞照跳！慈善表演照做！」，又話「智者不惑，仁者不憂，勇者不懼」，向緋聞來個大反擊。
雖則話勇者不懼，但公益金當晚現場所見，黃長興與徐美琪顯得甚為避忌，在後台時零交流不特止，連跳舞時都硬晒呔，影合照也離行離列，擺明劃清界線。
面對傳媒，黃長興與徐美琪扮唔熟，私底下他更向無綫的工作人員嬲爆話︰「唔想應酬佢，咪當我鴨仔至得。」不過，黃長興在過去訪問中自認風流，晒命自己十歲已經有女仔追，又自詡拍拖次數多到唔記得。 05年他參選港男入行後， 07年便與 o靚模女友 BiBi分手，身邊的女人更是一個比一個富貴。
09年 12月拉丁舞結識
富婆徐美琪去年 12月同黃長興，在保良局慈善騷大跳拉丁舞，有周刊指兩人因此結緣。《蘋果日報》圖片
徐美琪位於屯門的墓園生意，走高檔路線，一個骨灰龕位要三十萬起。
揸平治載富婆
知情者透露︰「其實 Margaret（徐美琪）與第三位丈夫馮迺樂離婚後，便開始醉心拉丁舞。舊年佢同黃長興跳完舞，對佢舞技讚口不絕，加上長興跳舞時對 Margaret呵護備至，所以話咁快，長興就變咗 Margaret身邊大紅人。長興成日陪住佢去杜德智度學舞，又成日跟出跟入，之前仲搵埋另一個港男陪 Margaret去高級會所飯局㖭，關係好密切。」早前，有人見到黃長興曾駕着一架過百萬的暗紅色平治房車，載住三、四個打扮貴氣的女人，在尖沙嘴出現。
溝中女孖細佬拍拖
知情者又爆︰「長興嘅風流史多到數唔晒， 07年佢同有米港姐曹敏莉黐埋年幾，後來識咗個家底仲厚嘅有錢中女，年約 30多歲，於是就同曹敏莉分手。嗰個中女身形細細粒，住喺西貢『溱喬』價值 5千萬嘅獨立屋。上年佢哋仲成日孖住長發及 Karen，兩 pair人齊齊拍拖㖭。」
6月 2日，黃長興到北角巡視將開幕的餐廳裝修，記者乘機上前訪問他，兜兜轉轉下，黃長興前言不對後語，慌亂間更直認上過徐美琪香閨。
記︰係咪向人呻過，俾人誤以為鴨？
黃︰（面色一沉，欲言又止）咁公司話做慈善，咪跳囉！
記︰你同徐美琪依家乜嘢關係？
黃：係朋友！
記︰好朋友咁簡單？有傳你哋出雙入對，仲一齊出過 trip。
6月 2日扁嘴談鴨仔疑雲
問到被傳靠富婆水喉射住，才能做老闆，黃長興扁嘴說：「人哋點講咪點講囉！」
黃長興的法國餐廳內，連日來仍放滿油漆及雜物，相信正趕工裝修。
巡視裝修
6月 2日，黃長興中午 1時許到北角的木星街新舖巡視裝修。
銀行開戶口
巡完舖後，黃長興直入銀行，同銀行職員辦手續之後，便拎大叠銀紙在手不停數。他事後表示，是開銀行戶口。
認多次上香閨
黃：我哋係好朋友，但冇一齊去過 trip，啲人冇查清楚就亂寫，唔係事實。
記：有周刊影到你出入徐美琪寓所「名門」。
黃：只不過係 Margaret（徐美琪）之前傷咗韌帶，佢唔知點同 TVB交代，我上去睇吓佢啫……因為佢跳唔到舞。
記：但後來徐小姐有跳喎！
黃：周老師（拉丁舞教師周志坤）話佢可以跳囉！
記：你同嗰度啲保安好熟，係咪成日上去？
黃︰係間中上去同徐小姐練吓舞咁啦。
記：有人見到你開住架紅色平治，載住成班闊太響尖沙嘴出現，你係咪買咗新車？
黃：架車係朋友嘅，我揸過好多靚車㖭！唔止呢架！
記：有人質疑你喺 TVB人工唔多，點會有 50萬開餐廳？
黃：做藝人有好多收入，除咗做電視台，我仲有登台同買股票 o架。但私人嘅嘢我唔需要同你哋講得咁詳細。
老竇墓園打骰
記︰你老竇喺徐小姐間墓園打骰？
黃︰阿爸喺法國做開園藝嘅，啱啱徐小姐（墓園）搵人幫手，咪幫佢打工囉。我阿爸付出勞力賺人工，好正常啫！
記：咁你間法國餐廳，係咪徐小姐打本？
黃：唔係，我開餐廳係用自己嘅積蓄。我可以靠自己。
記： 09年你有個圈外女友，住喺西貢「溱喬」獨立屋，係咪因為徐美琪同女友分手？
黃：私人事唔想講。
記：緋聞會唔會影響你同徐小姐關係？
黃：我就覺得清者自清，唔會理。
相差 32歲，黃長興做得徐美琪個仔有餘，不過黃長興電女無分年齡，不論嫩口 o靚模、有錢中女抑或熟女富婆，黃長興都冧得掂，呢份本事，真係唔到你唔服。
杜德智：佢兩個好好 o架！
曾教徐美琪及黃長興跳拉丁舞的杜德智話：「佢兩個好熟，成日一齊嚟學舞。教佢嗰陣唔覺佢哋有嘢喎，後尾就唔知啦！」
風流兄弟
黃長興及黃長發小時移民法國，說得一口流利法語，加上兩人都是外貌俊朗的肌肉男，齊齊靠參選港男出位，溝女無數，更識得借女銀。
06年 o靚模 Bi Bi
06年，黃長興剛入行，女友是曾到日本發展的 o靚模 Bi Bi（梁寶賢），兩人在西營盤唐樓同居， 07年因曹敏莉介入分手。《蘋果日報》圖片
07年港姐曹敏莉
07年，黃長興與曹敏莉因合作《舞動奇跡》撻着。曹甚有家底，住在過千萬的豪宅嘉文花園。《蘋果日報》圖片
09年富貴中女
09年，據知黃長興搭上一名有錢中女，更因而與曹敏莉分手，中女住在 5千萬西貢獨立屋「溱喬」。而本刊曾於 09年中拍到黃與一名年約三十歲的女子約會，估計此為黃當時的女友。
黃長興
黃長興在過去的訪問中曾話過選港男好易俾人錯覺，似選鴨仔。就近日緋聞再問長興，他表示：「一班男仔圍住班女觀眾跳舞，我冇嘢 o架，我唔理人點睇！」
黃長興自稱以積蓄 50萬開的法國餐廳（ A La Maison），與緋聞女主角徐美琪開的跳舞街（舞蹈文化中心）只是一舖之隔。
黃長興的千多呎舖位月租 5萬，單以他在 TVB的收入，連舖租都俾唔起，加上裝修起碼三十萬，黃長興的投資唔少。
黃長發
鞋王三奶
09年，長發搭上鞋王三奶 Karen，兩人打得火熱，長發更因此退出娛圈，專心服侍女友，但 Karen遭鞋王告誹謗及經濟封鎖，兩人拍拖半年分手。
契媽 Chrisine
甩拖冇耐，長發話咁快就冧掂契媽 Chrisine，在女方的 Cafe做經理。
夜場攬女
回復單身後，長發除了有契媽錫，網上亦有不少攬女相，證明他身邊女友不絕。
鞋王三奶
契媽 Chrisine
《蘋果日報》圖片
夜場攬女
十萬登廣告
本周一（ 5月 31日），黃長興的緋聞富婆女友徐美琪，豪花十萬在香港多份報章，包括《東方》、《太陽》、《蘋果》及《明周》等等刊登全版廣告，而祝賀名單中的周志坤跳舞老師表示：「徐小姐打嚟問我，話想落廣告賀吓演出成功，問我介唔介意出個名，我話冇所謂，都唔使俾錢嘅。」
徐以自己的大頭半身靚相放在最當眼處，高調祝賀自己在公益金的拉丁舞演出成功，更冠以「摯愛小天使」稱號，祝賀嘉賓名單中，有徐美琪的子女楊嘉成及楊思敏。
徐美琪與黃長興去年初跳拉丁舞的照片，亦登在廣告上。
廣告中徐美琪以：「智者不惑，仁者不憂，勇者不懼」，暗示她無懼緋聞的決心。
身家 6億富婆
63歲的徐美琪，離過三次婚，第一任丈夫為景福集團後人楊秉江，生了一子一女（楊嘉成和楊思敏）；第二任丈夫為唐姓富商，第三任丈夫馮迺樂為東美發展集團主席。 Margaret三任丈夫都從商，她炒樓亦有一手，十年賺三億幾。
此外，她旗下有 6間公司，有經營珠寶生意及投資公司，最主要的業務是金象苑餐館和家族經營的墓園生意，身家估計 6億。
石澳大宅未賣前，徐美琪穿低胸裝坐在大宅廳中留倩影。《蘋果日報》圖片
第三任丈夫馮迺樂(96年攝）
合共 3億 2千 7百萬
三年前徐美琪以三億八千萬將石澳大宅賣給趙世光。
伴舞錢途無限
上流社交圈愛跳舞，唔少富婆都爭住學，因與男舞蹈師有親密的身體接觸，少啲定力都容易舞出感情，甚至舞出未來，錢途無限。
何鴻燊梁安琪
賭王何鴻燊長袖善舞，當年更與身為社交舞導師的梁安琪一舞定情，梁安琪亦因此成為賭王四太，身家以億計。
朱玲玲尹衛東
09年，朱玲玲因以每堂（一小時）約四千蚊，跟中國拉丁舞王尹衛東學跳狂熱拉丁舞，有傳霍震霆因他們有身體接觸而動氣。
王以智 Mirko
滙豐一姐王以智以天價一億二千萬，包起拉丁舞王 Mirko Saccani八年，最終師徒決裂要對簿公堂。
何鴻燊梁安琪《蘋果日報》圖片
朱玲玲尹衛東《蘋果日報》圖片
王以智《蘋果日報》圖片
Mirko
採訪、撰文、攝影︰娛樂組