忽然一周 776期

無綫喺《天天天晴》擺出無敵鐵三角陣勢對抗世界盃，擺明車馬，此仗係許勝不許敗。
我哋祥毛擔大旗。（設計對白）
有我出馬，肯定 sure win！（設計對白）

電視有正嘢

祥．毛抗世盃　棋開得勝

2010年06月11日

記者上期講過，無綫已經排好「劇集陣勢」嚟撼有線嘅世界盃。八點半檔嘅《蒲松齡》已出咗場，嚟緊就到八點檔處境劇《天天天晴》上場。
講起《天》，黎耀祥同毛舜筠呢對組合喺《畢》未能圓滿開花結果，令到《畢》迷留下遺憾。今次呢對組合決定修補遺憾，除咗喺《天》再續前緣之外，更要身肩重任，帶領《天》對抗世界盃嘞。
《天》嘅卡士，大部分嚟自《畢打自己人》，再配合重量級人馬李司棋，加埋近期 hit爆嘅李思捷、王喜及田蕊妮等，睇牌面，人強馬壯。無綫如此重手，唔使講，呢場肯定係硬仗，而且一定要贏。
掂唔掂？好快就揭曉啦！

講起嚟，相信大部分觀眾、包括記者在內，對呢套新劇都有所期待。如果係電視迷、尤其係無綫 die-hard fans嘅，一定記得李司棋、毛舜筠、黎耀祥喺 90年時，已經拍過《茶煲世家》，估唔到要相隔 20年才再合作。另一值得期待原因，就係毛毛聲言《天》將會係佢最後一套電視劇，咁就更加要珍惜啦。
一直以嚟，無綫嘅處境劇，如《同事三分親》、《畢打自己人》，再到《女王辦公室》，都係着重辦公室政治，睇得多都俾人三幅被感覺。而《天》雖以家庭溫馨為主線，但又不至於《真情》般煽情，對觀眾嚟講，係有番啲新鮮感。
今次李司棋喺《天》入面飾演嘅明心安，接手亡夫家族嘅珠寶店，業務發展得有聲有色，都係歸功珠寶店首飾設計師馬浩文（鄭子誠飾）及井喬（毛舜筠）夫婦。可惜井喬因馬搞出婚外情而同馬離婚，井亦因明心安「知情不報」而反面。而心安除面對井喬外，仲有亡夫同前妻所生、性格反叛嘅女石可兒（陳茵媺飾），再加亡夫家族派嚟嘅行政顧問朱保（劉丹飾）等三人同佢經常作對。而井喬喺冇老公嘅日子，得到好友藍靖鈴（田蕊妮飾）鼓勵，終於由師奶仔變成珠寶首席設計師。
為咗觀眾着想，記者暫時講咁多，不過可以肯定講句：就係祥毛今次絕對會有個圓滿結局 o架。

李思捷飾演嘅明乃強，係明心安（李司棋飾）嘅孻叔，婆仔性格之餘又夠毒舌，喺公司屬生人勿近。但曹操也有知心友，反而同井喬（毛舜筠）傾得兩嘴。

徐榮喺劇入面係飾演明心安助理郭偉龍，而心安對佢好好，起居生活都照顧得周到。

《天》劇無咗歐錦棠加入王喜。王喺《天》劇飾演外冷內熱嘅餐室老闆，同黎耀祥飾演嘅明世安老友鬼鬼。

撰文：姜培綺