忽然一周 777期

吓，我仲欠無綫騷？點還呀？（設計對白）

媽咪姐手帳

離巢廿年　星爺仲欠無綫騷

2010年06月18日

自從六嬸方逸華入主 TVB後，全台上下奉行一個字——慳。你都咪話，就係咁竟然搵到寶呀！

話說因為要慳，藝員部就搵專人翻查舊賬，睇吓有乜人仲欠公司騷？查吓查吓，竟然發現，離開咗 TVB成廿年嘅星爺周星馳，原來仲欠 TVB騷 o架！嘩，今時今日嘅星爺，升價何止百倍！你話無綫今鋪係咪發達呀！不過咁講啦，星爺呢啲騷仲還唔還？點樣還？又係另一回事啦！
媽咪姐向外事部副總監曾醒明求證，佢承認 TVB同星爺仲有藝員約，「但啲約嘅詳細內情就唔方便透露嘞，其實好多離咗巢嘅明星，好似鄭伊健咁，同 TVB都仲有約 o架！」

為咗宣示主權， TVB喺旗下藝人 6月星辰嘅報告板上，將星爺嘅相貼喺中間位。

呢張相係星爺至少廿年前影落嘅舊照。曾醒明解釋：「佢咁耐以嚟都冇返嚟幫我哋影張新相啦！」