忽然1周 第834期
大封面
每半年一針 楊怡急救木偶鼻
2011年07月22日
無綫最搵錢花旦佘詩曼離巢，造就楊怡成功上位，近月楊怡主演的劇集一套接一套，不過觀眾注意力並非落在其演技之上，而是不斷熱烈討論她那高鼻樑兼鼻頭離奇增長向上翹的「木偶鼻」。近日《真相》一劇收視報捷，亦再度掀起楊怡整容疑雲。
據知由於楊怡的木偶鼻已經被廣泛報道，眾所周知之下，她為了 keep住個鼻冇走樣，惟有約每半年至 1年搵醫生「維修」一下。近日記者更收到可靠消息，指楊怡所幫襯的醫生就是在中環執業的周永就醫生。記者向周醫生提及楊怡是其客仔，他亦不慎露了口風，說：「哦，楊怡呀，佢靚咗好多啦，不過最近就少咗嚟！」木偶鼻真相終於揭開了。
現年 31歲的楊怡，近年鼻樑變高，鼻頭明顯變尖變高，與 95年初出道的扁鼻樑闊鼻翼樣子分別甚大。不少網友更直言睇她主演的劇集，猶如睇《木偶奇遇記》。
對於被觀眾激烈談論疑似整容，楊怡的反應亦有所轉變，她由最初笑住否認自己冇隆鼻，堅稱自己是靠化妝變靚，又稱不反對別人整容，只是覺得接受手術或整容太危險。不過，近日再被問及整容，她則避重就輕說：「已經傳咗好耐，傳我變靚我反而冇所謂。要整我就想整腫對眼，因為我眼較凹，腫咗上鏡反而精神飽滿啲。」
今年保持木偶鼻
自從木偶鼻曝光後，楊怡不時要約見醫生 keep鼻形。本周一（ 18日），楊怡宣傳《真相》時，記者近距離再觀察楊怡個鼻，發覺雖似木偶鼻，但只要仔細近距離睇真，其鼻頭卻帶點圓，莫非真係如周醫生所講，楊怡近排少咗嚟？
十年前鼻樑低鼻頭圓
01年，一臉清純的楊怡，有機會拍攝《婚前昏後》，當時其鼻樑凹位低陷，圓鼻頭之餘。亦唔凸出。《蘋果日報》圖片
十年前鼻翼闊正面睇
01年楊怡拍攝《流金歲月》時，其鼻翼兩邊略闊，鼻形唔算長。《蘋果日報》圖片
07年鼻頭凸出
數年後，開始上位的楊怡鼻形亦開始改變，鼻樑凹位開始升高，鼻頭亦比昔日稍稍凸出，不過仍未算是木偶鼻。
去年伸長鼻尖
去年楊怡和林峯宣傳《談情說案》，當時她的鼻尖離奇再發育，增長不少，鼻頭更加上翹，被指似足木偶鼻，但她一直否認整容，指是化妝影響。
今年收窄鼻翼
楊怡經過這幾年悉心加工後，月前拍攝新劇《回到三國》時，鼻形較長，鼻翼亦收窄不少。
近日楊怡頻頻與黃浩然和陳展鵬等人戮力宣傳《真相》，最高收視更達 33點。
怕痛拒開刀
雖然楊怡的「木偶鼻」被指愈整愈奇怪，但事實可以說是冇得返轉頭。現時她要定期到診所稍作加工，務求令尖鼻維持原狀。「楊怡本身個鼻其實都唔算扁，只係鼻樑位唔高同鼻翼較闊，加上佢一向怕痛，所以佢唔會選擇開刀。幾年前佢開始搵醫生打透明質酸，每次打少少咪冇咁覺眼囉。不過近年佢忽然話俾醫生聽，想鼻頭尖啲，打完針後就俾人話似木偶鼻。啲透明質酸由於每隔半年至 1年就會俾身體吸收番，所以每次楊怡知道自己嚟緊有重頭劇上或者要拍廣告，就要見一見醫生，費事個鼻同之前有唔同囉。」一位知情人士透露。據知楊怡每次均會預約在工作前數天見醫生，因為還要預計針後個鼻會出現輕微紅腫情況。
由於楊怡每隔一段時間會修補木偶鼻，所以即使只是兩三個月，她的鼻形亦會有輕微改變，時尖時圓，難怪有網民亦留意到她鼻形時大時細。
透明質酸 會被人體吸收
日前記者陪伴一位友人到周永就醫生診所，與周醫生面談近一小時，其間他除了詳細講述打透明質酸的程序和要注意事項外，還露了口風，指楊怡亦曾經幫襯過他。
當日記者與友人走上周永就醫生位於中環士丹利街騏利大廈的診所。醫生起初向顧客解釋，透明質酸與肉毒桿菌，兩者都是被稱之為醫學美容一部分。所謂醫學美容即是毋須開刀見血，僅是打針而已。透明質酸通常用於提升鼻樑、鼻尖，在該等地方落針後，再以手按摩，令透明質酸能平均分布，半年至 1年內會被人體吸收。而肉毒桿菌是用在填補眼下淚痕印、凹陷及去紋等。與他面談達 1小時，最後記者與友人沒有作任何療程，收費 800元。
事後記者就楊怡鼻形，再問過專業醫生美學中心 Dr Reborn，其發言人陳小姐看過楊怡的新舊照後說：「側面睇，佢鼻頭的確尖咗好多，如果用矽膠只可以改善鼻樑位，但打透明質酸可以改善鼻樑之外，仲可以改善埋鼻頭，所以睇相片嘅對比，佢打透明質酸機會較大。」
楊怡靚咗好多啦，不過最近少咗嚟！（真實對白）
周永就醫生在行內頗有名。他除了為顧客打透明質酸之外，在其卡片上，還列明有肉毒桿菌蛋白、微晶磨皮等服務。
當日記者與友人在周醫生診所的接待處等候期間，發覺該診所有數個治療小房間。當眼處亦放了不少以靚女照片做賣點，宣傳其醫學美容的生意。
診所埋身直擊
最近本刊收到消息，指楊怡一直光顧的診所位於中環士丹利街，而為她施針的醫生是行內有名的周永就醫生。據知周醫生一向低調，但原來其明星客仔除楊怡之外，還有不少明星及無綫姐仔。
日前，本刊記者跟一位欲打透明質酸隆鼻的靚太朋友，上到周永就醫生醫務所。現場所見該樓層全層均是他用作醫學美容的診所，事先未經預約不會被接待。
記者與該名靚太甫入周醫生會客的房間，他十分專業地為靚太分析她臉上需要整頓的地方，當時全程還有一位女護士在旁。其間靚太表示嫌自己鼻樑扁及鼻頭細，周醫生說：「你鼻樑係扁，可以打透明質酸，但鼻頭夠啦，唔需要搞佢。」可見周醫生頗有職業操守，並不是一味只為做生意而來者不拒。
爆 TVB花旦有幫襯
為時約 1小時的談話過程中，當靚太提及到自己是楊怡介紹，周醫生不慎露了口風，承認楊怡是其客仔，此外還透露無綫不少花旦都有幫襯他。
周：周醫生 太：記者靚太朋友
周：（按過靚太五官後）如果鼻頭鼻樑打透明質酸，六千五百蚊一針，大約有效期一年。
太：會唔會有副作用 o架？
周：唔會，頂多打完之後有少少紅同見到個針窿，但只係似蚊咬咁細，唔多覺，上晝打完下晝就可以見人，即使上飛機都得。
太：可唔可以收平啲呀，我係楊小姐介紹嚟。
周：邊位楊小姐呀？
太：阿怡介紹我嚟，佢做明星就梗係有錢啦！
周：（笑一笑，再繑埋手說）哦，楊怡呀。其實好實惠 o架啦……不過楊怡最近少咗嚟，不過佢真係靚咗好多啦！唔止佢， TVB啲花旦姐仔十之八九都係嚟搵我搞 o架啦！
太：個鼻打完透明質酸，會唔會硬堀堀同尖，成個木偶咁 o架？
周：點會呀？一定唔會。一年打一次已經足夠，毋須心急多打，打得太密，當然有問題啦！
之後他不斷用枱頭的電腦顯示自己不少客人針前針後的樣子，以證明進行醫學美容真可化醜為妍，不過並未見他展示其口中 TVB姐仔們的圖片，算是有職業道德。
月前楊怡與陳豪的劇集《點解阿 Sir係阿 Sir》，楊怡的「高鼻」成劇中焦點，即有網友開設「楊怡整容前後」的話題。
大方驗鼻
早前楊怡整容的傳聞四起，她曾在活動上大方讓記者揑其鼻骨，當時記者未發現該位置有可疑硬物，還覺得幾挺身。
記者找到楊怡 98年數張與一班無綫訓練班同學及師兄師姐（如揚明、徐榮、張美妮等）的合照，當時的楊怡鼻樑扁、鼻頭略細，樣子與現時分別好大。
絕密照曝光
此外，還有楊怡與好友林峯的陳年照，無獨有偶，兩人樣子至今已經變靚不少，絕對稱得上變臉孖寶。
網友激評
楊怡在最近的《魚躍在花見》、《點解阿 Sir係阿 Sir》和《真相》三套劇播出的同時，網友亦不斷留言，談論其木偶鼻。有些網友直指她過了火，有些觀察入微的更表示其鼻子時大時細。不過亦有些撐楊怡，指她根本冇整容。
黎諾懿行外母政策
縱使楊怡的木偶鼻引起談論，但是非愈多，反而愈紅，近期無綫為她開出的商場騷價更升至近廿萬元一個，肯定令她豬籠入水。感情方面，自從 08年與商人藍偉傑分手後， 09年有傳她與黎諾懿撻着，之後楊母認為黎諾懿冇錢冇錢途，唔鍾意女兒戀上奀星，隨即棒打鴛鴦。不過黎諾懿一直希望打好與未來外母關係，加上最近他工作量較多，又在劇集佔較重角色，楊母才對黎諾懿改觀。「呢年幾以嚟，黎諾懿都間中同楊怡阿媽見面，關係明顯冇以前咁僵，再加上佢啱啱喺湖南衛視《舞動奇迹 3》贏咗冠軍，喺大陸知名度即刻唔同晒，楊怡不知幾開心。」知情者說。
楊怡事業愛情兩得意，如今連阿媽都接受埋黎諾懿，即使其木偶鼻再尖啲都冇所謂啦。
拍拖斷正
09年尾，楊怡傳與黎諾懿撻着，被拍下一同在尖沙嘴海港城揀相機（右圖）。去年 1月，楊怡鬼祟坐男方的富士 R2座駕，當兩人發現有記者，戴鴨嘴帽的楊怡更耷低頭講電話，十分尷尬。《壹週刊》圖片
《壹週刊》圖片
有指楊怡母親不欲女兒與「奀星」黎諾懿拍拖，曾經棒打鴛鴦，不過黎諾懿依然不時相約楊母行街，極力與她打好關係。《 FACE》圖片
日前黎諾懿在湖南衛視《舞動奇迹 3》爆冷贏出，人氣急升。《壹週刊》圖片
04年，楊怡與沙田鄉紳蔡偉傑拍拖兼同居，至 09年才分手收場。
豬籠入水
入行 13年的楊怡，在無綫花旦荒之下，不斷有自己擔正的劇集播映，加上木偶鼻傳聞沒完沒了，反而令她經常見報，就連大陸劇亦有機會接拍，還有廣告和商場騷。楊怡是非愈多，收入愈多，保守估計，這大半年她已賺近 400多萬。
瘦身廣告
今年 5月，楊怡為瘦身產品任代言人，僅拍攝十個小時，換五個造型，便有近 200萬落袋，平均時薪 19萬一個鐘。
拍大陸劇
1月，因為楊怡聽教聽話， TVB居然肯放人，讓她賺外快，首次拍攝處女大陸劇《後宮》，賺近 200萬酬勞，真是豬籠入水。
商場騷
年初，楊怡與草蜢、敖嘉年等在荃灣出席倒數活動，輕易穩袋 6萬元。
楊怡搵醫生執靚樣
[17:36] 2011/07/22
楊怡出席港姐護膚分享會，她坦言睇好3號許亦妮、5號朱晨麗和6號梁麗翹，問到3號許亦妮多緋聞？她笑說：「咁就要介紹啲嚟識！（有網友睇《真相》覺她你被綁戲聯想到AV女？）我覺得好好笑！（又傳你整鼻？）我有睇過報道中o既醫生，但只係去胎印，我都會再幫襯！我樣樣都想執！」
楊怡木偶鼻掀關注
2011年07月22日 (06:54 pm)
楊怡近日被指鼻子愈變愈尖，更被網友取笑為木偶鼻，看她的電視劇就十足十欣賞《木偶奇遇記》一樣，楊怡今日出席宣傳活動表示，不在乎相關報道，又自嘲說：「如果要整容，好多地方都要整，想隆高個鼻，年紀大啲可以去整下縐紋。」
