忽然1周 第920期

阮政鋒（ Hero）最近在《心路 GPS》中飾演「港孩」張俊傑，劇中他任性無禮，是整套劇最大亮點。其實阮政鋒與家人關係密切，現時他和父母、妹妹和嫲嫲同住深井一個千呎單位。大廳布滿了武術獎牌及魔術啤牌，連飛鏢靶都有兩個，充分反映阮政鋒好動一面。

父母對阮政鋒很包容，在阮政鋒先斬後奏飼養異國短毛貓「嗎啡」可見一斑。「 10年我喺寵物店櫥窗見到嗎啡，嗎啡睩大隻眼望住我，我就覺得佢好似《史力加》入面隻貓。本來我已經行過咗，但都係忍唔住返轉頭買佢返屋企，之後至同媽咪講我買咗隻貓。媽咪以為老竇實反對，於是推個波叫我問老竇，點知老竇又應承，後來媽咪都有埋怨老竇心軟！」

阮家之前住青衣，搬來深井只有半年。地方大了，客廳更可飽覽青馬海景，不過得益最大的，竟然是嗎啡。「嗎啡成日霸住大廳窗台望海景?！佢平時好黐我，但上次因為拍《心路 GPS》外景有 21日冇返屋企，一返嚟嗎啡嬲咗我，有一排都唔睬我，小器到死！」

阮政鋒的愛貓嗎啡屬英國短毛貓。嗎啡不像其他貓高傲，經政鋒訓練後，嗎啡非常聽話做出各種動作。

電視櫃頂上的黃色「鬚根雞」是政鋒喜愛的動畫角色，至於《暑假做個鄉下仔》個牌就係佢在《心路 GPS》個真人騷嘅節目名。

阮說：「爹哋好鍾意踢波，呢 set限量版曼聯手錶係媽咪買來送俾佢嘅，見有位攝，我放埋自己嘅武術獎牌?！」

學魔術為冧女

靠《功夫新星》入行的阮政鋒，自小鍾意睇動作電影，到了 8歲正式習武，通曉長拳、泰拳、劍術、槍術。幾年前阮政鋒更開始教授小朋友武術，希望早日儲錢入讀演藝學院。

「我記得有個幼稚園嘅小妹妹學生，每次問我問題前都話：『阿 Q咪， Mr Yuen』。我聽咗一年之後，至知原來佢係話：『 Excuse me, Mr Yuen』，小朋友真係好得意、令人好開心。」

家中有兩個飛鏢靶，一個在大門側，一個在走廊。阮政鋒說：「以前玩掟鏢都係出街，但媽咪唔想我成日出夜街，所以就用千五蚊買咗個可以計分嘅來過吓癮。」

阮政鋒 14歲參加武術比賽，多年來獲取 12個獎項。 19歲時阮政鋒開始教小朋友武術，學生年紀雖小，但就非常聽話：「我參加《功夫新星》時佢哋拍咗段片支持我，每次睇番都令我非常感動！」

阮政鋒 Profile

21歲的阮政鋒（ Hero）， 11年參加《功夫新星》進入最後四強，之後加入第 25期訓練班而入行。他做過《放學 ICU》主持，又曾演出《名媛望族》及《愛．回家》。近期他因為在《心路 GPS》飾演「港孩」張俊傑而為人認識，劇集播出後，更令他登上 TVB人氣榜榜首。

阮政鋒在《心路 GPS》中飾演 16歲典型「港孩」張俊傑，與陳展鵬由嗌交到惺惺相惜。

直至前年，無綫搞《功夫新星》比賽，阮政鋒終於有機會入行。「本來父母都唔太支持，直至有一次佢哋喺電視見到我企喺鏡頭好後嘅位置，傻吓傻吓跳舞都咁投入，至相信我鍾意呢行，而且見我背劇本仲勤力過以前讀書，所以最後都支持我入行。」

有看《心路 GPS》的觀眾都應該記得阮政鋒在劇中對魔術有濃厚興趣，原來他真的是魔術高手；之前阮政鋒為了飾演調酒師，亦試過特登去學調酒，完全奉行「方法演技」。

「我鍾意新鮮事物，魔術係讀中學時開始接觸，初時都係諗住型啲易啲冧女仔?咋！其實都有段時間停咗無玩，直至《心路 GPS》監製知道我識魔術，想我 pick up番喺套劇度表演，於是我咪上網、睇碟自己練習番。」阮政鋒說。

自小喜歡魔術嘅阮政鋒收藏了不同種類嘅啤牌：「啤牌分唔同年代，唔同紙質，唔同花紋。有啲係防水，透明，一見到特別嘅我都忍唔住手買！」

「除咗上網睇魔術外，有啲特別魔術我會買碟研究。」

阮政鋒於《放學 ICU》除了當主持外，還會以不同造型演出短劇，因此買下多款眼鏡：「男仔嘅造型除咗髮型，眼鏡亦係其中能改變造型嘅工具，呢款圓形眼鏡就係扮書法老師嘅 look！（小圖）」

房間擺放非常整齊，櫃裏亦收藏大量電影及 TVB劇集光碟。至於電視機就用英國旗包住，不過佢話唔關港獨事，呢面旗係表姐喺英國買俾佢嘅手信。

阮政鋒平時喜歡煲劇集，房間擺放電視機嘅尺寸亦較一般大，有成 40吋。

平面圖