忽然1周 第928期
《金枝慾孽貳》收視持續不振，上周最低只有 19點收視，網友大彈劇情難明，陳豪、葉翠翠等演員表現欠佳，唯獨飾演如妃近身爾荷的簡慕華卻被激讚出位。雖然一直有傳簡慕華與《金枝》監製戚其義拍拖，但兩人一直不承認戀情。上周六（ 4日），本刊發現簡慕華先與戚其義在坑口拍拖踩單車，之後再一起在西貢澳頭村愛巢過夜，同居關係首次曝光。
有監製男友照住，簡慕華近年不但由三、四線升上女二，更是套套劇角色勁搶。即使戚其義這次告別作《金枝慾孽貳》，亦暗中加重女友戲份。
溫馨踩車
簡慕華學踩單車，戚其義放下大男人身段，為女友推車。
上周六（ 4日），簡慕華出席完《金枝慾孽貳》的宣傳活動後，便駕車去將軍澳坑口村，到友人家飯局。監製男友戚其義沒有出席活動，直接到坑口村和簡慕華會合。
趁晚飯前的空檔，簡慕華把握時間學踩單車。技術麻麻的她，要戚其義充當教練，男方更不時幫女友扶住單車。只見簡慕華一臉甜絲絲，而平日 cool爆的戚其義亦罕見冧爆笑容。晚飯後，兩人齊齊駕車返回西貢澳頭村的愛巢。
本宮都冇你咁好服侍喎！（設計對白）
簡慕華和戚其義拍拖，已經是公開的秘密，不過兩人從不承認，就算是《金枝貳》劇組食飯合照，兩人中間都要隔住個伍詠薇。
拒認戀情
戚其義與簡慕華同屬低調之人，多年來彼此只稱對方是「好朋友」。不過，簡慕華曾在專訪中露口風，兩人是在 01年拍電視電影《鐵翼驚情》時邂逅：「阿戚（戚其義）後來同我講，見我經常一個人孭住背囊上班下班，似學生一樣，傻吓傻吓咁。」
事業上戚其義一直是簡慕華的伯樂，由《金枝慾孽》行行企企的宮女汀蘭，到《心戰》的心魔，簡慕華在戚其義劇集中戲份愈來愈重、亦愈來愈搶。《金枝貳》簡慕華做如妃近身爾荷，幾場鬧交戲更是戚其義為女友度身訂做。
「拍攝《金枝貳》時，阿戚（戚其義）臨場加咗唔少戲俾 Rachel（簡慕華）。 Rachel第一次孭重戲好緊張，試過壓力大到拍拍吓喊。阿戚即刻停機安慰女友，大家都係知佢着緊 Rachel前途！阿戚離開 TVB前，同其他監製打晒招呼，叫大家睇住 Rachel。阿戚喺 TVB三十幾年，好多監製俾面佢，加上 Rachel啲戲 OK，佢哋都樂意幫手。好似 Rachel喺《舌劍上的公堂》都佔戲幾重，皆因嗰套劇嘅監製李艷芳跟過阿戚。」知情者說。
5月 4日坑口會男友
傍晚時分，簡慕華車友人由荃灣去將軍澳坑口村，和男友戚其義會合。
輕扶纖腰
和朋友飯局前，簡慕華玩咗十多分鐘單車，戚其義輕扶女友上車。
揸情侶車
兩人在十一時各自揸車回愛巢，兩架車在屋前空地泊埋一齊。車款同屬豐田 Porte，車價約為 17萬。
秘居西貢
兩人的愛巢位於西貢澳頭村，所住的 700呎單位，月租約為一萬元，勝在附近居民少，私隱度高。
親自教戲
對於《金枝貳》孭重戲，簡慕華在上周一（ 29日）直認拍攝時緊張到忘記對白，要戚其義教路兼安慰。而她去年拒過檔王維基，亦是為了拍好戚其義這套告別作。
記：戚其義加咗戲俾你喎！
簡：冇話特別加戲，我跟住如妃，觀眾點都會見到我，戲份自然多。
記：王維基曾搵你過檔？
簡：我推咗啦！
記：因為阿戚，所以推王維基？
簡：絕對係，嗰時未知《金枝貳》係佢喺 TVB最後一個劇，但我覺得一定要拍。
記：你嘅戲仲搶過如妃喎！
簡：可能開頭我負責搞事，所以觀眾注意我啦，其實搵我做都有啲冒險，因為好多場口都有我份。
記：拍攝時好大壓力？
簡：試過 roll機時突然乜都唔記得，搞到我喊咗出嚟，好彩監製（阿戚）俾我再拍過。佢喺現場，都有安慰我。
記：近年有好多監製搵你拍劇，你爆晒 show喎？
簡：哈哈，都係儲番嚟。
記：會唔會同無綫提出加薪？
簡：仲有一年約，邊有咁快傾續約呀！
本刊後來發現兩人同居，曾致電簡慕華詢問同居一事，但她截稿前未有回覆。
上周一（ 29日），為新劇《守業者》試造型的簡慕華直認因為戚其義而冇過檔王維基，更指如男友需要幫忙，她會向 TVB請假為男友拍劇。
監製李艷芳 10年回流，由於她久疏戰陣，故有一段時間協助戚其義拍劇。戚其義叫到，她便安排簡慕華在《舌劍上的公堂》做黃翠如家姐，是第三女主角。
戚其義對女朋友有情有義，就算是對舊女友邵美琪，他都一直照顧，開劇好多時都預她一份。
網民 like爆
簡慕華畢業於香港科技大學物理系， 00年參選港姐，在問答環節表示唔驚曾志偉做司儀（右），仲對曾志偉話：「有嘟姐睇住你，佢會幫我哋（港姐）毒死你！」而獲得全場掌聲。
07年，簡慕華和黎耀祥在《同事三分親》飾演情侶（上圖），一度被視迷稱為「 A貨王菲」。除了戚其義作品，近年簡慕華在《回到三國》及《護花危情》的演出都令人留下深刻印象，而視迷對她在《金枝貳》的演出亦有讚冇彈。
阿戚力捧
簡慕華入行十多年，拍攝電視劇逾 80套，當中不少都是戚其義作品。例如在 08年播出的《珠光寶氣》飾演黎姿的同事、 11年在《天與地》飾演佘詩曼好友，雖然戲份未必多，但因為黐住主角，令簡慕華曝光率甚高。近年在戚其義的劇集，簡慕華所佔戲份亦愈來愈重，出鏡率及發揮程度絕不遜色於一線花旦。
初演金枝
簡慕華在 04年的《金枝慾孽》已經飾演宮女，同張可頤仲有不少對手戲，這亦是她首套演出戚其義的劇集。
被辱村姑
06年在《火舞黃沙》飾演徐榮老婆，劇中她慘被馬賊污辱，又自殺不遂，戲份唔多，但表現甚為搶鏡。
挑逗陳豪
在去年的《心戰》中，簡慕華飾演代表色慾的心魔。由於造型突出，加上有挑逗陳豪的戲份，為她帶來不少媒體訪問。
搞笑情侶
去年簡慕華在《 4 In Love》飾演蕩女 Hayley，更升呢為其中一個單元的女主角，與金剛有一段搞笑的感情線。