忽然1周 第930期

小本製作《情越海岸線》首周平均收視 25點，跑贏《金枝慾孽貳》外，劇中李詩韻、李綺雯（o靚）等女演員搏命演出，惹起網友熱烈討論。據知《情》劇下周將會集中火力講朱璇與張國強婚外情，劇中朱璇為了拆散張國強頭家，出動三點式兼剝男方條褲，最後假扮人妖叫對方摸自己，極重口味。

朱璇戲內豪放，現實一樣姣到出汁。有劇組人員爆料，指朱璇一早已吼實人夫張國強，埋位前藉詞叫男方教做戲，不時胸頂男方手臂，大送波餅。朱璇周日（ 19日）宣傳《情》劇時更自爆：「佢唔介意俾我抽水。」

姣佘佘詩曼北上搵真銀，看來無綫新一代姣精後繼有人。

朱璇接受訪問時，不停對住記者笑淫淫，姣勁十足，她更承認經常向張國強抽水。而張國強亦暗指朱璇發姣，仲話「係佢特色」。

劇中朱璇着泳衣勾引張國強，雖然二人相差 26年，但外形頗襯。

年 26歲的朱璇 08年加入無綫。北京出世，曾於巴黎留學的她，廣東話唔鹹唔淡，聲線嬌嗲，加上 33C逼爆上圍，令不少與她合作過的男藝人紛紛中招，被她電暈。一班已婚男藝人亦零舍對她避忌，費事桃色禍上身。

主動攬髀

5月 8日，《情越海岸線》首次宣傳時，朱璇已發動狼死攻勢，主動抱起張國強大髀，非常肉緊。

水底夾下體

張國強 1988年與圈外女友結婚，二人育有兩子一女，十分恩愛。結婚 25年來，張國強鮮有緋聞，估唔到被發電廠朱璇打爛齋缽。

不過，朱璇深知放電發姣令她工作上更加得心應手，故近年變本加厲，愈姣愈勁。去年 4月，朱璇接拍《情越海岸線》，劇中她飾演嘗盡情傷的小三，戮力拆散張國強與盧宛茵的美好家庭。為了將張國強據為己有，劇中朱璇着三點式游水時不惜扮浸親，要張救她上岸，又扮病要張上門陪她睇醫生，但最後竟然身穿吊帶喱士睡衣主動攬錫男方，更一手扯低男方條褲，認真飛擒大咬。最後更假扮人妖，叫張國強摸自己檢驗是否女人真身，認真重口味。

不過朱璇假戲真做，視現實生活已有老婆仔女的張國強為理想對象，經常借頭借路親近對方，一班劇組人員看在眼內，都認為朱璇今次實在姣得離譜。一名工作人員說：「好似朱璇浸親嗰場戲，明明導演已經嗌咗 cut，但係朱璇仲用對鉸剪腳夾實 KK（張國強花名）下面，又好嗲話要 KK快啲抱佢上岸。平時一班演員放飯，朱璇螞蟻嘍蜜糖咁，要同 KK一齊坐，仲成日要 KK教做戲。有時佢哋坐到好埋，朱璇明知個胸頂住 KK手臂都唔介意。」

張國強：我唔會佔便宜

不過女人做主動，未必每位男士都照單全收。好似結婚已 25年，今年 52歲的張國強，原來曾就朱璇姣黐一事略有微言，更試過三口六面叫朱璇檢點。知情人士說：「 KK真係好好先生嚟！佢拍到半路覺得朱璇性格真係熱情咗啲，驚俾人講閒話，咪當教女咁，叫朱璇避忌吓，唔想佢蝕底咁話喎。」

周日（ 19日），一眾演員宣傳《情》劇。記者就此事問過張國強，得悉記者來意後，便煞有介事說：「佢真係好放，但我冇佔佢便宜呀！平時坐埋一齊都係同佢對戲啫！（佢有冇嗲你呀？）哦！佢嗲都係因為佢廣東話發音問題啫，呢個係佢特色。（拍劇時頂唔頂得順呀？） OK啦！ OK啦！我坐懷不亂！」對於姣黐張國強，朱璇則直認不諱，她說：「係呀！我成日繑實佢，佢都唔介意俾我抽水。其實初時我同 KK唔係好熟，對住佢好緊張，後尾係佢叫我放啲，我先冇乜壓力。我唔介意人哋話我姣！」看來朱璇為了姣上位，不惜豁出去。