每當提起莊思敏這個名字，不少人都只會聯想到「假胸」、「整容」。
大家可有想過一個女人選擇做隆胸、溶脂瘦面手術兼且公開承認，甚至不介意站出來讓外界指指點點，是需要何等的勇氣？娛樂圈中繼樂基兒後，只有莊思敏肯企出來。敢做敢愛，就是她的座右銘。
「我隆胸係方便我嘅工作，亦無必要收埋唔講，始終紙係包唔住火。
如果第時另一半唔鍾意都唔會拆，最多做愛時佢唔好掂囉！」

性愛態度——唔可以冇高潮！

R:記者　 J:莊思敏

R:　點睇香港嘅性教育？
J:　香港嘅性教育好貧乏，睇電視見到廣告話「性教育由父母開始」。政府依家先推行兼要啲家長去正視都算係遲，但都好過無。
R:　政府後知後覺，咁你父母自小有冇教過你任何性知識？
J:　我父母係保守型，媽咪從來冇教過我性知識，我只係喺同學仔度聽番嚟咋。
R:　第一次有性行為係咪一知半解？
J:　咁又唔會。我第一次嘅時候對性已經有認知，亦清楚知道係咩一回事。
R:　當時幾多歲？肉帛相見有冇尷尬？
J:　當時 17歲，一啲尷尬都冇喎！
R:　有冇做足安全措施？
J:　當然有啦！就係因為我知道做愛係咩一回事，亦知道要好好咁保護自己，但我知依家好多女仔都唔係好識囉！
R:　有冇試過一夜情？
J:　冇！我唔會接受一夜情，冇必要去做一啲令自己後悔嘅嘢。我身邊朋友好熱愛性生活，接受同好多人發生性行為，但佢要承受有機會搵唔到真心鍾意嘅另一半。我認為「做愛」並唔係「性行為」，因為當中要存在愛先有呢個行為。
R:　做愛之前會唔會搞吓啲咩花臣？
J:　事前唔會有咩特別安排， feel到想做咪做囉，我會好好享受做愛嘅過程。有時為咗令大家都有新鮮感，會試吓去唔同嘅環境做愛，或者用誇張嘅動作，只要唔斷手斷腳都會儘管試！哈哈！

男友唔鍾意……我都唔會拆

R:　高潮對你重唔重要？
J:　（提高聲線）重要！呢樣嘢係雙向，唔能夠只滿足咗個男人，而女人冇，對我嚟講冇高潮係唔得喎！
R:　冇高潮時你會點？
J:　當然試過冇高潮啦，我會向對方提出用其他方法囉！平時做愛頂多只係大半個鐘。
R:　如果男友抗拒你隆胸你會點？
J:　如果男友唔鍾意我隆胸，我都唔會拆，最多做愛時佢唔好掂囉！咁都唔得，肯定分手唔使傾啦！
R:　你依家個 cup數（ C cup），比例會唔會覺得大咗啲呢？

依家嘅手感都唔錯！

J:　唔覺呀！呢個 size係醫生建議嘅，佢哋專業嘛。
R:　隆胸後工作同生活上有冇咩唔同咗？
J:　好多時啲工作要着晚裝或婚紗，依家確實着得靚過之前，以前要靠 nude bra同好多墊先有澎湃效果，隆完之後真係方便咗好多。平時生活冇咩唔同，公開咗隆胸後，就預咗有人唔鍾意。
R:　隆胸後手感會唔同？
J:　手術後要不停按摩，依家手感都唔錯?！男仔點睇隆咗胸嘅女仔我真係唔知。有個男性朋友交過無數女朋友，身材由 A cup到 D cup，真假都試晒，佢都話唔覺有咩唔同！
R:　既然會有人唔鍾意，仲會唔會鼓勵女性朋友去隆胸？
J:　唔會特別鼓勵！不過，只要佢自己考慮清楚，能夠承受到手術風險，唔後悔咪去做。我最接受唔到女性朋友係為咗o氹另一半開心而去做，男朋友同老公，將來都有機會分開，要做就要為自己而做。

撰文：李家碧
攝影：周義安
化妝： Kenneth Wong@Beauty Kingdom
髮型： Roy Yung@Beauty Kingdom
服裝： Dorian Ho
形象： BO BO LI

（忽然1周 第936期）