忽然1周 第937期

苟芸慧因與城城傳緋聞騷價勁升，最近卻因體重暴升至 150磅變「肥苟」，痛失纖體廣告新合約，見財化水。原來纖體公司以 70萬要求苟姑娘減肥穿三點式拍攝新一輯廣告，可惜苟姑娘恍如中了「不瘦降」，最終冇得續約， 39歲的陳煒以 60萬搶灘做新一任代言人。

一向肯搏肯露的陳煒，去年過檔無綫後，發展不及同是亞姐出身的萬綺雯，更不忿去年尾拍《瘋狂歷史補習社》扮潘金蓮時，穿性感衫拍出浴鏡頭，她大吐苦水︰「唔明白綜藝節目點解要暴露！」

39歲嘅陳煒，仍可保持 34C、 24、 35嘅驕人身材，唔怪得煒哥獲得廣告商青睞。

30歲苟芸慧近期脹爆，雖然話減肥，不過減極都有雙下巴、麒麟臂，因而令纖體廣告商卻步。

苟芸慧體重同知名度成正比，早前更被拍檔梁烈唯取笑她似河馬。肥苟成笑柄，令本來打算與她續約的纖體公司卻步，改由形象性感的陳煒做代言人。問到是否揮低肥苟，陳煒得體地說：「叫人哋做『肥苟』，對女仔係好大傷害。冇話揮唔揮低，係纖體公司想轉個性感同高貴嘅形象，覺得我適合咁啫。酬勞都好滿意，有 6位數字。」

問到纖體公司以 60萬換代言人一事，發言人陳小姐解釋：「我哋最初係諗過同苟芸慧續約，但各方面都配合唔到。陳煒身材我哋好滿意，佢嘅酬勞……總之唔過百萬啦。」而痛失新廣告合約的苟姑娘則避重就輕解釋︰「點解冇咗個廣告？我冇 follow up，不過我知另外有幾個纖體廣告傾緊。」

扮潘金蓮受辱

煒哥向來唔抗拒性感，但去年年尾她在綜藝節目《瘋狂歷史補習社》中扮潘金蓮，令她心中一直有條刺。煒哥話：「我去到至知導演將我演潘金蓮的戲服拆頭拆尾，我都唔明點解要拍到咁出位（暴露），嗰下好唔開心！都係綜藝節目啫，冇必要個個 shot都咁。（導演拍得衰？）我知佢係 freelance，當時真係幾唔開心，因為全場都係男人。所以我都要求有個服裝女仔喺我身邊。有唔少同事戥我唔抵。之後個導演仲打過幾次電話俾我，游說我再拍，但我真係接受唔到，我真係唔明佢點解咁拍。」

在《瘋狂歷史補習社》中，陳煒被安排扮演潘金蓮，導演要求佢露胸露髀露背。一個綜藝節目都要暴露演出，至今煒哥提起此事都耿耿於懷。

煒哥同萬綺雯昔日都是亞視當家花旦，但轉會無綫後，萬綺雯部部都係女主角，而煒哥就做女配角。幸好煒哥睇得開：「大家形象唔同，嗰段時間公司開嘅戲適合萬綺雯，咁佢多戲拍係正常。依家我拍緊《 ICAC》，喺入面做一個女商家，個角色都好有發揮，十月份又開新劇。（你喺亞視做一姐，過到嚟做二線喎！）冇所謂，咁多年前嘅事。」問到以外援身份在無綫拍劇被歧視，煒哥圓滑說︰「唔覺喎，我好遲鈍，從來唔留意人哋發生緊啲咩。」肯性感又少是非，相信就是煒哥在娛樂圈吃得開的必勝技。

身形甚弗嘅陳煒已經唔係第一次接拍纖體廣告，不過為求效果更好，拍攝前一周，她每日跑步一小時，令線條更佳。

家有四貓嘅陳煒，今次嘅廣告要佢玩貓，對佢嚟講簡直 easy job。

陳煒同老公顏志行分隔兩地，只係靠傾電話及 WhatsApp維繫。好在佢老公唔睇娛樂新聞，唔介意陳煒行性感。

色即是胸

96年， 23歲的陳煒憑勻稱身材， easy KO對手摘去亞姐后冠，她接拍《我和殭屍有個約會》後，升呢做亞視一姐。 06年她更半裸拍王晶的《提防老千》，自此便開始性感之路。

真空上陣
在電影《提防老千》中，陳煒要半裸同王晶水戰，亦要與張家輝有連場肉搏。

露肉籌款
去年《歡樂滿東華》，陳煒低胸跳肚皮舞籌款，成為全晚焦點。

投懷送抱
陳煒去年加入無綫，於首部劇集《法網狙擊》就要三點式上陣，與郭政鴻埋牙親熱。