忽然1周 第939期

林峯去年中被19歲嫩模吳千語征服，兩人拍拖未夠一年，已多次傳出婚訊。

據知恨做「峯嫂」的吳千語，多次向林峯逼婚，不過男方一直唔嗲唔吊。上周三（17日），有頭等艙乘客目擊吳千語乘飛機由杭州回港，起飛前在頭等艙致電林峯，催逼他交上時辰八字，給予同機的麥玲玲師傅擇日成婚。

記者接到爆料消息後跟進，獲悉林峯一直採取拖字訣，未肯提供時辰八字給女方。看來吳千語要做峯嫂，還須努力加多啲電力。

外間一直認為林峯好愛吳千語，拍拖大半年，他已豪花過千萬在女友身上，包起女方衣食住行之餘，還公開發表「七愛」肉麻宣言。早前他說：「我三字頭啦，個個男人都有呢種諗法（結婚），我都好鍾意小朋友。」為鋪路娶 BB過門，俾足心理準備大家。

外間一直認為林峯與吳千語愛得如膠似漆，但原來野蠻女友卻不得林父林母歡心，入豪門仍要等吓。《蘋果日報》圖片

BB，你冧掂我老竇先講！（設計對白）

跟得女友
日前（ 13日），《壹週刊》拍得吳千語陪林峯到橫店開工，二人公然在片場調情，好煙韌。

機艙催攞八字

前周六（ 13日），吳千語陪林峯到橫店拍內地劇《大漢賢后衞子夫》。四日後（ 17日），她獨自由杭州乘搭港龍航空的頭等艙飛返港，不過飛機延遲了半小時起飛。其間有乘客見到吳千語一直電話不離手，與話筒中的林峯傾唔停。此時，吳千語見到麥玲玲坐在她前排座位，即興奮地將電話遞給對方，讓麥與林峯傾談一會。之後，吳千語繼續大聲向電話那方講：「師傅喺度呀，你仲唔俾個時辰佢擇日？吓！你唔係仲未知呀？你冇問你阿爸阿媽?……佢哋會唔知你時辰八字？你好依家就打電話俾佢哋問啦。飛機仲有半個鐘起飛。我唔理你呀，你今日好話俾我聽呀！」
吳千語愈講愈大聲，其他乘客亦不時對她眼望望。以下一段對話，更令到其他乘客聽到眼凸。原來在吳千語上機返港的同時，林峯亦同時身處上海機場。豈料大懵的他竟將回鄉證留在橫店酒店房內。冇助手在身邊的林峯惟有向吳千語苦呻，未料她竟是一位不懂溫柔的野蠻女友，還對着電話咆哮：「抵你死啦，咁大個人都唔知要帶回鄉證出境，仲擺咗喺酒店，你今晚瞓上海機場啦！ you deserve it！（你應得嘅）」
嘲諷完林峯，吳千語終於重回正題，對他說：「去峇里啦！吓，你唔係驚呀？我唔理呀，我唔去三亞?，嗰度咁 cheap。」據知吳千語一直渴望搞陽光與沙灘婚禮，她亦希望趁近日有空檔約林峯到峇里旅行兼睇景，可惜「峯峯豬」唔領情。

機艙度期
上周三（ 17日），有頭等艙乘客爆吳千語見到麥玲玲後，心情大靚與對方打招呼，還讓對方與林峯傾電話。

問攞八字
見到麥師傅後，吳千語隨即向電話另一邊的林峯，問他攞時辰八字俾師傅擇日結婚。不過林峯藉詞推搪，表示仍未問父母攞八字。

父母反對婚事

林峯對 BB愛到發燒，但對婚事卻唔嗲唔吊。原來林父林母一直對吳千語印象麻麻。今年 5月，林峯帶埋吳千語、父母和堂妹林夏薇齊齊飛到美國洛杉磯，出席胞弟林逸洺的畢業典禮。有觀禮者就目睹林父林母全程與吳千語零溝通，當她透明，連林夏薇亦親證吳千語與林父「一張合照都冇」。可見吳千語仍未冧得掂林父林母。

據知情者說：「阿峯都想同千語結婚，不過佢爸爸林華國喺商界打滾咁多年，梗係挑通眼眉。佢勸林峯遲啲先囉，話晒女仔仲細，叫佢哋拍多幾年拖先。」一向以家人為先的林峯，亦不敢違抗父親意旨，刻意在吳千語面前避談婚事。
就千語在機艙向麥玲玲擇日結婚一事，本刊問過麥師傅，她最初大方承認：「我係同佢（吳千語）同機返港，佢好有禮貌同我打招呼，仲俾個電話我同峯仔講幾句。（係咪搵你擇日結婚？）吓……其實佢哋命格幾夾嘅，佢哋好襯呀，遲啲仲話約食飯。」可惜吳千語都未冧掂林父林母，擇日都冇用啦。

專人服侍
升呢做「峯嫂」，吳千語從杭州回來翌日（ 18日），即到置地名店掃貨。到名店 Carven試裙時，更有職員專人在旁服侍。

即買即着
周三（ 24日），吳千語到尖沙嘴出席活動時便穿上日前在 Carven購買，價值港幣$4,190的橙色連身裙。對於在機艙問林峯攞八字，吳千語最初表現愕然，然後拋下一句：「唔答！」此時助手即拉她返入後台。

早前，吳千語被拍得與雜誌編輯約會，有指林峯知道後嬲到震。但未幾林峯已在微信將大頭相轉為他與吳千語的恩愛合照，力證情未變。

合家觀禮今年 5月，林峯高調帶吳千語到美國參加其弟的畢業禮。席間林父林母沒有與她交談及合照，可見雙方關係一般。

麥玲玲：下年唔結就分

雖然千語 BB仍未將峯峯時辰八字攞到手，但據麥玲玲師傅透露， 79年出世屬羊的林峯和 93年出世屬雞的吳千語，單以生肖來說是很夾的。二人下年更是結婚好時機，可是若然二人結唔成婚，卻要面臨分手危機。麥說：「吳千語嘅命格金土比較旺，至於林峯本身命格係好遷就女友，變相女方應該下下食住男方。下年林峯會紅鸞星動，不過同一時間，佢同女友會有波折，如果下年關係冇突破，就好容易分手。」千語 BB真係要把握時機啦！

御峯術

去年，林峯被吳千語徹底攻陷。唔使一年，吳千語就冧掂對方買車租樓兼黑卡任碌。林峯豪花過千萬亦面不改容，可見他有幾冧女友。

包養家人
有指吳千語家境一般，自細與父母住沙田沙角邨。不過自從與林峯拍拖後，有指男方為她租下 8萬月租的麥當勞道高雲大廈千呎單位，兼用 50萬為她買傢俬。愛屋及烏的林峯，亦以月租 9萬租下堅尼地道金纓閣二千呎單位給吳的父母居住。

買名車
年初，吳千語風騷表示考緊車牌。之後便冧掂林峯買部 320萬的 Aston Martin超跑給她代步，並要求以其父名字登記做車主。

黑卡任碌
年初，林峯在 19日內與吳千語遊東京、冲繩及米蘭三地。有指她訂了 5個總值 150萬的 Hermès Birkin袋。全個行程使費超過二百萬，全由林峯埋單，林峯更俾了一張「黑卡」附屬卡讓女友購物。