1折拍彭浩翔新戲 古天樂搶陳奕迅飯碗

忽然1周 第941期

近年,彭浩翔導演的《春嬌與志明》、《低俗喜劇》,甚至上月尾上映的《飛虎出征》,清一色低成本製作,不但票房叫好又叫座,更令楊千嬅初登影后,點鐵成金。

最近彭浩翔再開拍《曼珠莎華》,成本只得千八萬,好在老拍檔楊千嬅以四年前舊價100萬接拍。據知彭浩翔初時本來意屬陳奕迅做男主角,不過Eason片酬企硬,而一直想與彭浩翔合作的古天樂,睇重彭導可以幫他攞影帝,竟然肯將千萬片酬降價九成至百萬接拍,輕易搶走Eason飯碗。男女主角古天樂和楊千嬅加埋片酬二百萬,就連檔期亦以《曼》片(前名《香港仔》)優先,彭導演認真大面。

1折拍彭浩翔新戲 古天樂搶Eason飯碗

成為香港電影icon的彭浩翔,去年為文藝溫情片《曼珠莎華》搵男主角時,最先意屬陳奕迅。彭浩翔曾透露︰「部戲要千八萬內搞掂,演員冇可能收正價演出。」不過Eason企硬二百萬片酬,其間一直拉鋸,古仔收到風後主動出擊。

「Eason片酬企硬,佢經理人陳家瑛又嫌角色太癲喪,加上拍攝時間撞正Eason演唱會,攞期會好緊。其實古仔一直好欣賞阿彭(彭浩翔),係佢主動同阿彭講自己有興趣演出。古仔知道今次個男主角好突出,佢好恨攞獎,咁阿彭都有攞獎保證,所以古仔寧願劈價接《曼珠莎華》,只是象徵式收番電影分紅,阿彭梗係舌累飯應。」知情者說。

其實古仔收開8百至1千萬片酬,今次接拍《曼》片只收1百萬。而同期拍攝的《單身男女2》,古仔不但收足導演杜琪峯8百萬片酬,而且檔期更優先放俾彭浩翔,杜琪峯知道後當然唔高興。「其實古仔本來唔想接《單身2》,但杜Sir話《單身1》收得,打晒人情牌希望古仔幫手,古仔冇得推。而同樣身兼《單身2》及《曼》片女主角嘅楊千嬅,見古仔優先拍《曼》,咪有樣學樣,諗住快手俾期拍完彭浩翔,費事兩頭忙阻住湊仔!男女主角都係咁,難怪杜Sir谷到一肚氣。」

1折拍彭浩翔新戲 古天樂搶陳奕迅飯碗
6月,古天樂到北角警署為《曼珠莎華》拍外景,古仔心情大好,拍咗三 take就搞掂。
1折拍彭浩翔新戲 古天樂搶陳奕迅飯碗
上周二出席《單身男女 2》拜神,古天樂烈日當空繼續 chok,杜琪峯就頂唔順頻頻抹汗。

千嬅認收舊價

上周二( 30日)《單身男女 2》的拜神活動中,記者向古仔求證 1折片酬接《曼》片。惟古仔聽完問題後,即被經理人 Ronny拖走。反而千嬅卻直認由 3百萬減至 1百萬接《曼》片:「其實喺《志明與春嬌》之前,已經有《香港仔》(《曼》片前名)劇本。臨簽合約時,係阿彭話不如拍咗《志明與春嬌》先,至遲咗拍《香港仔》。傾嗰時係 4年前,所以收舊價。(你同古仔都優先俾期拍《曼》片?)唔係呀,同杜 Sir 3月已經開工,阿彭就 6、 7月先開工,《香港仔》爭少少就埋尾。」彭浩翔遲來先上岸,仲話唔係優先俾期!

上周五( 2日)記者詢問彭浩翔,他直認古仔減價演出,「古仔係平咗俾我嘅,但實際數字我唔清楚。(千嬅都係收番舊價?)嗯……差唔多啦。」不過問到有冇同杜 Sir為演員爭期,他就避而不答:「總之我未拍完!(你曾經話呢套戲 Eason有份,係咪因價錢唔啱,改咗用古仔?)寫劇本嘅時候根本未定邊個。」彭浩翔隨即被工作人員拉開。

至於投資《單身男女 2》的海潤影視,總裁樂小姐亦認有撞期︰「我唔知人哋俾幾多錢片酬(古仔),總之我哋俾嘅係合理價。至於古仔同千嬅撞期嘅情況唔嚴重,都 OK。」
Eason經理人公司陳先生,對 Eason冇得拍《曼》片就推說撞期:「 Eason嗰段時間撞咗期,佢要開演唱會。」男女主角割價拍攝又優先俾期,彭浩翔撐本土文化都有價值!不過同期俾足片酬拍《單身男女 2》的杜 Sir當然不是味兒。


上周二,記者一問古仔是否優先俾期拍《曼》片,他即被經理人 Ronny拖走。

《單身男女》中港大收過億,難怪杜琪峯要搵古天樂拍續集。

千嬅早在 3月已為《單身 2》拍遊艇景,但拍足 5個月仲未完,皆因檔期要就《曼》片。問到兩套片有否搶演員檔期,千嬅笑住 hea過,但就坦承以舊價拍《曼珠莎華》。

彭浩翔旺演員

杜琪峯獲獎無數,不過近年除《奪命金》外,其他影片都冇獎攞,作品在港票房亦麻麻,不過在大陸就部部收幾千萬。相反,彭浩翔則是當頭起,楊千嬅憑《春嬌與志明》擊退鄭秀文成為影后,《低俗喜劇》又令 DaDa(陳靜)首獲金像獎女配角,兩部電影都以刀仔鋸大樹,香港票房大收,不過就冇大陸市場。


被問及有冇同杜琪峯撞演員檔期,彭浩翔避而不答。
1折拍彭浩翔新戲 古天樂搶陳奕迅飯碗