忽然1周 第942期

李詩韻入行 10年，掹車邊叫做一線，不過距離當紮花旦之路仍然很遠。感情未有着落，星途浮沉的她，亦要靠耍手段上位。最近她和林夏薇、馬國明等拍古裝劇《寒山潛龍》，據知不甘屈就做第二女主角的她，暗中向監製羅永賢要求加打戲，最後變成劇中第一女角，林夏薇的戲份亦因而被 cut。

日前李詩韻向本刊風騷直認獲加不少打戲，至於輸家林夏薇則話中有骨說：「人哋點做我唔理，我自己就唔會做呢啲嘢！」

兩女爭戲
不想屈居第二線的李詩韻，罕有積極練武兼主動向監製??打戲，成功博得戲份。收到風的林夏薇，即還擊指有人搞分化。
監製係加咗我打戲！（真實對白）
我唔會做呢啲嘢！（真實對白）

今年五月，原定陳茵媺、李詩韻及馬國明合作新劇《寒山潛龍》，不過在開劇前兩周，陳茵媺因有孕而推劇，最後林夏薇臨時拉夫頂上。劇本及戲份最初維持不變，執二攤的林夏薇，變相冷手執了第一女主角的好籌。

羅永賢監製曾起用李詩韻拍《拳王》及《大太監》，今次再搵她做女主角，明益她。
我係偏心！（設計對白）

練武自薦

據知《寒》劇中，主線圍繞捕快查案，林夏薇飾演女捕快，與馬國明、敖嘉年及陳國邦都有不少對手戲兼由朝打到黑，對於演慣乖乖女的林夏薇算是大突破。而李詩韻則在劇中一人分飾兩角，包括馬國明的妻子（後去世）及名妓殷媚娘，打戲唔多，戲份亦少過林夏薇一大截。據知李詩韻最初得知林夏薇代替陳茵媺時感到相當不滿。

知情者說：「詩韻做咗咁耐，都冇機會做第一女主角。原本佢以為 Aimee（陳茵媺）唔拍有機會食埋佢個位，點知俾林夏薇搶咗女一。詩韻好嬲，同班朋友勁呻，話人未夠班做女主角，都係靠林峯先有後台撐。不過詩韻好精，事後主動走去同監製講，話自己有跳舞底，為咗呢套劇，仲專登學咗三個月功夫，希望監製可以俾佢發揮吓。監製見佢咁搏，叫詩韻即場打幾下俾佢睇。監製睇完覺得 OK，叫班編劇改動劇本，加多啲打戲俾詩韻，就係咁，夏薇戲份相應減少。講真，其實做名妓使鬼打戲咩，不過監製叫到，班編劇咪局改囉！」

馬明：我知佢加戲
林夏薇原本在劇中與馬明一對，結果遭李詩韻出陰招搶戲成功。日前記者訪問劇中男主角馬明，他亦表示有聽過傳聞。「我知監製加咗詩韻好多打戲，都好嘅，我同夏薇唔使打得咁辛苦。」

風騷晒一字馬
上月，李詩韻出席《寒山潛龍》開鏡，自動波擺出一字馬甫士。

食飯玩杯葛

據知在劇中，飾演捕快的林夏薇，原本和捕快阿頭馬國明會有感情線，但據知李詩韻為防林夏薇角色太搶，竟向監製反建議指自己飾演嘅名妓，若與捕快拍拖，比同是捕快拍拖戲味會更濃，慫恿監製再次改劇本，此舉終辣?林夏薇。一向人緣較佳的林，近日拍劇放飯時，吹雞叫其他同劇演員上公司 canteen食飯，唯獨冇嗌李詩韻。

生人勿近
成功搶戲但人緣麻麻的李詩韻，平日甚少跟同劇中人打交道。本刊連日觀察，她都只和曹永廉食晚飯，相當獨家村。

風騷認加戲

早前，有傳陳茵媺與李詩韻合作拍《情越海岸線》時，陳嫌對方奀，如今陳推劇，由林夏薇頂上，又輪到李詩韻不滿林未夠班。

日前，在《寒山潛龍》的開鏡儀式上，李詩韻風騷向記者直認加戲份一事：「我同監製（羅永賢）講有跳舞底同近排有練武，佢即刻加咗好多武打戲俾我。不過大熱天時着古裝，仲要化濃妝拍打戲，我驚熱到溶妝，要不停補妝。（係咪減咗林夏薇戲份而加重你嘅戲份？）呢啲我唔講啦，不過我今次真係好俾心機去演！」

至於林夏薇最初裝傻話：「我都係臨開劇前兩日先入組，劇本都未收齊就要拍，都唔知有幾多戲份同有冇改動過。（李詩韻自薦加打戲，削咗你戲份喎。）（面色一沉）係咩？唔知佢有幾多戲，只知佢一人分飾兩角。其實人哋點做我唔理，我自己唔需要做呢啲嘢囉，亦從來都唔會做。」好有火！

微博開戰

李詩韻及林夏薇近日各自在微博晒命，前者晒自己搏命，後者就多人撐。

分飾兩角
李詩韻晒自己一人分飾兩角，戲份夠搶。

晒腳傷
打到七勞八損，李詩韻晒雙腿瘀傷，力證自己搏命。

大堆頭
林夏薇勝在人緣好，休息時都會和同劇演員開餐。

黐涉毒妹
林夏薇連早前曾傳涉毒的張慧雯都照黐，但卻冇和李詩韻合照。