忽然1周 第942期
拍《葉問》成為「宇宙最強」的甄子丹，傳佢因為《葉問 3》改由黃百鳴個仔黃子桓做導演而拒演。唔做葉問唔緊要，丹爺近年接拍唔少電影，年初又泊到林建岳大碼頭成立電影公司， keep住人氣與財氣。
去年甄子丹狂吸逾 1.15億人民幣打入福布斯中國名人榜榜首，辛苦賺錢都係為咗個家。今年 4月他即以 1.35億買入港島摩星嶺道獨立屋，並把八成業權送給太太汪詩詩。新屋正日夜趕工，預計明年初入伙。
甄子丹唔止錫老婆，仲係個好爸爸，日前不用開工，親自抱病咗嘅囝囝 James去中環睇醫生。鐵漢對住老婆仔女，盡顯柔情一面。
甄子丹於 4月中買入的獨立屋位於摩星嶺道，每幢設有私家泳池，巨型前後花園及私家升降機。因進行大裝修，全屋搭上棚架及用網封實。
甄子丹五年前憑《葉問》令演藝事業重獲新生，捱得打得的他更被喻為「宇宙最強」。這幾年間他主演的電影一部接一部，最近他為電影《一個人的武林》兼任動作導演及男主角，與內地當紅男演員王寶強打到飛起，更觸及腰部舊患，要負傷開工。
片酬最強
年屆 50歲的甄子丹毫不錫身，危險動作都親身上陣，難怪有傳他接戲叫價最少 3千萬，兼任監製再收多 2千萬，其天價片酬已力壓不少影帝，單是今年已接拍四部電影。密食甄子丹年賺過億，為令家人再住好啲，今年 4月他以 1.35億買入摩星嶺道的御海園 4千多呎獨立屋。據土地註冊處資料顯示，該物業的八成業權由汪詩詩持有，甄子丹只佔兩成。
香港樓市仍然高企，甄子丹夠膽以過億入市，可見他對香港樓市前景充滿信心。知情人士透露，「間屋係詩詩揀嘅，佢好鍾意住獨立屋，地方夠大又有私隱，加上佢哋住開嗰區，方便兩個小朋友返學。丹爺向來好錫老婆，佢都認為買屋可以保值，況且獨立屋個價企得好穩。今次全部由詩詩話晒事，丹爺只係負責俾錢，仲將八成業權送俾老婆，當係今年結婚十周年嘅禮物。間屋樓齡都有十年喇！要全間屋大裝修，都好大工程，搞得嚟最快都要年底先完工。最近詩詩不時四出睇傢俬同家居用品，乜都親力親為。」甄子丹唔止送樓以示愛妻，他早前還在腰間紋了以草書寫成的「詩」字。
本刊記者曾到大屋視察，樓高四層的大屋外圍搭建了棚架，用網封到實，地下大廳放滿裝修材料。 8月 1日，汪詩詩由碧瑤灣寓所出發，親身到大屋監工，不過現場沙塵滾滾，她逗留了 15分鐘便離開。
地下大廳放滿了裝修用材料，全屋共四層有五間套房，單是裝修已花起碼半年。
據資料顯示，甄子丹與汪詩詩在今年 4月中聯名以 1.35億買入位於摩星嶺道的獨立屋，更清楚列明汪詩詩是大業主。
8月 1日，汪詩詩親身去大屋睇裝修進度，然後返回現居的碧瑤灣寓所。
280萬子彈車
「宇宙最強」又係「片酬最強」，甄子丹最近仲買了 280萬的 Bentley房車，配埋個「 Bullet（子彈）」車牌，夠晒霸氣。拍打戲搞到肩膀受傷的他，上周二（ 6日）去中環睇醫生，不時輕按傷患。
宜明年初入伙
御海園有四間獨立屋，年初甄子丹以 1.35億購入其中一間，面積達 4,200呎，臨海之餘可眺望南丫島。附近還住有眾多富豪鄰居，如趙世曾、周啟邦太太等。
麥玲玲師傅表示新屋對「宇宙最強」一家都好，「甄子丹明年家宅運會有變動，所以今年買屋明年初入伙就最好；而且摩星嶺本身地理較陰，住喺嗰度好多時都要出外四圍飛，到時會好忙，所以財運會唔錯仲會多咗偏財。建議裝修時最好用淺色同暖色，再種多啲植物就可以抵消陰氣。」
御海園背山面海，雖然附近有墓地，但風水學上是吸水格局。
拍打戲周身傷
上月底甄子丹 50歲牛一，汪詩詩在中環包場為他舉行懷舊生日派對，令他非常感動又亢奮，當眾咀足太太 30秒。
太太忙於為新屋張羅，甄子丹就繼續拍戲搵錢，最近他拍連場打戲，除了腰部舊患復發，還令其肩膀受傷。上周二（ 6日）下午二時許，甄子丹駕駛其 280萬新 Bentley房車出中環，他把座駕泊在置地廣場門口，步行到威靈頓街，其間不時用手輕輕按摩肩膀位置。之後上了一幢商廈睇脊醫，看來拍打戲已令他的身體五勞七傷。
上周四（ 8日）下午 4時，負傷的他還帶住 5歲的兒子 James到中環睇醫生，平日硬橋硬馬的他抱住熟睡的囝囝，一副慈父模樣。
對於老公送八成新屋業權，記者致電汪詩詩，她以家事不能外傳為由，拒絕回應新屋的事。但卻承認甄子丹拍戲傷舊患，「子丹拍咗咁多年戲已經習慣打得咁勁，佢都要去俾人按吓，對佢嚟講係好小事，佢應該冇大問題嘅，不過都要調理吓身體。我知老公拍戲辛苦，所以返到屋企要有個舒服嘅環境俾佢休息，我會煲湯俾佢飲。（丹爺好錫老婆，新屋送咗八成業權俾你？）屋企嘢唔回應喇！要保持私隱。」結婚十年育有一子一女，兩夫婦恩愛不減，甄子丹早前仲話心思思想再添丁，既然搬大屋，再生孖胎都夠住啦！
罕見慈父 look
上周四（ 8日），甄子丹抱住患病的 5歲囝囝 James到中環睇醫生，其間巧遇在《葉問》飾演其太太的熊黛林。丹爺呢個抱仔 look，相信熊黛林都未見過。
全家放暑假
最近甄子丹因傷停工，趁一對仔女都放暑假，一家四口加埋外母，不時四出享受家庭樂。
兩年賺 2.55億
甄子丹年初與林建岳合作，成立「超級英雄電影有限公司」，有岳少呢條大水喉射住，不愁冇戲開。
甄子丹搵錢能力強勁，自 08年《葉問》爆紅後，片酬由 1千萬升至最高 4千萬，去年賺 1.15億的他，獲得 2013年福布斯中國名人榜「收入之冠」。原來甄子丹近兩年拍電影及廣告嘅收入已超過兩億，用 1.35億買磚頭，都係面嗰浸咋！
電影收入
2012 《大鬧天宮》 3,500萬
2012 《在一起》 1,000萬
2013 《特殊身份》 3,500萬
2013 《一個人的武林》 3,000萬
2013 《 3D冰封俠》 3,500萬
2013 《臥虎藏龍 2》 4,000萬
兩年電影收入共 1.85億
廣告收入
Sharp電器產品 1,500萬
「愛動」體感遊戲 1,500萬
澳門壹號廣場 1,200萬
「立馬」環保電單車 1,000萬
國內百年品牌白酒 1,000萬
惠氏倍力加奶粉 800萬
共 7,000萬