忽然1周 第944期

當年愛得義無反顧的謝霆鋒和張栢芝， 11年宣布因性格不合離婚。雖然二人聲稱共同撫養 Lucas（謝振軒）和 Quintus（謝振南），但實際上兩子一直由栢芝看管。
近日盛傳栢芝希望兩子在一個清靜環境下成長，把心一橫帶住他們移民溫哥華，惟消息一直未經證實。本刊遠赴溫哥華直擊，發現栢芝已在當地 Surrey區落戶，買了三千呎洋房居住，更安排保母幫六歲 Lucas搞入學手續。當地時間周日（ 25日），本刊拍得栢芝拖住兩子到附近酒樓飲茶，生活簡樸。
栢芝洗盡鉛華，與兩子正式移民溫哥華，看來謝家上下想見兩個寶貝一面，唔係咁易。

素顏的栢芝拖住兩子，由酒樓行去停車場取車，其間她不時眉頭緊皺。

今年 33歲的張栢芝，歷盡高低起跌，早前她接受訪問時曾說：「我依家唔再係一個人，而係帶着兩個生命，我要對佢哋負責，唔可以再把自己當重心。」現時事業陷入谷底的她，暫時拋下娛圈浮華，帶住 Lucas和 Quintus直奔加拿大溫哥華放暑假。上月就有網民拍得她帶兩子出入當地 Surrey區社區中心游水。

8月 25日湊仔飲茶

溫哥華時間約下午 1時，栢芝與兩子出發到寓所附近的小社區飲茶， Lucas和 Quintus十分熟路，落車後立即衝入酒樓。

匆忙拖仔

大約一小時後，人仔細細的 Quintus率先離開酒樓。栢芝見狀立即拖住 Lucas，急步離開搵番細仔。記者發現栢芝當日戴住十字架頸鏈，改信上帝。

頻頻索鼻

當日日間氣溫大約 28度，但身穿牛仔外套的栢芝頻頻索鼻，取車時更不期然用手抹鼻水。

捽眼上車

栢芝安排了 Lucas和 Quintus坐在七人車後排，自己則與保母坐在中間。上車時，栢芝不時捽眼，看來精神欠佳。

落寞湊仔飲茶

本刊收到消息，其實栢芝與兩子現身溫哥華，並非只是度假，而是決心移居當地，全面撤出香港。移民屬於大事，並非一朝一夕搞掂，栢芝一早做定部署，多年前已在 Surrey區，以約 300萬港幣買定一所四房洋房，準備在當地落戶。知情人士說：「栢芝幾年前已搵咗喺溫哥華定居、同母異父嘅家姐戴碧芝揀樓。佢想移居當地，都係因為家姐喺嗰邊，有個照應。栢芝對樓價冇意見，因為溫哥華啲屋唔貴得去邊，但佢有一個條件，就係唔可以揀 Richmond，擔心嗰度多華人，唔想俾人認得。」於是栢芝鎖定以韓國和印度人為主要居民，以及擁有圖書館、水上中心等公共設施的 Surrey區，方便一家三口生活。
當地時間周日（ 25日）中午，栢芝與兩子及保母，由司機接載下從寓所外出。大約二十分鐘車程後，栢芝一家三口終於落車，步行到附近的中式酒家飲茶。失蹤一排的栢芝，以往的稜角頓失，素顏的她顯得異常憔悴。雖然可以與兩子共聚天倫，但栢芝全程冇厘神氣，心事重重似的。相反 Lucas和 Quintus似乎頗適應當地生活，經常跳跳紮紮。

上月栢芝和 Lucas就被拍得到 Surrey Sport& Leisure Centre游水，入場費約港幣 28元便玩足一日，相當划算。

8月 10日，栢芝帶兩子現身溫哥華機場，搭乘飛機返港。但她得悉香港機場有大批傳媒守候，便坐另一班機折返當地。

買三千呎洋房

栢芝溫哥華新竇，屬 Surrey區內數一數二的屋苑。屋苑 96年落成， 97年入伙，共有 90個單位，由兩房至四房不等，栢芝多年前以約 40萬加幣（約 300萬港幣）買入。由於屋苑設備足夠，有圖書館、餐廳、健身室等，加上環境清靜，故市場上放盤很少。

栢芝新居屬全日式設計，設有四房，面積約三千呎。

正門旁邊的窗戶擺上防盜貓公仔。

栢芝屋外放滿多對鞋，連汽水也有，甚為凌亂。

律師：子女可跟父母一方移民

律師黃慧敏指，「共同管養」法律上定義指父母雙方有相同權利，如子女旅遊、學業、移民等。「若果一方被另一方反對帶仔女去外國讀書、移民，可向法庭申請，法官會根據子女嘅福利而判決。若有足夠證明小朋友去外國生活更好，唔會話因判咗共同撫養，子女移民見唔到另一邊就唔批。或者大家可以傾幾耐見一次，每個 case都唔同。當然，如果申請嗰一方係有壞嘅主意，例如移民係想杜絕另一方同仔女見面，就一定唔會獲批。」

與霆鋒周旋半年

霆鋒和栢芝離婚後亦有見面，去年 9月，二人便被拍得到深灣遊艇會游水。但隨着霆鋒與周迅的戀情曝光，栢芝亦減少聯絡前夫。

雖然栢芝買定大屋，但她與霆鋒離婚時， Lucas和 Quintus的撫養權屬二人共同擁有，即使栢芝想攜兩子遠走高飛，無可奈何下也要得到前夫謝霆鋒批准。據知今年初，栢芝就移民一事與霆鋒商量，知情人士說：「栢芝向霆鋒解釋移民嘅原因，係為咗可以同兩個仔過新生活，加上小朋友適應力強，所以移民愈早愈好。霆鋒喺溫哥華長大，都覺得嗰邊讀書冇香港咁大壓力，雖然唔捨得，但栢芝去意已決，佢亦無奈答應。加上栢芝生完兩個仔嗰陣，霆鋒已經幫定啲仔搞定加拿大國籍，以備不時之需。不過霆鋒唔想驚動到拉姑同四哥，所以冇立即應承。」
直至今年中，霆鋒簽署文件，正式同意栢芝帶兩子移民。知情人士說：「拉姑知道長時間冇得見啲孫仔，情緒當然激動，佢到依家都唔接受孫仔移民呢個事實，但自從栢芝帶走兩個細路，拉姑不時都呻好掛住兩個孫！」

8月 26日 Lucas見老師

溫哥華時間當日上午，保母帶 Lucas到 Walnut Road Elementary School辦入學手續，記者發現 Lucas在課室門外等見老師，但他毫不緊張，不時傻笑。

麥記開餐

辦完入學手續，保母帶埋 Lucas、 Quintus和自己兒子（左二）到附近麥當勞開餐。其間 Quintus悶悶不樂，保母就錫他面珠一下。

樂園奔走

三位小朋友未食飽，便到麥當勞內的兒童樂園狂玩。

融入當地

剛住當地個多月的 Lucas，適應能力強，與保母兒子相當投契，拖手離開餐廳。

幫大仔搞入學

過了前夫一關，栢芝決心為六歲大的 Lucas揀學校。當地時間周一（ 26日），保母就帶住 Lucas與 Quintus坐車到 Walnut Road Elementary School，為 Lucas搞入學手續。加拿大學校制的小學設有 Grade 1至 Grade 7。下周二（ 3日）， Lucas便正式入讀該校的 Grade 1（即本地小一），展開全新校園生活。已成為加國公民的 Lucas，順理成章獲得公民福利，可以免費接受當地教育。而今年只得 3歲的 Quintus，則還未足歲數讀書，但據知栢芝已搵定區內幼兒中心，盡快讓 Quintus擴闊圈子。

十萬呎校園

Lucas入讀的小學叫 Walnut Road Elementary School，屬社區內知名度較高的小學。小學佔地接近十萬呎，設多棟校舍，相當龐大。小學屬全日制，逢周一至周五返早上 8時半，下午 2時半放學。學校提供自助形式午膳。而午膳時間亦安排活動，擴闊學生多方面興趣。
校舍環境清靜，而且自成一國。學校亦提供校車接載住得較遠的學生。?學校除安排法文堂，還有兩個大籃球場和一個場館上體育堂。?校內有多個大草地和康樂設施。?學校歡迎不同國籍學生入讀，藉此互相作文化交流。

千八萬入籍

謝霆鋒早年隨四哥、拉姑移民溫哥華成為加拿大國民，不過栢芝與霆鋒離婚後，撫養權又不只屬於霆鋒， Lucas同 Quintus兩兄弟想入籍並非易事。景鴻移民顧問張先生指，「夫婦離婚後，若父親係加籍，父親為仔女申請國籍嗰陣，父親要喺加拿大做嘢，仔女先有機會入籍。」不過據本刊收到消息，霆鋒已一早為兩子成功申請入籍。
至於香港人移民加拿大，本刊亦問過寰宇移民顧問何先生，他說：「搞投資移民加拿大要有資產共 160萬加幣存款（約千二萬港元），包括當地嘅銀行、其他資產、房地產、公司等，仲要投資 80萬加元（約 6百萬港元），由加拿大政府擔保，冇任何利息， 5年之後會全額退還。不過依家移民冇早年咁寬鬆，政策收緊好多，之前試過唔接受投資移民。」
加拿大魁北克省移民廳宣布於今年 8月 1日重開投資移民，設定全球申請上限為 1,750個，而每個國家最多亦只接受 1,200份申請。
「之前停止申請投資移民，已經累積咗一大堆人，所以一開放已經超過上限，加上依家 check得好嚴，就算合乎資格都要等 3至 5年。」不過對於身家以億計的栢芝，申請投資移民絕對冇難度。

鄧萃雯導信主

栢芝移民後的生活相當簡樸，平時甚少外出，湊兩子外出的任務多由保母代勞。不過據知每逢周末，栢芝必定到位於 Burnaby的大溫哥華聖道堂聽主日學。栢芝由昔日養鬼仔及迷泰國神佛，變成今日改信基督教，原來全是鄧萃雯一手促成。有人曾目睹今年中鄧萃雯帶栢芝到銅鑼灣同福堂聽道，知情人士說：「佢哋 99年拍《星願》認識，不過好多年都冇再聯絡，直至舊年大家喺內地一個商業活動撞番，佢哋先再傾番偈。雯女除咗帶栢芝返教會，仲一齊掃咗好多專印上聖經金句同十字架嘅 T恤?！」
難怪栢芝於溫哥華期間，經常戴住十字架頸鏈。當地時間上周六（ 24日），適逢鄧萃雯到大溫哥華聖道堂講見證，作為密友的栢芝當然有份出席。不過她當日十分鬼祟，一早帶埋兩子匿入教會講廳後台。約下午四時多，保母就現身教會，帶走 Lucas與 Quintus到附近餐廳食雲吞麵。

8月 24日保母湊出入

溫哥華時間上周六（ 24日），栢芝帶同兩個仔返教會聽佈道會。兩小時後， Lucas與 Quintus先離開，由保母帶返屋企。

興奮碌草地

Lucas與 Quintus返家後，再由保母帶到屋苑內的草地玩。兩兄弟跑來跑去笑唔停，似乎已經適應當地生活。

11年拜泰國佛

曾篤信觀音、基督教的栢芝， 11年開始到泰國拜佛。更有指她「養鬼仔」超過 10年，離婚後更養如人般高的人形「鬼仔」。

13年改信主

近月長駐加拿大的栢芝，突然改信基督教，不但於手上紋有十字架，出外亦帶上幾個十字吊墜。

謝賢避談

周三（ 28日），記者就栢芝移民一事致電謝賢，當他聽見兩個孫仔近況時，突然唔出聲，停了十秒才答︰「我唔知，依家我唔知佢哋啲嘢！」再被問有否與孫仔聯絡時，他放低聲線說︰「到時先算啦！ OK！（會唔會好掛住兩個孫？）唔好問呢啲嘢啦！好唔好！」之後便匆匆收線。
就栢芝帶子移民一事，記者連日來都在拉姑寓所等候，但她足不出戶，只吩咐老公鬍鬚 Kong到中環為她處理私人事務，看來她依然飽受冇得見孫仔一事困擾。不過拉姑曾說：「總之個仔有咩決定，我都無條件配合，做父母嘅最重要唔好傷害小朋友。」看來她為了兩粒寶貝孫仔，避免再與栢芝開戰。
周三（ 28日），記者致電謝賢，當他聽到兩個孫仔移民溫哥華，停頓十秒才答：「依家我唔知佢哋啲嘢！」

10年，拉姑 59歲生日，霆鋒一家四口為她慶祝，她全程冧爆。不過自霆鋒與栢芝離婚後，拉姑甚少機會見兩粒孫仔。

華人社區大教會

據知信主後的栢芝亦有返當地位於 Burnaby區的「大溫哥華聖道堂」，教堂由當地華僑管理，故吸引不少華人基督徒前來。不過教會距離栢芝寓所相當遠，要一小時車程。

當地時間 24日，鄧萃雯到教會講見證，據知栢芝亦在講廳後台聽足全程。