羅蘭開題:麥當勞叔叔髮型?(估一國家名)

忽然1周 第945期

今年78歲,扮「龍婆」扮到出晒位嘅羅蘭姐,咪以為佢會眼矇耳聾,查實精靈過好多後生。早兩期媽咪姐考過佢 IQ題,得佢一個答啱。今期就由羅蘭姐出題考番大家,各位打醒十二分精神喇!

羅蘭開題:麥當勞叔叔髮型?(估一國家名)

Sam哥:「羅蘭姐好精靈呀!」

喺《衝上雲霄Ⅱ》好嚴肅嘅 Sam哥(吳鎮宇),真人其實幾 funny,對於記者嘅 IQ題,佢好認真撩住耳仔去諗。廿秒過後,身邊經理人提水先知答案。 Sam哥雖然唔識,但就突然《難兄難弟》「四哥」上身咁問:「點解呀?吓!」求知慾滿分。

Holiday:「佢唔使電髮嘛!」

至於 Sam哥愛人何年希 Holiday(陳法拉)就心水比較清,佢一路估一路口噏噏:「麥當勞叔叔個頭係爆炸嘅……」果然有幫助,半分鐘左右就噏得出答案同原因,去完美國進修果然唔同啲!

郭晉安:「我 IQ唔弱!」

已為人父嘅安仔,唔知係咪同仔女玩得多,轉數頗快, IQ算眾人中最高,唔使十秒就知道答案:「細細個都好鍾意估 IQ題,依家又間中同個仔玩吓!」難怪咁勁啦!

方中信:「你問我個女吖嘛!」

肌肉發達嘅方中信做戲就叻, IQ題就完全難到佢咯!媽咪姐出完題後,佢 chok晒咁雙手插袋諗咗一輪都估唔到,聽到個答案後好大反應:「唓……呢啲你問我個女,唔好問我吖大佬!」唔係唔玩得呀?

林家棟:「老麥頭髮天生攣嘅!」

記者未開題,家棟已好有自信搓晒手掌話:「放馬過嚟!」一聽完問題,家棟即奸笑咗幾聲:「日本、韓國、中國、泰國都唔係……應該係緬甸,老麥啲頭髮係唔使電嘛!哈哈哈……」又幾醒喎!

羅蘭開估:

緬甸(免電)