忽然1周 第945期
今年47歲的鄧萃雯，早前曾自爆去年拍攝《金枝慾孽貳》壓力爆煲患上抑鬱症，要向曾患抑鬱症的張堅庭求救。近月她更索性拒接劇集，停工專心養病。
閉關多時的她，上月底飛赴溫哥華，擔任當地教會佈道會演講嘉賓。在千名觀眾見證下，鄧萃雯將多年來在無綫工作的辛酸和鬱結，一次過宣洩出來。她直指《巾幗梟雄》一班演員掛住瞓覺，又對自己遲遲先攞視后深感不忿……種種怨恨累積，令她要睇心理醫生。
飽受工作摧殘身心，鄧萃雯在佈道會不禁眼濕濕說：「我只不過係普通女人，唔好當我 superwoman！」
8月 24日
七情上面鄧萃雯對無綫甚多不滿，於兩小時的佈道會中，她用三分二之時間傾訴多年寃屈，其間她不時七情上面，怒火依然未熄。
今年 6月，鄧萃雯出席港台節目《壓力不倒翁》記招時，就現身說法講抗抑鬱歷程。
溫哥華當地時間 8月 24日，位於 Burnaby區的「大溫哥華聖道堂」教會外風平浪靜，但教會演講廳內卻充斥怒氣。四個多月前，萬眾期待的重頭劇《金枝慾孽貳》被指曲高和寡，收視跌破新低，孭重飛的鄧萃雯當時並無出言硬撐，反而直指劇本不濟。萬料不到鄧萃雯怒火未熄，更將這股怨氣帶去溫哥華，她在佈道會當住千名教友炮轟：「攞住唔完美嘅劇本，唔知可以講咩對白，日日係咁背，你話係咪會黐線吖？我直情冇辦法攞到演技出嚟！」
千人聽見證
鄧萃雯於 Burnaby區的大溫哥華聖道堂，一日連講兩場見證，每場門票為加幣 8元（約港幣 60元）。由於有明星效應，兩場門票合共二千多張飛迅速售罄。現場所見，教會正門亦有多人排隊等入場。
林以諾護送
今次佈道會由林以諾牧師一手安排。當晚約十時多，鄧萃雯講完見證後，林以諾便帶她到附近食肆醫肚。
被迫做阿媽
03年，鄧萃雯以 37歲之齡飾演當時分別 23歲及 21歲的陳文媛和唐寧的母親。年齡差距唔夠 16年，難怪鄧?爆：「我邊生得佢哋出！」
不忿失落視后
《金枝貳》令鄧萃雯與無綫陷入前所未有的僵局，但其實她自千禧年重返娘家無綫後，初期不被重視，令她跌入從影以來的谷底。她慨嘆：「作為一個女演員真係幾慘，三十幾歲都仲好靚女嘅時候，就已經派你去做阿媽，仲要係生陳文媛、唐寧嗰啲，我都唔知點生得佢哋出。」 03年，她被公司安排演出《戀愛自由式》，飾演兩女之母，全程襯托一班青春偶像。她愈講愈火，更暗示無綫當時逼她接拍，「嗰時真係幾冇希望，我一出道就做主角……我個角色其實有名，但有一次我行街，突然有啲 teenagers走埋嚟叫我 auntie……嗰次係我演藝生涯幾大嘅打擊，但我都照做，如果唔係連工都冇得返。」
苦盡甘來，鄧萃雯笑言 04年《金枝慾孽》如妃一角令她鹹魚翻生，全城盛讚她演技精湛，視后唾手可得，但最後卻被同劇的黎姿冷手執個熱煎堆。事件當年震撼，但九年後的今日，鄧萃雯依然心有不甘，「我成日都覺得我梗係有實力！有晒人生經驗啦，我以前唔忿氣，咁多後輩攞到獎都未到我。」
黎姿搶視后
04年，鄧萃雯被黎姿唔聲唔聲搶去視后寶座，雖然賽果惹來多宗投訴，替鄧出番啖氣，鄧對此依然忿忿不平。
釋懷攞獎
鄧萃雯自知得罪人多，故放鬆心情拍《義海豪情》，終再榮獲視后，難怪她寸嘴說：「呢個獎唔重要，老老實實，我冇用咩演技。」
片場叫醒演員
當年鄧萃雯失落視后，勝在贏了民心，但這倒令她演戲包袱愈來愈大，到 08年拍攝《巾幗梟雄》時更走火入魔。她自爆當時自己在片場非常霸道，凡事都管。「我嗰時戲裏戲外都係四奶奶（鄧萃雯《巾幗》角色名），平日拍戲朝早開工，拍到凌晨四、五點。到咗凌晨，有啲人瞌下、坐喺度攤下都好正常，但我四奶奶企喺度講對白，側面嗰啲（鏡頭）都望到。點解個個都瞌眼瞓呢？我就叫老臨頭：『唔該你哋嗌特約嗰陣，嗌醒埋我哋班演員』。點解個個都瞌眼瞓呢，唯獨我唔係，我係咪有病呢？可能我得罪咗好多人，所以身負咗好多箭喺背脊。」
在鄧萃雯「強權」監管下，《巾幗》終於在四個月內完成。當時她自以為自己功勞最大，但黎耀祥的一席話，令鄧萃雯茅塞頓開。「《巾幗》煞科宴，大家都好開心。我記得柴九（黎耀祥，《巾幗》角色名）及燈光師同我講：『四奶奶，其實你仲可以做得好啲！』。佢哋唔係話我演技，係話我平時做人好嚴厲，喺個廠要監管晒所有人。見到有人做得唔夠好，又叫人嚟多個（ take）……嗰晚我飲咗兩啖酒，嗰時人係最真實，一聽佢哋咁講，我即刻流下兩行眼淚話：『我知，我只不過係普通女人，唔好當我 superwoman啦！』我崩潰先至喊。第二朝瞓醒，我問自己呢個係咪一個警號，相信我嗰陣壓力爆煲。」
鄧萃雯自稱被黎耀祥點醒後，於是停工一年，「當時我睇心理輔導，學九型人格，學自我價值。」直至 10年，她返回片場拍《義海豪情》時，情況已有明顯改善。「我上咗堂都要實踐，做唔到由得去，喊唔到由得去。第二年攞獎，我完全唔覺得演得好，因為我冇攞過咩演技出嚟。」
與商天娥不和
鄧萃雯自爆拍攝《巾幗梟雄》耍大牌，經常叫演員補拍，難怪當時有傳鄧與同劇的商天娥不和。
藝人表態
吳卓羲：日開夜開實眼瞓
鄧萃雯自爆透過臨記阿頭叫醒《巾幗梟雄》演員起身，有份拍《巾》劇的吳卓羲說：「冇啲咁嘅事喎！佢冇叫臨記阿頭叫呀！不過攰就梗係瞌吓眼瞓，日開夜開實眼瞓，有邊個唔攰呀？其實拍之前傾好晒。我同黎耀祥、商天娥佢哋相處得好融洽。」
伍詠薇：希望佢平復到
伍詠薇在《金枝慾孽貳》飾演鄧萃雯妹，伍說：「佢係完美主義者，都係想件事好啲，成 team人質素好，同佢唔熟咪覺得佢乜都管囉！我眼見雯女都冇乜同人食飯，一味睇劇本。我哋依家冇聯絡，不過佢將真人真事分享都係好事，希望佢呻咗出嚟會平復到！」
麥長青：自己做自己
對於鄧萃雯大控訴，有份拍《義海豪情》的麥長青則不欲多談：「我同佢識咗好耐，但呢套先第一次合作，我冇理咁多，淨係自己做自己，不過我私底下同雯女 OK！」
住栢芝屋養病
可惜《金枝貳》再令鄧萃雯陷入困境，壓力大到令她去年拍攝時患上抑鬱症，更患上自主神經失調，臉部生滿紅疹兼甩頭髮，情緒不受控制，要全面停工。據知鄧萃雯藉住多次佈道會，藉此釋放壓力及分享經驗教訓，更順便探望老友張栢芝。知情人士說：「雯女呢大半年都冇接拍劇集，反而全力周圍飛做佈道會。佢一知道有溫哥華一站，便立即通知已經移民當地嘅栢芝，話喺當地逗留一星期。栢芝性格咁疏爽，當然安排食宿招待雯女呢位老死啦！」
栢芝為部署移民，除一早於 Surrey區買定三千呎洋房，方便 Lucas和 Quintus返學外，更於年多前以七百萬港幣買了同區萬呎大屋。
溫哥華時間 8月 28日，本刊就拍得鄧萃雯由該大屋步出，行去車房上車外出，惟座駕一上公路後便絕塵而去。知情人士說：「雯女今次選擇住栢芝間屋，除咗養病休息外，仲借呢個機會同啱啱轉信基督教嘅栢芝講耶穌，所以佢哋多數留喺大屋入面。」
鄧萃雯與張栢芝自合作電影《星願》相識，據知早前鄧更帶栢芝返銅鑼灣同福堂教會，二人因信仰變成老死。
鄧萃雯於佈道會自爆 97年金融風暴因負資產令她輸掉身家。見過鬼怕黑，於是她今年以 8百萬成功售出位於荔枝角碧海藍天舊居，獲利 3百多萬。
現時鄧萃雯與母親居於西貢帝琴灣，她前年以 9百多萬買入。
8月 28日現身栢芝屋
溫哥華時間約下午 3時，戴住黑超的鄧萃雯以一身中性打扮，與一名男友人從栢芝位於 Surrey區大屋步出。
保母任用
栢芝保母駕車到鄧萃雯入住的大屋，並拿乾洗衣物。鄧見狀只叉起雙手站着從旁指揮。
車上 high爆
打點完，鄧萃雯乘坐由男友人駕駛的七人車出外用膳，此時她終於除掉黑超，在車上講到手舞足蹈。
栢芝萬呎新竇
栢芝在溫哥華的大屋，是歐陸式設計，正門前更有專用泊車處，十分架勢。
張栢芝為求移民隔絕謝家，一早於溫哥華買入不少單位，在當地的物業多不勝數。除了位於 Surrey區的三千呎洋房外，距離約十分鐘車程，栢芝也於同區再有一個面積約萬多呎的大屋。
據知她年多前以七百多萬港幣買入。新竇入伙不足十年，約有六間睡房、兩間車房及地牢，非常寬敞。新竇非屋苑式設計，附近有約廿個豪宅，但各豪宅的外形及面積均不同，估計該區單位是買家買地之後，按自己要求興建。
跳舞減壓
鄧萃雯五年間因兩度壓力爆煲而患上情緒病和抑鬱症，其實十分嚴重，所以她趁休息期間，除主動求醫外，亦開始常做運動發洩情緒。 8月 20日，本刊就拍得她現身由蘇志威、韓馬利等人投資，位於尖沙嘴的跳舞學校「 i Dance」，逗留近一小時，專心睇其他學員練舞。閉關了一段時間的她，身形明顯比之前脹了不少，即使穿上鬆身 T恤，仍遮唔住肚腩。
周二（ 3日），記者就此事致電韓馬利，她說：「我邀請雯女嚟跳舞，因為跳舞時會有安多酚，會令人開心啲，而且全副精神記舞步，好忘我，佢話有興趣跳，不過就未正式開始。（佢情緒病康復成點？）作為朋友，我多多少少都知，不過真係唔方便透露。」
記者曾就鄧萃雯於佈道會狂數無綫一事，致電無綫製作資源部總監樂易玲，但截稿前仍未獲回覆。鄧當日鬧爆《金枝貳》劇本飛紙仔，遭無綫全面封殺，看來雙方的矛盾，仲有手尾跟。
8月 20日（香港）跳舞減壓
鄧萃雯身穿鬆身 tee素顏到跳舞學校「 i Dance」上堂。其間她更與有份投資的韓馬利傾訴。據知，該校課程包羅萬有，當中有助人忘憂解壓的 Funky Boxing及 Line Dance舞蹈班。
快餐醫肚
落堂後，鄧萃雯到附近的快餐店買熱狗醫肚，記者發現她即使身穿鬆身 tee依然肚凸凸。
運動可抗抑鬱
抑鬱症成因包括遺傳、生活環境、生理等多方面因素，患者會持續出現情緒低落、悲觀思想及對大部分事物失去興趣等徵狀。精神科醫生丁錫全指出:「醫治抑鬱方法分心理、藥物同腦刺激治療三種。心理方面，通常係認知行為治療，用於輕微至中等程度，療程大約 3-6個月。藥物治療就約 3星期開始發揮作用，一般大概兩、三個月病情會好轉。另外仲有輔助性活動，好似做運動，每日維持至少半個鐘嘅帶氧運動，多啲見朋友都會對病情有幫助。」