恭喜恭喜，劉德華再做老竇喇，而且呢胎，可能係仔呀！

上月底華仔出席卡地亞手表活動時，有fans高呼：「祝華仔身體健康、越來越靚仔、家裏多添一名成員……」，華仔聽完狂笑不停話：「所有祝福一一收晒，一切順其自然，感激大家。」同以前例牌回應話:「乖啦」完全唔同，莫非真係暗示劉家有喜？

是真是假，要等華仔自己講喇。今日就有報道大字標題，話朱麗倩懷慈姑椗三個月，仲係今年7月帶埋囡囡向蕙去加拿大，準備安排女兒喺當地留學，點知就喺嗰陣發現自己有咗，於是急急返港同華仔商量。今年8月中，朱麗倩俾影到破關而出，喺三名街坊裝嘅保鑣掩護下去銅鑼灣睇中醫，疑似係同陀B調理身子有關喇。

報道中話，朱麗倩返港後，到婦科名醫何永超位於中環中建大廈嘅醫務所檢查。因為朱麗倩已屆47歲，屬高齡產婦，故必需驗唐氏綜合症。報道中引述「知情人士」話，朱麗倩今次採用新嘅美國醫學化驗科技，唔係抽胎水，只需抽孕婦嘅血拎去美國驗就得喇。該名知情人士更話，早前朱麗倩照咗超聲波，話已知呢胎係仔喎。陀B三個月就知道性別咁勁？記者事後向朱麗倩光顧嘅中醫師求證，但醫師封嘴不答。

報道指，華仔知道愛妻再次成功懷孕後，喜不自勝，馬上告之雙親，劉父知道今胎係仔當然更加高興，有指劉父朝早嘆茶嗰陣，更忍唔住同茶腳分享喜悅。記者索性上茶樓向劉父道賀，直言:「恭喜劉生，恭喜你又做爺爺喇!」劉父就笑晒咁話:「係好開心!」記者即打蛇隨棍上話出年可以擺滿月酒喇喎，劉父就繼續笑咪咪唔答，但同枱劉父嘅朋友即笑住代答:「咁叻嘅你哋嘅消息!」之後劉父對所有問題一律以笑代答，更忍不住「哈哈哈」朗聲大笑，心情極佳，莫非真係家有喜事？