IQ考考笑

今期 IQ考考笑搵嚟最近兩線劇《神鎗狙擊》同《巨輪》都有份拍嘅老外布偉傑出題。而一班《巨輪》嘅演員就負責答問題，結果都幾出人意表！

阮兆祥

俾我用吓個腦啦！（真實對白）

阮兆祥出名轉數快，兩秒就答中。佢講完答案，仲有埋解釋?。臨尾仲好抵死咁話，「唔該，下次俾我用吓個腦啦！」牙擦得佢吖，又難怪，其他人冇個識答。

李亞男

可唔可以答多次！（真實對白）

「藍嫂」李亞男好有體育精神「撞」咗成分鐘，不過都係答唔出，以笑遮醜。最後佢仲「出貓」，要求答多次！見亞男咁靚女，就俾佢啦！

蕭正楠

真係唔知喎！（真實對白）

蕭正楠聽完問題，諗都唔諗即刻答「唔知喎」！俾佢諗多分半鐘，都話：「真係唔知喎！」啱嘅！家陣貴為一線男主角，留番啲腦汁記劇本好過啦！

張繼聰

我 80後點識估呀！（真實對白）

以為 IQ屬高班嘅張繼聰會好快諗得出，結果竟然要諗足 30秒。佢話好少睇電視，靠記者提水，佢先肯腦筋急轉彎：「哦！『冇得彈』吖嘛，個廣告 30年前喎，我呢啲 80後點識估呀！」

李璧琦

係咪假髮？（真實對白）

李璧琦唔識答，但佢好有誠意?，不停「撞」牌子名，仲識講爛 gag話：「係咪假髮，李雲迪個攣毛頭好似假髮喎！」

答案：美源髮彩（冇得彈）

美源髮彩廣告， 83年喺電視首播，歷時 30年，到今時今日依然繼續喺電視播出，可以話係最長壽廣告之一。曾江喺廣告入面「逐漸變黑又得，立即變黑又得，得咗……美源髮彩，冇得彈！」呢幾句 slogan，絕對深入民心。