點解北極熊餓到要食熊 BB,都冇食企鵝?

IQ考考笑

今期由黃浩然出 IQ題,呢條題目包含常識與地理,一次過考三樣嘢!其實黃浩然想大家思考吓地球暖化而引申到北極熊捱餓呢個問題,考你 IQ之餘亦傳遞環保訊息。咁有教育意義,邊個夠你嚟呀?

胡定欣:我唔識呢啲!

胡定欣聽完問題,就即時搞個爛 gag:「因為食企鵝會繼續餓!好爛呀!哈哈!」講完爛 gag,胡定欣都係唔識答。記者提佢答案同地理有關,點知胡定欣聽到「地理」兩字仲驚:「我唔識呢啲嘢㗎!」

黎耀祥:唔好考我啦!

視帝祥一向答 IQ題都快而準,今次更誇口說:「你哋啲 IQ題太簡單!」今次又真係難唔到佢喎!十秒內答啱,你好嘢!

曹永廉:我放棄!

非常樂意挑戰 IQ題嘅廉記,聽完問題認真思考咗成分鐘,最後同記者講:「唔識!我放棄!」仲舉晒手投降!

邵美琪:企鵝黑白色?

邵美琪聽到 IQ題即刻逃跑,記者叫她嘗試答吓,最後 Maggie鼓起勇氣作答,但企圖亂撞答案,「因為企鵝黑白色?企鵝企喺度?」最後要求貼士,總算答啱啦!

黃浩然開估:因為北極熊喺北極,企鵝係喺南極㗎嘛!