忽然1周 第952期
一直有指移民加拿大隔絕謝家的張栢芝，月初忽然帶埋 Lucas及 Quintus兩個仔由溫哥華回港，其間她一反常態，在機場對記者有問必答。有指她已與前夫謝霆鋒講掂數，霆鋒願意給予她「無限額」的兒子教育費，因而她無後顧之憂，願意帶兩個仔返港生活。
三母子回港已有半個月，但至今沒有露面，行蹤神秘。據知早前栢芝收到 Lucas在香港就讀的加拿大國際學校發出的「最後通牒」，要求她帶埋 Lucas回校交代曠課理由，否則褫奪 Lucas學位資格。
另一方面，原定上周五（ 18日）要到上海出席活動的栢芝，卻聲稱遺失證件被迫臨時甩底，事後只拍道歉片段補鑊，因而觸怒廣告商。看來返港後的栢芝，繼續我行我素。
高調返港
栢芝帶埋 Lucas和 Quintus遠赴溫哥華生活了近四個月，本月 7日，三母子忽然返港，返回世紀大廈寓所。不過栢芝回港已有半個月，但行蹤成謎。
唔該你帶個仔返學啦！（設計對白）
今年 6歲的 Lucas已達入讀小一學齡，故栢芝早在去年，便為 Lucas報讀位於黃竹坑的加拿大國際學校 Grade 1，更一早交定 14萬學費。不過性格一向我行我素的她，卻為啖氣，在完全沒有知會香港校方的情況下，今年 7月忽然帶住兩個仔，飛到溫哥華展開新生活。
轉校長變嚴謹
栢芝為 Lucas報讀的加拿大國際學校於今年 8月中經已開學，不過與此同時，本刊卻發現 Lucas竟然身處溫哥華，更在寓所附近的 Elementary School為 Lucas辦理入學手續。換句話說，栢芝當時計劃移民，冇打算帶 Lucas回港讀書。整個 9月， Lucas都未返過香港的加拿大國際學校。據知校方十分關注 Lucas曠課一事，認為有必要與家長溝通，故校方早前就向栢芝作出「最後通牒」，要求她解釋。
「學校呢個學年啱啱轉咗校長，對於所有細節都執得特別嚴謹。一個學生喺冇知會下唔返學，校方一定緊張，睇下仲需唔需要留位。不過學校搵咗栢芝好多次佢都冇回音，最後惟有出信，限定佢喺 10月底之前，帶埋 Lucas返學校報到。」一名家長透露。適逢本月 7日栢芝失驚無神帶兩個仔返港，還以為她會帶 Lucas返學校報到。不過，本刊連日來在學校等候，都未見栢芝和 Lucas蹤影。記者就此事多次聯絡學校，惟截稿前仍未獲回覆。
曾親自湊開學
Lucas讀幼稚園時，栢芝已為 Lucas報讀加拿大國際學校，貪學校可以一條龍由幼稚園升上中學。 11年，栢芝就被拍得親自湊 Lucas開學。《壹週刊》圖片
搵保母搞入學栢芝三母子在溫哥華期間，本刊就拍得栢芝聘請了保母，幫 Lucas在寓所附近的小學搞入學手續。萬料不到， Lucas剛適應當地校園生活，就要折返香港。
甩底內地騷
栢芝冇尾飛砣的作風，唔單止令學校不滿，就連一直力撐她的廣告商亦震怒。上周五（ 18日），栢芝理應要到上海出席代言活動。不過活動前一日，她才臨時通知廣告商，聲稱遺失證件無法上機而被迫缺席。「廣告商南方寢飾好緊張呢次活動，因為佢（栢芝）好耐都冇正式見人，知道佢呢次出現，一定會成為話題，所以廣告商好早已經喺網上造勢。依家佢臨時甩底，廣告商都無晒符。」知情者說。
雖然事後栢芝堅稱因遺失手袋，搞到冇回鄉卡出發去上海。但據了解，栢芝可以立即到中旅社申辦「臨時通行證」，即日申請翌日便可取證，都趕得切出席。知情者說：「因為佢班機原本係上周四（ 17日）出發，如果立即申請「臨時通行證」，上周五朝早就可以取證，理應可趕及上周五晚嘅活動。」栢芝為了補鑊，最終她亦拍攝影片道歉。不過記者發現片中她精神不佳，妝又冇化，完全不在狀態。據知栢芝經理人公司連日內與該廣告商斡旋，最後栢芝亦應承放期再出席活動補數。
殘爆拍片補鑊
栢芝聲稱因遺失證件才甩底，於是拍片放上網補鑊。不過片中她樣子殘爆，而且普通話咬字不清，睇落似未瞓醒。
網上勁谷
唞足大半年的栢芝，答應了上周五（ 18日）到上海宣傳，廣告商亦提早一個月於微博及不同網站落廣告勁谷。
微博出啟事
栢芝臨時失場，廣告商損失嚴重，立即在微博出啟事向顧客致歉，盡力挽救品牌形象。
霆鋒全力支持
有傳栢芝已與霆鋒取得協議，霆鋒將會全力支持兒子的教育費，令她無後顧之憂，難怪她即使得罪廣告商也冇有怕。本刊致電栢芝經理人 Emily，就失場一事，她說：「唔答啦，內地報道咗好多日。（見栢芝有拍片道歉！）係囉。（本周三喺北京水立方嘅活動栢芝會唔會出席？）暫時未知，要補領證件嘛。其實從來都未 confirm會唔會出席。（點解唔申請「臨時通行證」？）佢都唔喺香港。（唔見 Lucas返學嘅？）我唔需要講佢喺邊度返學。（即係 Lucas喺香港讀書？）返咗嚟香港啦！」既然 Lucas喺香港，冇理由唔見佢返學?！ Emily嘅解釋，牽強咗啲喎！
栢芝經常帶兩個仔周圍飛，早前三母子便到日本吃喝玩樂，兩個仔搭飛機多過搭車。
栢芝有兩仔在手，難怪拉姑和四哥，對任何關於孫仔的事情均一概不回應。反而經常漏口風的謝婷婷，就不時指 Lucas應以學業為重。
星二代之選
霆鋒 13歲跟隨父母移民溫哥華，早已是加拿大公民，故兒子 Lucas讀書自然選擇加拿大國際學校。該校位於香港仔薄扶林道，分幼稚園、小學及中學部，不少名人二代如李克勤之子、林青霞幼女都選讀該校。該校每年學費約 14萬，學生獲入學資格後，家長更要購下學校約十萬至數十萬的債券。學校收生非常嚴謹，學生的語文水平為首要條件，如持有加拿大籍者則優先。
李克勤和盧淑儀為了方便囝囝返學，亦由西貢搬到港島區居住。
加拿大國際學校 91年創立，屬區內數一數二名校。
離婚後工作少
曾是影后的張栢芝，離婚後的電影票房大不如前，故近年的工作多以廣告及商演為主，除了酬勞吸引外，工作量少，以方便她照顧兩個囝囝也是原因之一。不過，她的廣告量也不算太多，返內地商演更因檔期問題，近年幾乎是零。因此栢芝今次甩底連廣告商都激嬲埋，認真捉蟲。
「臨通」取代「快證」
本刊致電中旅社，查詢就遺失回鄉證補領的情況，職員指現時經已不設即時申請便取證的「快證」，如遺失回鄉證而又需急回內地，可申請「臨時通行證」（俗稱「臨通」），屬於一次性使用的，今天申請翌日便可領取，費用為$420。至於補發回鄉證則需要 12個工作天，費用為$590，證件有效期為十年。