五角混帳戀 洪永城被飛 轉溝林夏薇

一直盛傳勁追翠如 BB的洪永城,去年尾於大台頒獎禮公開向 BB調情︰「不如打個茄輪先。」可惜襄王有夢,神女無情。其實,黃翠如暗中轉冧上位小生蕭正楠,隨即辣?蕭正楠正印何傲芝,開 instagram寸爆情敵︰「人不可以貌相」。

至於被黃翠如打入冷宮的洪永城,亦有新獵物。被發現,他已成功暗溝有家底的林峯堂妹林夏薇,兩人更頻頻約會兼挨住食飯。呢筆五角戀混帳,認真難分難解。

忽然1周 第965期:五角混帳戀 洪永城被飛 轉溝林夏薇
白色情侶帽
雖然只係踎茶記,但係食飽飽嘅林夏薇一臉開心,至於洪永城就左望右望,警覺性甚高。之後兩人漫步到理工大學睇話劇。二人當日打扮甚一致,更戴上情侶帽。


五角戀關係圖

洪永城及黃翠如都是余詠珊愛將,齊被力捧,由主持撈到變小生、花旦,兼組成熒幕情侶檔搵錢。洪永城追了翠如 BB半年,早前以為得米,傳媒亦斷正兩人約會。不過外表純情的翠如 BB,近日暗度陳倉,轉撻名草有主的上位小生蕭正楠,對洪永城突然冷淡,令他知難而退。

管接管送

不過現今男歡女愛,來得易去得快,溝女王洪永城亦沒有為翠如 BB放棄整個森林,皆因他已找到新獵物。去年初,洪永城與林夏薇拍《單戀雙城》時已混熟,不過由於當時「洪翠戀」發展中,兩人一直保持朋友關係。直至早前黃翠如飛甩洪永城,男方便轉攻林夏薇,更頻頻做柴可夫接送伊人大獻殷勸,劇組中人亦知兩人行得好埋。
「 Tony(洪永城)好識投其所好,知薇薇(林夏薇)好鍾意食零食,次次都買好多俾對方,??到薇薇鬼咁開心。之前拍劇嗰陣,佢同薇薇有場接吻戲,拍得鬼咁投入,嗌 cut都聽唔到。薇薇話想睇舞台劇, Tony即刻買埋飛約佢。」知情者續透露。


12年尾,蕭正楠載住女友何傲芝,因不慎撞到小巴,佢要同女友落車向警員落口供,戀情因而曝光。但他們都死口唔認,一直只以「好朋友」相稱。《蘋果日報》圖片

去年初,洪永城和林夏薇因拍《單戀雙城》相熟,近日洪永城在微博上載林夏薇相,仲語帶雙關暗指要「建築自己的幸福」。

酒店秘見

連日追訪,發現他們約會頻密。林夏薇自己有寶馬新車都唔揸,反而次次由男方管接管送。本月 10日傍晚六時許,洪永城與林夏薇鬼祟步出北角海逸酒店攞車,之後洪永城直駛到林夏薇的逸樺園寓所。林夏薇下車時,洪永城亦嗌住她,咬咗三分鐘耳仔才分別,十分癡纏。之後洪才駕車返回筲箕灣寓所。
15日下午,林夏薇打的到 ifc會合洪永城,兩人之後到尖東的茶餐廳醫肚。在餐廳內,洪永城與林夏薇並肩而坐,席間兩人笑聲不絕,女方更不時將頭挨落男方膊頭。四十分鐘後,他們徒步到理工大學,欣賞鍾景輝與陳國邦的舞台劇《相約星期二》。睇完舞台劇,兩人再直落太子消夜,消磨到凌晨,洪才依依不捨送女方返家。
上周六( 18日),記者就拍拖一事向兩人求證,兩人甜絲絲之餘卻一味扮傻扮失憶。
洪永城冧笑說:「我真係唔記得喺酒店出嚟……上星期三係咁啱睇騷啫!佢話想睇咪一齊。(之前你公開擇偶條件,話鍾意短髮、眼大、爽直,咁林夏薇咪啱晒?)係咩?成日變嘅,同夏薇係好朋友嚟。(放假都約佢喎?)呢排做完宣傳活動,佢又住港島區,咪車埋佢。」
問到翠如 BB點?他酸溜溜說︰「翠如太忙喇,唔得閒理我!(所以轉追林夏薇。)我諗佢(黃翠如)都開心,我傳其他人,佢又傳其他人(蕭正楠)。(邊個啱你多啲?)兩個都咁好。(依家係咪單身?)係!(諗唔諗住拍拖?)都想……」
至於林夏薇亦扮懵:「幾時呀?我哋去睇話劇,去支持阿邦啫。(洪永城約你睇?)佢都鍾意戲劇,咁啱去啫!(係咪拍戲撻出火?)撻出好朋友火花囉,佢話我成日都好 high。(係咪追你?)……唔覺……(驚唔驚翠如 BB嬲你?)唔怕,佢同翠如朋友啫。」講到明唔怕翠如 BB,睇嚟林夏薇對自己都好有信心。


15/1挨住嘆茶仔
喺茶記食飯時,林夏薇(右)笑聲不絕,伊人更不時挨在洪永城膊頭。兩人揀背住門口坐,明顯想掩人耳目。

同日下午,林夏薇一個人先到銅鑼灣行街,然後獨自在 cafe飲咖啡,其間甜絲絲煲電話。後來再搭的士去中環會合洪永城,一齊去尖沙嘴食飯。

睇完舞台劇,洪永城和朋友食消夜,仲介紹林夏薇俾朋友識。

10/1鬼祟出酒店
洪永城同林夏薇到北角一酒店嘆下午茶。從酒店步出時,洪為免被人認出,刻意耷低頭。

揸男友車示威

至於五角戀的另一個女主角——蕭正楠正印女友何傲芝,就對翠如 BB唔多客氣。黃翠如姣嗲蕭正楠的報道出街後翌日,何立即開 instagram寸爆情敵,又大晒情侶鏈宣示主權。更一改低調作風,於 19日刻意駕着男友蕭正楠的福士,現身公開活動兼返回男友荔景寓所,明顯宣示主權。而正在拍攝《師奶 Madam》的蕭正楠亦刻意與翠如保持距離,力證自己沒有一腳踏兩船。


齊扮失憶
記者問林夏薇 15號同洪永城睇騷,佢最初扮失憶,後來至認相約去捧陳國邦場。都係幾日前嘅事啫。

洪永城亦話唔記得邊日約咗林夏薇。不過問到林夏薇索唔索,佢就冧住話:「都幾索?!」

就算在台上,洪永城亦不時講笑話o氹林夏薇,女方甜到漏。

避忌合照
上周三( 15日),記者到拍攝現場探班,本來想叫蕭正楠同黃翠如合照,但蕭正楠死都唔肯,要拉張景淳企中間。

戀上好拍檔

洪永城由主持做到公關公司男 PR,再變演員,是近年無綫當紮紅人。口才了得的他,不但冧掂余詠珊,更習慣追拍檔;而林夏薇亦有戀上拍檔前科。兩人拍完劇撻着,有跡可尋。

嗒翠如糖
一直盛傳洪永城是溝女王, 2012年,他背住再上一任女友 Emily狂追黃翠如,導致與女友分手。


洪永城曾經拍住黃婉曼主持 now嘅《撳錢》節目,有傳洪對女方日久生情,不過黃婉曼唔 like,撻唔着。

餵飽窮主角
林夏薇 2011年和舞台劇演員楊政楠(小圖)拍劇撻着,富家小姐林夏薇甘於和男友捱老麥。此後兩人聚少離多, 2012年尾終於分手。


11年,林夏薇被傳媒影到同當時嘅男友楊政楠食麥記,女方唔介意餵男友食包。

林峯堂妹家底厚


問林峯知唔知堂妹拍拖,佢答:「冇聽過喎!」似乎林夏薇仲未正式承認洪永城。

現年 26歲的林夏薇, 09年畢業於北京中央戲劇學院表演系,之後成為香港話劇團全職演員,主演舞台劇《中國皇后號》時,曾與男主角楊政楠拍拖。 11年她挾「林峯堂妹」之名加入無綫,拍過《結?分@謊情式》、《幸福摩天輪》、《初五啟市錄》、《寒山潛龍》及現正上映的《單戀雙城》。

林夏薇父親林華星,在香港擁有半億物業,家住市值二千多萬的畢架山 1號。而林夏薇以二萬月租鰂魚涌的逸樺園,平日揸 50萬寶馬出入。


林夏薇父母現居畢架山一號,市值二千多萬。

正印寸爆黃翠如

上周日有雜誌報道完黃翠如姣溝蕭正楠,正印何傲芝即日首次開微博反擊,又揸男友車出騷,宣示主權。


18/1晒車示威
上周六( 18日),出席活動的何傲芝談到男友蕭正楠就強調:「同佢關係冇變」,離去時更大搖大擺揸蕭正楠架車,返男友住所,宣示正印地位。

16/1寸有人扮嘢
何傲芝自晒淡妝照片,然後話:「人不可以貌相的」,暗指自己以真面目示人,暗寸情敵扮晒嘢,表裏不一。

17/1晒男友送禮
之後何傲芝晒情侶鏈,仲留言話:「愛,需要信任。」擺明向男友掟骨,講說話俾佢聽。