王祖藍憑《荃加福祿壽》，由香港紅到內地。 2012年開始，他每周為湖南衞視的綜藝節目《百變大咖秀》演出，繼續扮鬼扮馬，玩寸港星。
在最新一季的《大咖秀》中，祖藍為了尋求突破，事先聲明會扮演兩名內地紅人，但最終這兩個扮嘢片段被抽起冇得出街。
原來今次祖藍因扮演內地紅人觸及「潛規則」而遭到河蟹，雖然他在新一季的《大咖秀》有得留低，但只可以做評審。冇得落場扮嘢事小，祖藍隨時因得罪內地娛圈猛人，影響日後北上搵銀就大件事嘞！

扮女歌神（禁）

韋唯在內地出道超過 20年，被喻為「中國麥當娜」，其專輯在內地銷量已達二億張，她早前參加《我是歌手 2》，但第 4集就被 out。

扮變性舞者（禁）

本為男兒身的金星，早年畢業於解放軍藝術學院舞蹈系，於 95年進行變性手術， 98年憑現代舞〈紅與黑〉獲文化部頒發的文華獎，宣傳片內祖藍的金星（上）造型維肖維妙。

趕絕我咁冇陰功？（設計對白）

湖南衞視的綜藝節目一直是收視的保證，《我是歌手》、《爸爸去哪兒》及《百變大咖秀》都是其皇牌節目。《大咖秀》由 2012年開始啟播，現已播映至第五季，由於王祖藍在過去幾季表現出色，所以酬勞方面亦三級跳，由最初的 20萬元人仔調升至現在 50萬人仔一集。

扮男唔扮女

《大咖秀》是模仿明星的真人騷節目，但原來在挑選對象方面，亦受到各樣的規限。「祖藍第一次演出時，係扮台灣天后蔡依林，佢原本綵排好晒，點知後來電視台話唔得，搞到祖藍臨時要改扮張學友同陳奕迅。中過招之後，祖藍至知原來男扮女係內地禁忌。」知情者透露。
自此祖藍為免得罪有關方面，在選角時更加小心，為免得罪內地紅星，模仿對象鎖定港、台明星，諗住佢哋比較玩得，唔會咁易嬲。祖藍曾呻過：「喺香港同台灣，大家覺得被模仿係一種榮耀。但喺內地，我怕得罪咗人哋（內地明星）自己唔知，又怕就算人哋唔介意，但觀眾會覺得我扮嘢過火，我仲未掌握到分寸。」

王祖藍靠《百變大咖秀》在內地上位，肥水不流別人田，佢亦帶挈女友李亞男，齊齊上節目扮嘢。

祖藍在《百變大咖秀》亦曾扮演內地經典卡通人物「葫蘆娃」一炮而紅，身價飆升。

不知情被剪

即將播出的《大咖秀》中，在內地爆紅的 G.E.M.（右），亦會做嘉賓兼扮歌星雲妮侯絲頓。

由於港、台紅人已被祖藍模仿得七七八八，加上他見自己在《大咖秀》地位愈見重要，一時心雄下，開始扮演內地紅星。在最近的一季節目中，他事先張揚會模仿知名舞蹈家金星及歌手韋唯，網上更流出他演繹的硬照，網友勁 like。
「金星老師係著名舞蹈家，又係變性人，身份更加敏感。韋唯亦係國寶級歌手，兩位都是有頭有面嘅阿姐。《大咖秀》宣傳時提到祖藍會扮佢兩個，電視台已經受到好大壓力，最後嗰兩段片都被抽起。祖藍都係節目出咗街至知被河蟹。不過觀眾個個都係想睇祖藍，所以雖然佢唔扮得嘢住，電視台都搵佢做住評審先，希望嘗試幫祖藍擺平件事。」
對於自己扮嘢被封殺，祖藍透過 WhatsApp表示不欲回應。似乎祖藍玩大咗，真係有難言之隱。

網民齊撐

對於祖藍在《百變大咖秀》被打壓，一眾內地網民都替他抱不平，更明言十分期待睇佢扮金星老師及韋唯。

長扮長有

王祖藍自 2012年開始北上發展，在湖南衞視節目《百變大咖秀》中，將其扮嘢的本色發揮得淋漓盡致，不少香港的天王巨星，都成為他的模仿對象。

扮成龍

唱成龍的首本名曲〈明明白白我的心〉時，王祖藍一人分飾陳淑樺及成龍，唱盡男女聲。

扮張國榮

王祖藍扮哥哥在《霸王別姬》中的造型，一身長衫，加上聲線的模仿，令觀眾誤以為這首〈當愛已成往事〉是哥哥主唱。

扮梁朝偉

他一面扮「陳永仁」的不羈留鬚造型，一面主唱梁朝偉名曲〈你是如此難以忘記〉，實行將兩個不同時期的偉仔 crossover。

扮張學友

在同一集他扮兩代歌神，他先扮學友，更講笑話學友唱歌時的拗手動作，是因為學友出台前撩過鼻，想彈走穢物。

扮陳奕迅

之後王祖藍再唱陳奕迅的〈浮誇〉，他模仿 Eason的摸褲袋動作，仲解釋話是因為 Eason被老婆阿徐搜身搜得多，至習慣摸褲袋。

王祖藍揚言要扮少啲女人

對於有指他在內地節目扮嘢扮出禍，遭內地封殺和抽起某部分扮嘢片段，祖藍澄清謂：「有一個係扮內地變性人，係我自己要抽起嘅，另一個係扮《我是歌手》，我覺得扮G.E.M.好玩啲，嚟緊應該會出街。」他坦言因內地尺度不同，故仍在摸索階段，並否認有得罪人：「暫時未有得罪人，仲有好多內地騷，冇被封殺。不過有時佢哋唔鍾意嘅都會剪，我都理唔到。某啲地方係要小心啲，男扮女唔好太多，其實TVB都係，政治話題唔好講咁多。」