王祖藍豪擲398萬禮金 年尾娶硬李亞男

現年 34歲的王祖藍,與 29歲的李亞男,拍拖五年多,終於開花結果。王祖藍先於去年一擲 1400萬,買入大埔獨立屋作為愛巢,與祖藍家人共同居住之用。雖然祖藍未正式求婚,但已達成共識,將於年尾擺酒結婚,祖藍更承諾豪擲 398萬做禮金。

李亞男接受訪問時,直認祖藍禮金有七位數字,更甜絲絲咁話:「佢咁有誠意,我都開心!」不過,李亞男自爆祖藍未見自己父母,要等到九月至會帶他返溫哥華,預料屆時祖藍會正式向李亞男父母提親,落實年尾婚事。

5呎 3吋的王祖藍,與 5呎 9吋的李亞男,一段「長短腳之戀」早在 2007年爆出。當時雙方例牌否認,祖藍更轉移視線,指自己有一位圈外女友。直至 2010年,兩人拖手斷正,才公開早於 2008年兩人開始拍拖。

忽然1周 第969期:王祖藍豪擲 398萬禮金 年尾娶硬李亞男
14/2迪士尼過情人節
情人節王祖藍一早訂定位同女友去迪士尼嘆燭光晚餐。當地原來是兩人首次約會的地方,王祖藍揀呢度慶祝婚前最後一個情人節,認真有心思。

厚禮補救外形

拍拖以來,兩口子非常甜蜜,李亞男積極融入祖藍生活,與祖藍母親及妹妹相處融洽。去年祖藍以 1,400萬購入大埔雅景花園獨立屋時,李亞男更向祖藍表明歡迎將來與祖藍家人同住。
「李亞男覺得有樓先可以諗結婚,祖藍本來都諗過喺西貢買地自己起屋,不過後來因為丁權及裝修太麻煩,至喺去年買入大埔獨立屋。間屋都有逾三十年樓齡,祖藍預咗揼三百萬大裝修,水、電、地板都執過晒。祖藍同李亞男對結婚有共識,但李亞男話明祖藍爭佢一個正式求婚儀式,搞到出名多計嘅祖藍都好緊張,成日問身邊朋友攞料。」知情者說。


接收工
情人節(上周五)中午,王祖藍晚上返公司接李亞男收工,他在車尾箱為女友準備大大紮花。

送返歸
嘆完迪士尼燭光晚餐,兩人再去睇《華爾街狼人》。凌晨一時許,祖藍車女友回家兼送花。

頻冧笑
收完花嘅李亞男唔多願上樓,不時回望男友,又頻頻冧笑,難捨難離。

預計 4月正式求婚

為表誠意,祖藍豪擲 398萬做禮金。「李亞男父母最初好抗拒個女同圈中人拍拖。祖藍就因為外形問題,都擔心外父外母唔鍾意自己。雖然李亞男父母已經口頭贊成婚事,不過祖藍都諗住禮金重手啲,希望俾到外父外母信心,仲承諾會喺香港同加拿大兩邊都擺酒,唔會大細超。」

其實自去年的《老表,你好嘢!》後,祖藍已經成功打入內地市場,密密賺「人仔」。近半年為結婚,他更撲水逾二千萬。祖藍 4月會出埠,孖住李亞男拍《蜜月到訪》,直擊多對新人蜜月過程。預料到時祖藍會趁浪漫氣氛,正式向李亞男求婚。


雖然情人節當日被追訪,不過祖藍心情仍然靚爆,仲向在場記者派發愛心朱古力。

2010年,李亞男同王祖藍在沙田買外賣時拖手斷正,才被揭發兩人已拍拖兩年。

李亞男:有傾結婚

致電李亞男,她證實祖藍會俾七位數字做禮金,又自爆近日開始操車,為日後搬入大埔,揸車出入做準備。

記:你哋有計劃結婚?
李:有傾結婚,但祖藍就未正式求婚!
記:祖藍打算俾七位數字做禮金喎?
李:佢咁有誠意,我都開心。
記:咁幾時會見家長?
李:我哋九月份會去美國出席佈道會,希望趁呢段時間帶佢返加拿大見父母。都要見父母嘅,始終一齊咗咁耐。結婚會同大家分享,唔會秘婚。
記:你同祖藍開始情侶檔出騷賺錢喎,係咪因為感情穩定?
李:之前喺內地試過幾次(情侶檔出騷),有人邀請都唔拒絕,香港就少啲。
記:你好 sweet喎,祖藍係咪求咗婚?
李:我不嬲都好 sweet!求咗婚會同大家講,我都唔知佢會點求婚,我只係想要個 surprise!


婆媳融洽
王祖藍侍母至孝,李亞男和「準奶奶」祖藍媽亦關係良好,李亞男講明婚後同奶奶一齊住。去年三人亦曾一起出席李彩華的受洗儀式。

近日李亞男頻頻在微博晒湊 B照片,這張照片中,李亞男更和祖藍媽一齊湊 B。奶奶咁鍾意細路,難怪祖藍婚後打算不設防。

情人節當日,祖藍在微博刊登以聖經金句寫成的情書。翌日早上,祖藍晨早搭飛機去上海,晚上隨即趕回香港,和李亞男去了上山詩鈉的食肆嘆火鍋。

李亞男曾為節目宣傳而披婚紗,今年年尾她終有機會做新娘。

記:係咪要跪地、有花、有戒指?
李:哈哈,呢啲都係誠意嚟嘅!
記:婚後會唔會退出?
李:唔會。(會生小朋友?)未諗咁遠,我妹妹比我細十幾年,感覺自己已經做咗母親。依家就攞人哋 BB嚟玩。
記:係咪等大埔新居裝修好就搬入去,兼年尾結婚?
李:其實都唔知幾時嘅……新屋要大半年裝修,好多嘢搞。
記:婚後同祖藍媽住?
李:暫時係咁諗。
記:情人節見你揸祖藍架車,第二時搬入大埔,要練定車?
李:我雖然考咗車牌,但都只係揸咗十幾次,一有機會我都要操吓。
至於王祖藍亦冇否認今年結婚,他向傳媒否認已經求婚,但亦講明唔會秘婚,同李亞男口徑一致。「我未求婚,亦冇同居,情人節當晚純粹食飯,有好消息會公布。」

其實祖藍早前都講過,全家的女人包括李亞男都有他的附屬卡,祖藍仲話:「女友都想要架車。不過我唔會送司機,我唔會俾其他男人接近佢!」
想將李亞男私有化,看來祖藍萬事俱備,只欠一個浪漫驚喜的求婚儀式!


高妹揸細車
情人節當日,李亞男揸祖藍座駕由迪士尼出紅磡睇戲。自言少揸車的她,原來想操熟駕車技術,方便婚後搬入大埔居住!

李亞男指男友至今仍未正式跪地求婚,但承認彼此對結婚有共識!

李亞男不時和母親及妹妹(右)四出飲食,關係甚好。祖藍要娶李亞男,先要過外母呢關。

去年李亞男及王祖藍亦曾以情侶檔,出席《百變大咖秀》。

新居預留 BB房

王祖藍新居大埔雅景花園,位於汀角路,地段與大埔豪宅比華利山相鄰。雖然雅景花園已有三十多年歷史,但王祖藍購入的獨立屋對正海景,本來三房兩廳共二千呎,但祖藍已決定在主人房內預埋 BB房,為婚後不設防做好準備。


雅景花園面對海景,景觀開揚。

祖藍新居由於有逾三十年樓齡,所以祖藍揼 300萬大裝修,近日新居正在趕工。

屋後有小花園,小朋友有足夠活動空間。

半年吸二千萬

雖然王祖藍去年七月購下 1,400萬豪宅後,負擔變大,但他的工作多不勝數,而且在內地「吃得開」,有價有市,半年已吸金二千幾萬,搵錢結婚無難度。