方力申與鄧麗欣 2011年約滿金牌大風後,雙雙轉投國內的娛樂公司,拍大陸劇賺盡人仔。
今年初鄧麗欣回歸香港,重投恩師 Paco(黃柏高)門下的太陽娛樂,「跟得」男友方力申亦共同進退, 6月為TVB拍攝新劇《華麗轉身》。雖然不是拍劇初哥,但今次的對手是出名有霸氣,唔啱就鬧的阿姐汪明荃,令方力申聞風喪膽。
上周一( 19日)方力申上嘟姐鄭裕玲的電台節目,自爆見到老友張繼聰為TVB拍劇辛苦到嘔,不過最怕是與汪阿姐合作,仲大嗌「好驚」。在節目中就連嘟姐都爆汪阿姐經常黑面,仲慣性早到,對待遲到者絕對唔係人咁品!
巨鵰怕阿姐
早前方力申為拍貼身內褲廣告,操到變爆肌男,下體加墊激凸。估唔到大隻仔都有弱點,就係怕同汪阿姐合作。
方力申闊別香港 4年,回歸第一炮就是幫TVB拍新劇。但TVB作風一向為人詬病,加上要與出名嚴厲兼超準時的汪阿姐合作,小方為做好準備,早前搵前輩嘟姐與老友張繼聰取經。
最驚遲到
方力申做男主角的時裝劇 6月中開拍,其他演員有鍾嘉欣、汪明荃以及劉松仁等。劇中講述懷才不遇的小方,要靠出賣朋友,黐有財有勢的女友上位。
上周一( 19日)方力申在嘟姐主持的電台訪問中說:「嚟緊返去拍劇,我真係最驚遲到呀!」事關小方與汪阿姐有不少對手戲,他久聞阿姐出名要求高,希望同場演員準時。嘟姐亦加多兩錢肉緊話:「有個『姐』字都好大鑊!我俾個貼士你,汪阿姐唔似得我咁,佢係容易黑面。」
被嘟姐拋窒
上周一( 19日),方力申上嘟姐的電台節目《口水多過浪花》做嘉賓,嘟姐再三爆汪阿姐最憎人遲到,嚇窒小方。
九年冇拍劇
方力申對上一次拍劇已經是 05年的《甜孫爺爺》,當時的女主角是已離開TVB的楊思琦。
嘟姐都話汪阿姐難搞,嚇得小方大叫救命,他再問嘟姐:「聽講話只要遲過阿姐就係遲到?」嘟姐即刻繼續爆:「我有次試過約佢食飯。阿姐早半個鐘到,搞到我明明準時都變遲到!」對於阿姐要求嚴苛,上周四( 22日)方力申出席活動時面有難色說:「阿姐出名專業同準時,雖然我好擔心唔夠時間休息,但都要自己揸車返去拍劇,所以都會提早時間出門口……」
原來嚇怕小方的不單止汪阿姐。小方返國內拍劇由新人做起,最初要連拍十六小時,到現在簽約時講明要有十小時休息時間。但TVB拍劇出名日以繼夜病都未必有得休,小方直言:「冇晒之前喺大陸拍劇嗰啲休息時間,好驚呀!」之後又提及好友張繼聰曾向他呻拍劇辛苦:「我問佢點解嘔?佢話拍得辛苦之餘,拍完返到屋企仲要舉鐵 keep fit,搞到虛脫到嘔。」
遲到令阿姐呆等
方力申從未與汪阿姐拍劇,不過曾於多個慈善節目中同台。 01年新入行的小方參與《聖約翰群星同獻救護心》拜神儀式,竟與 Twins齊齊遲到,要阿姐等 15分鐘。見阿姐黑面,小方亦表現內疚,公開向阿姐耍冧。
承諾守時
上周四( 22日),方力申出席活動時表示,他會在拍劇時預早出門口,盡量避免得罪阿姐而被鬧。
正宗辛苦到嘔
記者日前找張繼聰求證,他說:「因為依家拍緊呢套劇嘅拍攝時間好長,攰得滯,辛苦到嘔。但劇情需要我操大隻,所以早前操到血唔到胃,放咗一日假,依家冇事啦!」至於好友方力申拍新劇前喊驚,阿聰就拍晒心口話會睇住佢:「唔使俾貼士佢啦!好期待同佢做同事,我到時都會喺隔籬廠拍另一套劇,冇事嘅!」
眼見好兄弟辛苦到嘔,未來兩個月又要日以繼夜拍住出名有霸氣的汪阿姐,唔怪得小方未拍已經怕怕啦!
周一( 26日),張繼聰在高溫下拍外景,說到之前拍到病,他說:「呢套劇我要練大隻,不過下一套又要再增番肥,為拍劇冇辦法啦!」
黑面女皇
66歲的汪阿姐要求嚴厲,對遲到者一律黑面對待,行內無人不知。早年TVB小生歐陽波比與謝天華,一聽到對手係阿姐,都驚自己不能準時而曾經推劇。亦有不少後輩中招,受阿姐黑面對待,甚至訓話。
佘詩曼外景例遲
2008年,佘詩曼與汪阿姐到中山拍攝民初劇外景,阿姐及其他演員都準時到場,獨欠阿佘。阿姐邊撥扇邊等,十分鐘後未見阿佘即發火問導演。遲到的阿佘見阿姐黑面唔敢出聲,行開避鋒頭。
王祖藍被通緝
2011年,身為阿姐愛將的王祖藍都冇面俾,拍劇時王祖藍遲到,阿姐立即在微博寫道:「王祖藍!你在何方?外景隊在舊邵氏片場等緊……」祖藍亦知驚,半小時內速現身,即時??掂阿姐。
岑麗香 NG累事
2012年,岑麗香首次擔正的《爸不得媽媽》飾演電視台記者,有報道指岑演技生硬、唔識走位,頻頻 NG,令阿姐拍外景時經常在烈日下曝曬,最後慘遭阿姐黑面對待。