嫌屋細劉丹難相處 楊冪搬六千萬豪宅割席

霸氣新抱楊冪誕下小糯米後,上周四( 5日)終於出院,連同劉愷威一家人,當日總動員十人傍實這位出爐媽咪,認真大陣仗。
事後楊冪雖然一如以往照返劉丹沙田屋企,但原來她已計劃短期內帶埋初生愛女,進駐剛以六千萬買入的九龍塘喇沙利道一號三千呎豪宅,真係坐月大晒。
據知楊冪嫁入劉家後,愈益氣燄逼人,佗 B時更與老爺劉丹頻頻爆發摩擦,更嫌劉丹千二呎屋唔夠住。早前楊冪亦在微博大控訴,暗示自己不被尊重和受束縛。看來這場中港矛盾戰持續不休,白皮書都解決不來。

於北京生活了 27年的楊冪,為了成為單非媽咪,今年 2月大住個肚殺落香港,搬入夫家住了多年的沙田世界花園千二呎三房單位,與老爺奶奶同住。

忽然1周 第985期:坐月大晒 嫌屋細劉丹難相處 楊冪搬六千萬豪宅割席
霸氣出院
上周四( 5日),戴住黑超、身穿 LV連身衫的楊冪,由劉丹、劉愷威等十人護送出院,場面比英國皇妃出院時誇張,認真有霸氣。


狂晒小糯米
楊冪生女後霸氣升級,連日來除了周筆暢等圈中好友,輪住上劉丹屋企探她和小糯米外,她亦分拆式擺小糯米新相上微博。

失控黑面
楊冪和小糯米隨後由奶奶和女親友護送上七人車。由於現場太多記者,搞到場面失控,楊冪邊行邊黑面。

千二呎 沙田舊屋
劉丹住了多年的世界花園寓所,位於沙田半山,樓齡已有 37年。屋苑有五座,單位共有 408個,密度較高。而劉丹所住的單位約千二呎三房間隔。

匿房避老爺


楊冪父母 夜闖新居
上周二( 3日),記者便拍得楊冪父母食完晚飯後,漏夜到九龍塘喇沙利道一號,幫女兒新屋打點。

性格孤僻,不愛應酬的楊冪,雖然初嚟甫到,但她恃肚橫行,經常嫌東嫌西,更試過向老公劉愷威詐型,投訴劉丹間屋太細,毫無私人空間。知情人士說:「楊冪搵到錢,喺北京住慣幾千呎大屋,突然要同咁多人迫喺千零呎嘅屋度,當然唔慣啦!所以佢養胎嗰排,長期留喺自己間房入面,同老爺奶奶偈都唔傾多句,好似唔識咁!」
佗 B期間,楊冪唔理粗身大細,透過助手約地產經紀睇樓,希望盡快離開劉丹屋企。知情人士說:「前年阿威送咗層中半山蔚皇居俾佢,不過佢嫌嗰度空氣差,所以住咗一陣就租咗出去。之後佢就大住個肚睇過上水啲獨立屋,但又嫌交通唔方便。最後佢睇中九龍城喇沙利道一號,貴就貴啲,但貪嗰度單位少,私隱度高,兼且校網好,所以賣成六千萬都即刻扑槌囉!」

大肚搬屋遭阻撓

劉愷威和楊冪兩公婆去年吸走一億人仔,要買超級豪宅,絕對綽綽有餘。有靚屋揸手的楊冪,當時為了盡快離開劉家,不惜腹大便便堅持搬屋,最終當然被劉丹反對。知情人士說:「係人都知大肚搬屋會動胎氣,但楊冪唔聽老人家勸誡之餘,仲反話佢哋思想保守,要搞到喺上海拍緊劇嘅劉愷威,立即打電話返嚟o氹老婆先調停到。」
雖然有屋搬不得,但楊冪去意已決,坐月不夠一星期,已心思思想帶埋小糯米搬去新屋,搞到一直恨湊孫的劉丹兩公婆非常煩惱。上周二( 3日),記者便拍得特登由北京來港探孫的楊冪父母,漏夜到新屋打點。知情人士說:「楊冪父母係內地人,所以佢哋嚟香港最多一星期就要走。不過為想個女快啲有自己地方,唔好再寄人籬下,佢哋一有時間就買定啲日用品去新居,唔想個女搬屋嗰陣揦手唔成勢。到時搬咗新屋,小糯米主力由工人湊,已經退休嘅楊冪父母會多啲時間嚟香港湊孫,劉丹兩公婆探孫就要去新屋。」

三千呎 四房豪宅
楊冪新竇位於九龍塘喇沙利道一號, 2009年落成,樓齡只有 6年,全個屋苑只有 14個單位,設有氣派會所外,大堂放滿藝術品,住客可透過玻璃升降機飽覽屋苑內的水簾瀑布。

多窗巨廳
新屋以闊落見稱,其中 L形多窗巨廳屬於市區樓盤罕見。

四個套房所有單位都設有四個巨型套房,而主人房更設圓型浴缸,非常奢華。

微博大控訴

除了因為搬屋問題,令楊冪和劉丹二人起爭執外,新抱一些生活小節亦令兩老睇唔過眼。知情人士說:「大肚婆當然要食嘢定時,唔好餓親肚入面嗰個,但楊冪就好有自己風格,奶奶叫佢進補,佢就偏偏唔聽。即使依家坐月,楊冪都闊佬懶理,佢奶奶每日都會煲雞湯俾佢調埋身體,加上楊冪餵人奶,劉媽媽怕新抱唔夠奶水,但佢就話太油膩唔食,搞到兩老好頭痕。」
記者發現楊冪早前在微博借佛經,暗示不受尊重兼生活被束縛,她引用的佛偈寫:「既是有緣做一家人,就彼此珍惜、尊重,不要試圖用貪愛去束縛對方。」暗寸指劉丹一家人對她十分管束。手心係肉,手背又係肉,難怪成為磨心的劉愷威,早前在訪問中亦無意中漏口風:「一南一北兩個地方,文化可能真的不一樣。」


佗 B時 脾氣古怪
大肚婆脾氣零舍古怪,今年 3月,記者拍得劉愷威揸車載住楊冪外出,不過楊發現記者後,竟然黑面要叫老公折返。

控訴受束縛
早前楊冪在微博發牢騷,借佛偈暗示有家庭成員對她不尊重兼令她冇自由。


狂刨佛經
楊冪篤信佛教,佗 B和坐月期間頻頻刨佛教書籍。她所引用的佛偈出自四川佛學院喇嘛希阿榮博堪布的著作《寂靜之道》。

楊冪出院不久,劉愷威便立即趕返上海宣傳新劇,要遙距化解家庭問題。

劉丹暗示鬧不快

新抱於微博呻爆,老爺劉丹當然唔高興。周三( 11日),他在電話回覆記者時,就暗示與楊冪鬧過不快,但就拒絕披露內情。他說;「哎!唔夾一定有,不過依家冇事啦!(係咪磨合咗)冇嘢喇!我哋一磨即合。依家嫲嫲負責買嘢,工人就煮嘢。媽咪(楊冪)負責餵奶,我就負責抱下佢( BB)同摸下佢囉。阿威仲喺橫店呀,所以佢每晚都打視像電話睇 BB同老婆,至少都有半小時?!」至於楊冪堅決搬屋一事,他就說:「哎!呢啲嘢唔知呀!你哋唔好問我啦!」不過劉丹早前就講過:「佢哋鍾意住邊都可以,自己冇所謂。」
不過愛孫心切的劉丹老婆,周二( 10日)到馬鞍山處理私人事務時,被問到搬屋一事就說:「哎吔!你哋點知?!」幾秒過後,她才補鑊說:「嗰度係佢(楊冪)朋友間屋啫!」似乎她又怕新抱問責。對於之後冇得湊孫,她就堅持說:「佢(小糯米)都係跟我同丹爺,會喺香港讀書。(楊冪係咪餵人奶?)都係人奶同奶粉隔住餵。我唔理佢啲嘢,我只係負責我嗰 part,唔通我睇住佢餵人奶咩!」看來這場中港婆媳大戰仲有排鬥。


周三( 11日),劉丹向記者堅稱楊冪是好新抱,不過就暗示曾經和她鬧不快。他說:「唔夾一定有!依家冇事啦!」

周二( 10日),劉丹老婆坐車到馬鞍山街市買雞煲湯俾楊冪,她說:「佢復元得好快!」不過記者再三問楊冪的事,她則說:「我唔理佢啲嘢!」

煲湯俾新抱
做人奶奶甚艱難。雖然與新抱唔算投契,但劉丹老婆依然肩負奶奶責任,煲湯水俾楊冪進補。本刊早前便拍得她着同一件衫到街市買湯料。

中港物業多

楊冪和劉愷威屬內地一線紅星,吸金力非常強勁,二人亦鍾意買磚頭投資,物業遍布中港兩地。

北京兩樓揸手
生於北京的楊冪, 2011年憑劇集《宮》人氣急升。為方便工作,當時她就於北京東四環雲霄橋買下公寓,現市值一千萬。而一直北上開工都下榻酒店的劉愷威,據知與楊冪拍拖後,就夾份二千多萬,買入譽皇殿(上圖)別墅投資。

中半山放租
劉愷威和楊冪以「領譽有限公司」名義,於 2012年以三千萬買入中半山蔚皇居一高層單位,現時單位已升值至三千五百萬,不過二人無意賣出,用作放租為主。

九龍塘新竇自住
二人的新竇位於九龍塘喇沙利道一號 One LaSalle,屬於低密度豪宅。新竇除了私隱度高外,最大優點是校網相當好,區內 13間學校,如瑪利諾修院學校、拔萃小學等,全部是數一數二的名校。

半年賺五千萬

劉愷威和楊冪吸金力驚人,二人分別打入去年福布斯中國名人榜,楊冪高踞第 6名,劉愷威則佔第 19名。兩公婆單是上半年已賺過三千萬,楊冪即使大住肚亦有錢搵,認真犀利。

劉丹就足半年

楊冪嫌劉丹難相處,所以一意孤行搬離劉家。但其實楊冪自從嫁入劉家後,劉丹為免與有餡新抱正面衝突交鋒,一於遷就到底,足足就咗半年。

婚禮做司儀
劉愷威和楊冪今年 1月在峇里搞婚禮,出發時楊冪全程拒絕接受香港傳媒訪問。劉丹於是做埋發言人,讓傳媒交功課。婚禮期間,劉丹唔介意充當司儀,可惜婚宴變女家主場,男家親友少之又少。

外賣速遞
楊冪佗 B期間,口味經常轉變。平時愛食齋的她,忽然鍾意食片皮鴨和薄餅,更想食就要食。於是劉丹做埋外賣速遞,特登揸車去買薄餅。

打波度日
楊冪要求多多,搞到劉丹費事煩,即使不用拍處境劇,也寧願少留在家,反而約三五知己,去球場打 golf打發時間,避得就避。

生完忌即時減肥

愛靚是女士天性,不少媽咪都望生完即收身。剛生完女的楊幂,為瘦身連奶奶煲的湯水都唔願飲。
濟豐堂註冊中醫何婉珊指︰「喺中醫角度睇生完 BB嘅女士失血、用力過度,所以血氣不足,開刀、順產都唔可以即刻減肥。開刀嘅可以飲陳皮、炒米茶等,生完 BB半年內係進補黃金時間,若果補得唔好,中年後會有不良症狀產生。」

劉愷威無買豪宅撇甩老竇

剛榮升爸爸的劉愷威,昨日應邀出席在上海舉行的開幕活動,有指太太楊冪嫌棄寓所太細,與老爺劉丹難以相處,於是斥資6000萬元購入九龍塘豪宅。劉愷威說:「不是,不要信,完全是瞎話。」他笑指太太產後母愛氾濫,產前會討論復出工作的問題,產後卻無時無刻望着BB。劉愷威說:「我們在牀邊可以望幾個小時,太太比以前更溫柔,情緒非常好,狀態與小孩一樣很好。」至於是否仍與爸爸劉丹同住?劉愷威說:「是,我們沒有搬出去,半山的寓所也沒有出租,仍是自己住。」

提到楊冪何時復出,劉愷威說:「我們不會太快全面復出,我希望多些時間陪伴太太及女兒,一盡老公及爸爸的責任。是否懂得換尿片?睇人換就多,我沒動過手,因為BB身體太軟,我擔心整傷她,反而試過餵奶。」問他如何照顧太太?劉愷威說:「我做打雜,扶她、搬東西、買東西和聊天,主要是心理上陪伴。」有傳陳茵媺患上媽媽手而押後復出,劉愷威表示楊冪有陪月員和父母幫手,有專業人士也說最初幾個月,媽咪不宜抱BB。

劉愷威表示離港3天已很記掛BB,幸好太太不時傳短訊給他,他收到好友唐嫣送的大禮物,周筆暢日前亦去香港探望BB。

评论回复