87年憑處境劇《城市故事》「蚊豬」一角彈起的吳茜薇， 92年下嫁金牌監製招振強後便宣布息影，並誕下兩女。
事隔 20多年，原來吳茜薇和招振強經已此情不再，二人正在搞離婚。據知十一年前已離家出走、多年來隱身於內地的招振強，前年忽然發律師信俾吳茜薇要求離婚，更反指對方收埋兩個女，令他不能盡父親責任。
多年來要獨力湊大兩個女的吳茜薇，其實已經接受冇老公的事實，如今又被離婚官司困擾，逼使她向本刊控訴招振強掟家用落地、招惹小三小四、懶理大女死活等罪狀。一個大好家庭被摧毀，吳茜薇哭着說：「只怪我睇錯人，佢大陸唔止一個女人！」

今日已變為肥師奶的吳茜薇周一（ 21日）接受本刊訪問。提起過去十一年有老公等如冇老公，兩女有老竇等如冇老竇的日子，十分無奈。

當年外形嬌滴滴的吳茜薇，如今經已變成 49歲的脹爆師奶。 92年下嫁招振強後，便決心退出娛圈，全職湊女。旁人以為她家庭生活美滿，但 03年沙士，改變了她和招振強的夫妻關係。
當年香港電視圈一片死寂，招振強有樣學樣北上搵食，點知一去冇回頭。吳茜薇對記者說：「嗰年之後，佢攞番嚟屋企嘅錢唔多。喺大陸返嚟兩個月之後，又話接到 job再上去（北上），唔輪到我俾唔俾佢上去㗎！嗰時開始，招生已經唔似係我識嘅一個人。」

蚊豬彈起
87年才 22歲的吳茜薇憑《城市故事》「蚊豬」一角彈起，可惜之後再沒有代表作，最受矚目的人生代表作就是嫁俾招振強。

22年婚姻玩完
招振強與吳茜薇 92年 5月 18日，在紅棉道婚姻註冊處登記結婚，成為當時娛圈大事，吸引不少記者到場。

掟家用落地

招振強北上後只每隔幾個月返港一次俾家用，當時要照顧兩女生活的吳茜薇徬徨無助，但又唔敢向家人求救，「我當初完全唔聽父母勸阻去嫁招生，有困難時邊好意思同佢哋講。」為了生活，即使招振強亂發脾氣，吳茜薇只好忍氣吞聲。「 04年開始招生俾家用唔定時。 06年佢返咗嚟一次，我話冇錢，問佢攞家用，佢掟錢落地俾我。我又冇做錯嘢，我問你攞家用啫！你唔使掟俾我呀！幾千蚊都掟落地下，跟住鬧我黐線，特登開大度門俾隔籬鄰舍聽。我當時都有名氣，雖然肥咗少少，但都有人認得我㗎嘛！」自此之後，吳茜薇和招振強不相往還，雖然未辦離婚手續，但婚姻名存實亡。
而招振強失蹤期間，最惡劣時期吳茜薇連買奶粉、交學費都冇錢，要靠叔仔及娘家接濟。

提女兒爆喊
大女幼稚園第一年，都是爸爸招振強接送上學的，爸爸突然失蹤，大女接受不來，吳茜薇講到這裏悲從中來。

出埠拍拖
吳茜薇接受招振強追求後，二人經常去泰國旅行，還在當地影沙灘泳照。

幸福佗女
95年 4月，佗住 7個月身孕的吳茜薇與老公招振強去朋友家食飯。吳挨住那輛平治，是吳父特別叫司機接送女兒的座駕，可見那時生活相當富足。

大女兩歲時，吳茜薇與招振強在家中合照，當時仍是個幸福家庭的模樣，有誰想到不久後便破碎。

懶理大女患重病

自己受辱忍得就忍，最寃枉是兩個女自此沒有了爸爸。吳茜薇苦笑：「最初兩個女返學本手冊，我都要冒簽（父親名）。」她憶述當時母兼父職的苦況時，愈說愈激動：「大女好黐爸爸，以前讀幼稚園返學放學都係爸爸接佢。之後招生去北京唔見咗人，我負責接送。個女因為唔見爸爸發脾氣唔肯拖我隻手，仲大力打我個肚。但半年後有一日佢突然主動拖我隻手，嗰刻我喊咗出嚟。咁細個就要佢哋明白呢樣嘢！真係好殘忍。」說罷感慨落淚。
正當兩個女開始接受沒有爸爸的日子，好景不常， 08年大女 13歲時，突然患上免疫系統急病，要入深切治療部（ ICU）隔離。大女經歷生死邊緣，吳茜薇此時將夫妻情仇拋諸腦後，希望招振強返港見大女。「醫生話佢（大女）好危險，隨時會冇命，我好驚。打電話俾招生叫佢即刻返香港陪個女，點知佢話冇錢買機票喎。佢可以唔再愛我，但唔可以唔盡做爸爸嘅責任。呢次我真正死心。醫生叫我搵佢爸爸簽名時，我話個女冇爸爸。」

生活慳家
做了十多年單親媽媽，吳茜薇做得最多的是一個人去超市購物，為兩個女今後的日子精打細算。

大女黐父親
吳茜薇大女自小便喜歡黐父親四圍去。不過自招振強離家出走後，大女經常因掛住老竇在課室喊，吳說：「對個女好內疚。」

細女叫錯爹哋
大女喜歡畫畫，但她童年時頻頻畫自己睇醫生的情形，而她的心更是碎裂的。細女亦試過將家庭醫生錯嗌做「爹爹」。

收埋多個女人

招振強是金牌監製，當然招惹不少女士埋身，吳茜薇當年曾親耳聽到招振強俾女人嗲。她對此記憶猶新，「佢返咗大陸九個幾月，俾我知道佢有第二個。有日我哋傾電話，佢冇收到線喎，俾我聽到有人講嗰啲嘢（小三嗲招振強）。嘩！聽完之後直頭傻咗，我不停喺電話大喊。依家諗番，唔知係咪佢特登俾我聽。」
現時二人已再冇聯絡，但吳茜薇透過友人得悉招振強在內地繼續風流。「佢喺大陸好多女人，第一個（女人）係好耐之前，依家嗰個已經唔係同一個人嚟㗎喇！」

網友鬧爆
當年因嫁招振強被千夫所指，吳茜薇背負小三之名廿多年，今日她婚變，有網友指是自作自受，吳茜薇是有苦自己知。但據知當年介入莊文清和招振強婚姻的女星，是當時知名花旦莊靜而。

早前吳茜薇獲《城市故事》拍檔冼米華梁思浩安排，上有線電視接受訪問。他說：「我本身唔識招仔（招振強），但作為男人結完婚走咗去，留低一堆蘇州屎，好唔負責任。」

曾拍過招振強監製的《新紮師兄》的關禮傑，表示對此事並不知情，他說：「我哋好多年冇聯絡，但佢拍嘢好認真，捉得好嚴。」《 FACE》圖片

否認搶莊文清老公

當年有指因為吳茜薇介入，導致招振強和莊文清離婚，因此現在輪到吳茜薇遭內地小三破壞家庭，有網友就揶揄事件是天理循環。她肉緊說：「我唔係第三者，一定唔係第三者。佢同莊文清嗰時已經離咗婚三、四年， 89年招生追我， 90年我先接受佢嘅追求。佢哋結婚到離婚，我都未入行。」當時招振強為了將吳茜薇追到手，更拎出他和莊文清的離婚證明書表示誠意。
現時大女已經 19歲，細女亦 15歲，吳茜薇希望重出江湖。「我兩個女仲要讀大學，父母都老喇！我希望可以重新踏入娛樂圈。肥唔緊要，我可以做細細粒（陳嘉佳）媽咪㗎，鬥肥吖嘛！我可以 keep，但 keep咗靚唔靚得過葉蘊儀，冇人知㗎喎！」
至於身在內地的招振強，對吳茜薇所說還未表態，記者多次致電其手機，但他未有接聽。看來這單離婚 case仲有排搞。

曾與莊文清結婚

招振強與前任太太莊文清，是無綫第一期訓練班同學，之後兩人拍拖結婚，招振強的事業亦起飛，雄霸整個 80年代的電視劇，但他倆的婚姻卻告終。

律師：贍養費父母都要負責

失蹤 11年的招振強， 2010年入紙申請與吳茜薇離婚，並以找不到她為由，拒絕俾贍養費。但吳茜薇指招振強多年來拒接聽她電話，也甚少俾家用及照顧兩女。雙方各執一詞，仍在打官司。
有律師指這類官司存在很多灰色地帶。「因為男方有可能證明自己唔係冇做（俾錢照顧）。至於過去 11年冇俾家用同女嘅教育費，依家喺香港嚟講，父母雙方都要負責嘅，或者只會判男方俾番一半之類，但都要雙方講掂數，先至會判。呢類案件通常都有排搞。」

心理學家：單親子女要搵代替

臨牀身心行為學家李寶能，認為出身於單親家庭的小孩，容易因期待有父親或母親而尋找代替的人。他說：「這種本能喺心理學上同行為學上其實係一個好基本嘅概念。單親小孩遇到一啲令佢哋產生安全感嘅人而開心，即使佢哋冇開口叫對方做父親母親，但佢個心都會安定落嚟，呢種係一種替代關係。家長應該好好同小孩溝通，如果處理不當，小孩很易產生自卑或者怨恨。」

吳茜薇入行僅八年

84年，當時 19歲的吳茜薇，參加大台第十三期藝訓班入行，於 87年的處境劇《城市故事》中扮演「蚊豬」角色令她成名。但由於之後缺乏擔正主角機會，她 88年轉投亞視，在《小白龍》一劇反串演男主角。
之後她轉到台灣發展，與姜大衞、李婉華等合演過電視劇《刺馬》。 92年便與招振強結婚，退出娛樂圈生女。

吳茜薇之後參演多部古裝劇，但人氣已大不如前。

招振強搶手監製

招振強畢業於大台第一期藝訓班，其後他轉投幕後，由助導做起，然後升任編導、監製。他是 80年代的著名監製，製作了不少受歡迎及有口碑的電視劇集，例如鄭少秋的《倚天屠龍記》和周潤發、呂良偉的《上海灘》。
之後轉投亞視，由於電視部人事變動，他很快被解僱。 92年到台灣發展，之後再重返大台，監製由陳錦鴻演出的《新上海灘》。 2000年，他導演過電影《鬼名模》，票房和口碑極差，其後北上發展，但多年來代表作欠奉。