有人辭官歸故里，有人漏夜趕科場，06年，徐淑敏（Suki）憑着一股儍勇參選港姐，成功闖關加入無綫，轉眼已7年，Suki的演藝成績冇躍進，但其間兩級跳升呢人妻人母，七年之癢令她萌退意。去年獲老公黃浩打本賣護膚品，開竅Suki愛上營商面對的挑戰和滿足感，花瓶變身女強人。

撰文：比華利

莫欺少年窮，當年屋邨妹徐淑敏，如今不但建立了幸福家庭，還擁有自家護膚品牌，06年Suki走捷徑選港姐，雖然只得旅遊大使豬肉獎，卻順利踏上星途，緣份讓她嫁給商人黃浩，去年還圓創業夢，營商為Suki帶來挑戰和滿足感，令她對娛圈毫不留戀，走夾唔唞。

■徐淑敏去年開創了美容品牌生意後，對演藝工作意興闌珊萌退意。
攝影：葉君海

■徐淑敏當年主持飲食節目，直擊日本一拍賣過程，令觀眾留下深刻印象。

豬豬讀書開竅

無綫花旦中，Suki出道時搏殺拋咪，馬上被封咪神，七年演藝生涯，有數得計只拍過六部劇集，全部是花瓶角色，當中既沒磨練到演技，也沒令Suki演上癮。反而她憑伶俐口齒當飲食及旅遊節目主持較合適，偏偏有天時有地利，卻未配人和。Suki在09年奉女成婚，一口氣升呢人妻人母，幕前鬥心遞減，她索性只讓肚皮開工，連生兩女。

兩個小女兒為Suki的星途帶來障礙，她不能再性感演出，又或太長時間離家出埠，只能齋接商場騷。悠閒的Suki趁機報讀香薰課程，增值後同時開竅。Suki決心創業，老公黃浩即打本三百多萬給她由零開始，去年成功生產了一系列的護膚品，還開始網上出售。

由藝人搖身變成老闆，Suki感受良多說：「娛圈工作被動，自己命運控制喺人哋手，不如控制喺自己對手。做咗老闆，我變得積極咗，自己錢唔衰得。以前做藝人好hea，一嚿飯，一隻豬，公司啲人都改我花名做『豬豬』，我試過去影相漏低架車，反而??家做咗管理人士，我細心咗。」Suki還把「放紙鳶」理念融入管理員工之中，她說：「我對員工有時嚴，有時鬆，我要搵同我有共同理念嘅人做嘢，大家都唔怕蝕底。」

黃浩財力上無限量支持Suki，她說：「佢畀我三百幾萬創業，一有單就搵佢找數，我自己都貼埋私己錢，希望一年可以回到本，生意開始咗半年，漸上軌道，??家營業額有七位數字，可以自負盈虧。」Suki強調創業至今得個做字，但享受過程，她坦言：「做藝人係搵到錢，但搵唔到自己方向，我好鍾意??家做生意，好有滿足感。」畢竟Suki才28歲，不想浪費人生，她說：「成世人流流長，我鍾意每個年紀都挑戰自己，??家搵到鍾意嘅美容生意，我會瞓身去做。」

■06年周身baby fat的徐淑敏參選港姐，一臉清純。

■徐淑敏表示經營生意期間，克服每一個挑戰都帶來滿足感。

■跟老公黃浩結婚四年，越來越恩愛，徐淑敏永遠把家庭排首位。

拒當背後女人

Suki去年底創業，本來可喜可賀，卻撞正老公黃浩跟曾志偉爭拗，更發生掌摑事件，過去幾個月，Suki曾被拖累，商場騷大減，既煩公事，也擔心家事，愁爆下暴瘦。糾纏半年，警方日前指出當日被捕的志偉已獲釋，事件終告一段落。Suki日前卻宣佈要退出，據知她跟無綫尚有三年經理人合約，她未有提前解約行動，待合約告終便全身轉型。Suki近日沒跟無綫製作資源部總監樂易玲溝通，她說：「好耐冇見過，對上一次都係台慶時客戶活動。」那曾志偉呢？Suki說：「都冇見過。」獲釋志偉風騷爆「放下」金句，Suki不擔心見面會尷尬，她平常心說：「見到先算。」

Suki引退決定獲黃浩全力支持，她說：「老公乜都支持，佢最怕我哋爭拗，傷夫妻感情。」Suki直言沒因掌摑事件怪老公，她說：「我嘅角色係支持佢，陪住佢，佢都有同我講sorry，話件事影響咗我，但我哋夫妻感情一如往常，冇因為件事有影響。」Suki甘願犧牲任何事，力保家庭在首位，她堅持：「唔係話要做成功男人背後嘅女人，大家一齊成功啦，我唔想做寄生蟲。」

髮型：Eas of Chin.G
化妝：Tiffany Fong
場地：Alba

女神追仔豐胸

■Suki計劃不設防，準備為兩女追個弟弟。

兩女之母徐淑敏漸變人乾，近年體重更急降至只得100磅，咪神地位不保，上圍由出道的E cup跌到B cup。Suki笑言：「朋友都擔心我厭食症，但我其實有勁食，只係唔吸收。」她都積極增磅回復咪神封號，她說：「要肥番就要再陀B。」

長女Vianna

產後易脫髮

現年28歲的Suki不設防追仔，她說：「我想30歲前追個仔，生埋就肚皮收工，都唔想太老先去生。」雖然期待為老公黃浩追慈姑椗，但Suki都有隱憂，她說：「我次次生完BB，跟住嘅兩、三個月就甩好多頭髮，至少冇咗四分一，??家頭髮薄咗好多。唔止男人緊張甩頭髮，女人都擔心會稀疏。」

當看到兩個囡囡Vianna及Renne越大越精靈，Suki又會忘記脫髮危機，她說：「佢哋嗲到暈，好過癮。兩姊妹性格好唔同，Vianna講嘢好叻，嗌交包保唔會輸，Renne就好有音樂感。」Suki對兩女管教非常自由，她不介意兩女將來步踏上選美台，她說：「佢哋鍾意嘅話，我會支持，我都接受畀佢哋課餘試吓拍嘢，好多藝人都童星出身，不過童星就比較老積。」Vianna及Renne的樣子似足爹哋，身為宅男女神Suki希望將來囝囝可有她的優良傳統，長大成宅女男神。