娛圈代母熱
王喜：我都想生 馬仔：我接受到
富商李兆基（四叔）的未婚長子李家傑買卵借肚產子，由代母誕下三胞胎，事件哄動全城，對一班唔多願結婚，但想傳宗接代的娛圈王老五來說，絕對是天大喜訊，無綫王老五小生王喜和馬浚偉都異口同聲恭賀李家傑外，還羨慕不已，王喜心郁郁想搵代母產子，坦言：「我都想生！」而馬仔則表示會先靠自己的能力生仔，但也接受代母產子。
坐擁三千億元王國的恒基地產主席李兆基，其未婚長子李家傑買卵借肚產子，今年 7月於美國由代母誕下三胞胎兒子，李家傑忽然榮升做三子之父轟動全城，加上李家傑有機成為無綫的未來老闆，其喜訊即成為娛圈的熱門話題，特別對一眾不願結婚，但想傳宗接代的圈中王老五來說是天大喜訊，即時令娛圈掀起一股代母熱潮。
富商李兆基長子李家傑（小圖）買卵借肚產子，今年 7月於美國由代母誕下三胞胎兒子。
王喜羨慕李家傑成為三胞胎之父，更心思思想找代母生子，不過認為生仔容易教養難，要考慮清楚。資料圖片
馬浚偉表示將來結婚生子，如果有困難的話，他不排除以科技方法解決難題。資料圖片
王喜賀李家一索三傑
無綫王老五小生包括 43歲的王喜和 39歲的馬浚偉，昨日不約而同恭賀李家傑榮升老竇，王喜昨於電話中說：「李家一索三傑，係非常值得恭喜嘅事，好羨慕囉。」問他會否考慮請代母產子？他笑說：「我都想生但冇錢養，搵到贊助商養仔就多多都生。」至於家人曾否催他早日結婚生仔？王喜則說：「生唔生係我決定，同屋企人無關。」
馬浚偉也透過電話說：「搵代母生仔呢樣嘢係睇個人，我好鍾意小朋友，如果第日真係結婚，亦好希望生小朋友，不過我會先用原始同自然嘅方法，如果嘗試過都唔得，而科技可以幫到，當事人又舒服嘅話，冇乜所謂，我接受到。」有指代母產子或成為趨勢，馬仔說：「呢個係一個科技嘅演變，好個人主義，好難評論支唔支持，譬如會有啲不育夫妻用呢個方法生 BB，又唔係殺人放火傷天害理，有新生命來臨梗開心 o架。」
47歲的形象指導張學潤（ Nel Nel）坦言年輕時曾想找代母生子，不過他覺得養小朋友要花很多心思及金錢，所以要慎重考慮，他說：「自己好重視事業，所以擱置，咁大年紀就唔做，李家傑生十個就唔怕，佢大把錢。」
外表花弗的楊其龍原來早有為楊家傳宗接代的想法，現在更計劃去美國物色代母。資料圖片
富貴王老五王賢誌表示世界不停轉變，請代母產子勢必成為新潮流。資料圖片
楊其龍擬炮製龍鳳胎
另一鑽石王老五王賢誌亦謂可接受代母產子，他說：「我幾享受家自由自在嘅生活，突然有個 BB會好煩，我兩個妹最近都湊小朋友，睇到佢哋好多嘢要搞，人生所有嘢都要掟埋一邊。有時間唔中自己有個諗法，人大啦，有下一代無疑有寄託，但冇所謂啦，阿妹嘅細路同我都有血緣關係。」 40歲的他更斷言代母產子必定成為潮流：「一定會，世界不停變，大家會越嚟越接受新嘢。」
至於 43歲的楊其龍（ Gilbert）雖然外表花弗唔定性，但原來他每年生日願望都是希望早日成家立室，加上今年嫲嫲過世的打擊下，令他更加決心要傳宗接代，他昨日接受電話訪問時直認有借肚產子的打算，還反問記者是否可取得聯絡方法，似乎求子心切，他承認身為長子壓力甚大，並說：「我又唔知自己幾時搵到適合對象同結婚，趁後生，最保險嘅方法就係搵代母，我家已減少夜蒲，本身又鍾意小朋友，應該會去美國搞，不過就未必搵中國人，可能搵番鬼妹，自己仔女都鍾意，不過鍾意女多啲，最好一男一女龍鳳胎。」
鄧梓峰多仔公耗體能
雖然鄧梓峰的孖仔已經 12歲，但他們打孖上扭計的苦況，仍歷歷在目。資料圖片
恒基太子爺李家傑成 3胞胎之父，圈中人只有導演張之亮可看齊。藝人鄧梓峰的孖仔已 12歲，他以過來人身份分享湊仔心得：「最辛苦係初初嘅時候，同一時間湊兩個，最怕係夜晚佢哋唔同時間喊，喺體能上要應付到。」他認為夫婦要分工合作或搵傭人幫手。
鄧梓峰自爆當年太太懷雙胞胎的心情，他說：「有兩個人喺肚度，梗係要仲小心啲啦。」對於有人指孖生的孩子會有心靈感應，梓峰就覺得是因為雙方多年來一起生活，所以會熟知對方的想法，跟感應無關。
全城熱話
天明：生仔生女聽天命
洪天明
富商李兆基長子李家傑借肚生子，一索三男，喜訊哄動全城，連娛圈中人亦爭相八卦李家小寶貝的成長，以及千億新抱徐子淇的生育大計。
謝安琪
蘇永康
洪天明：呢個年代唔係話要生仔繼承王國，小朋友係佢哋嘅屋企人，做父母就會開心，家年代不同，生仔生女唔需要畀壓力自己（指徐子淇），好多嘢上天會安排。
謝安琪：我有啲朋友都好難有小朋友，試管有好多都做唔到，小朋友對家庭好重要，領養同代母都好，我都支持，亦唔覺得呢件事對徐子淇有影響喎。
關楚耀：如果係四叔恨抱孫，佢都係一片孝心啫。我父母喺呢方面冇逼我，睇緣份啦，我諗生仔我 OK嘅，冇諗過要效法，順其自然啦。我都相信唔會影響徐子淇。
蘇永康：都普天同慶呀，最好四叔將樓價減 10%畀大家。我唔覺得件事有違自然，人人都有人權，四叔開心咪得囉，成家人都開心。
馮德倫：我覺得仔女都一樣，冇所謂嘅，我接受到代母生仔，冇問題呀。