兩網民包圍TVB 無綫零回應

網民曾慶光繼昨天到亞洲電視總部「單挑」亞視後,今天再到無綫電視城,抗議無綫電視干預政府增發免費電視牌照,剝奪市民選擇權,其間有一名市民到場聲援,令示威人數倍增。

曾慶光在電視城門外舉起示威標語,更大唱《天蠶變》主題曲反諷無綫,未見保安攔阻,現場有十多名途人圍觀。他呼籲大家要站出來,逼使政府增發免費電視牌照,不要令一台獨大。

【包圍TVB】 今日有兩個網民 無綫零回應
2012-11-25 15:49:50

今日天陰陰又落雨,仲幾凍。但抗爭仍要繼續。噚日網民曾先生發動去圍亞視嘅行動,42個喺facebook話會出席嘅鍵盤戰士全部笠晒水,結果得曾先生一支公「圍」亞視。幸好今日佢發動嘅「包圍TVB行動」終於有戰友喇…但,都只係得一個馬先生咁大把。

下晝兩點幾,曾先生已經棟喺將軍澳電視廣播城門口。當時得佢一個,面對十數名記者。但TVB畢竟係大台,有一哥風範,冇學似得亞視咁、由執董盛品儒吹雞動員亞視百人舉牌嗌「嘔血」(否決)咁樣挑機。咁TVB有咩回應呢?係冇回應。冇派出任何人「招呼」曾先生,亦冇派保安睇住佢,更加冇報警。完全由得曾生自己solo。

問曾生點睇噚日自己包圍亞視、反而俾亞視百人包圍單嘢?佢話﹕「我都唔明白點解佢哋要圍我,我諗佢哋唔會打我啩﹗」講到今日又得佢一個抗爭,曾生話﹕「就算得我一個,都要喚起社會關注。」

兩網民包圍TVB 無綫零回應
兩網民包圍TVB 無綫零回應
幸好發表講話期間,多咗個戰友馬先生(右)。
兩網民包圍TVB 無綫零回應
十幾個記者VS一個曾先生
兩網民包圍TVB 無綫零回應
亞視都有派員採訪

【包圍TVB】 網民請「殼王」著電筒 萬千星虧賀台慶
2012-11-25 16:16:47


咁多網民支持嘅?錯,佢哋係啱啱喺TVB收工出嚟。

網民曾先生今日雖然有戰友馬先生同行,無奈是旦TVB當佢哋完全冇到,完全冇俾反應。問曾先生點睇TVB?佢話﹕「啲劇集千篇一律,只係拍師奶劇,一望個劇名同宣傳,已經知套劇講咩啦﹗」

噚日曾先生喺亞視大埔總台跳《江南style》,大唱高登仔改篇版。咁今日去無綫,有咩玩呢?就係玩《萬千星輝賀台慶》。唔知係星輝定星虧喇。只見光天白日曾生手持電筒仔,用vo聲宣佈﹕「有請TVB主席殼王,主持台慶亮燈儀式﹗」跟住再嗌﹕「1、2、7﹗亮燈﹗」仲唱埋《天蠶變》主題曲﹕「膽小非英雄,決不願停步…」話係用嚟反諷無綫喎。


曾生主持特別版台慶亮燈儀式。

「有請殼王主持台慶亮燈儀式﹗」

「著咗喇﹗」

手中無咪(高峰),心中有咪。

仲識扮兩把聲,好似說唱藝人咁自問自答做話劇。